ତିହିଡ଼ି,୦୯/୦୪: ମଧ୍ୟପ୍ରାଚ୍ୟ ଯୁଦ୍ଧର ପ୍ରଭାବ କୃଷି କ୍ଷେତ୍ରରେ ପ୍ରତିଫଳିତ ହୋଇଛି । ୟୁରିଆ ଉତ୍ପାଦନ ଏବଂ ଯୋଗାଣ ପ୍ରଭାବିତ ହେବା ପରେ ଖରିଫ୍ ଚାଷ କେମିତି ଉଠିବ ତା’କୁ ନେଇ ଚିନ୍ତା ବଢ଼ିଛି । ଏଭଳି ସଙ୍କଟଜନକ ସମୟରେ ଭଦ୍ରକ ଜିଲ୍ଲାରେ ପୂର୍ବବର୍ଷ ତୁଳନାରେ ୟୁରିଆ ଟାର୍ଗେଟ୍କୁ ପ୍ରାୟ ୨ ହଜାର ମେଟ୍ରିକ୍ ଟନ୍ ପର୍ଯ୍ୟନ୍ତ କମାଇ ଦିଆଯାଇଛି । ଅର୍ଥାତ୍ ସର୍ବାଧିକ ୧୨ ହଜାର ମେଟ୍ରିକ୍ ଟନ୍ ଯୋଗାଣ କରିବାକୁ ଯୋଜନା ପ୍ରସ୍ତୁତ କରାଯାଉଛି ।
ଗତବର୍ଷ ୧୪ ହଜାର ମେଟ୍ରିକ୍ ଟନ୍ ୟୁରିଆ ଯୋଗାଣ ସତ୍ତେ୍ୱ ଚାଷୀଙ୍କୁ ସାର ଅଭାବ ହୋଇଥିଲା । ଚାଷୀ ଆନ୍ଦୋଳନକୁ ଓହ୍ଲାଇଥିଲେ । ଏଥର ସମସ୍ୟା ଆହୁରି ଗମ୍ଭୀର ହେବା ଆଶଙ୍କା ଏବେଠୁ ଜଳଜଳ ହୋଇ ଦିଶିଲାଣି । ଅନ୍ୟ ପଟେ କୃଷି ବିଭାଗ ପକ୍ଷରୁ ସାର ପରିଚାଳନା ନେଇ ଯୋଜନା ପ୍ରସ୍ତୁତ ହୋଇଛି । ପ୍ରାଥମିକ ଭାବେ ତରଳ (ନାନୋ) ସାର ବ୍ୟବହାରକୁ ଗୁରୁତ୍ୱ ଦିଆଯାଇଛି । କଳାବଜାର ରୋକିବା ନିମନ୍ତେ ଅସାଧୁ ବ୍ୟବସାୟୀଙ୍କ ଉପରେ ତୀକ୍ଷ୍ଣ ନଜର ରଖାଯାଇଛି । ଭଦ୍ରକ ଜିଲ୍ଲାରେ ୨୦୨୬-୨୭ ଖରିଫ୍ ଚାଷ ପାଇଁ ୪୪ ହଜାର ମେଟ୍ରିକ୍ ଟନ୍ ସାର ବ୍ୟବହାର ଲକ୍ଷ୍ୟ ଧାର୍ଯ୍ୟ ହୋଇଥିଲା । ନାନୋ ୟୁରିଆ ଏବଂ ନାନୋ ଡିଏପି ପାଖାପାଖି ୨୮ ହଜାର ପେଟି ଚିଠା ହୋଇଥିବାବେଳେ ଏହାକୁ ୪୦ ହଜାର ପେଟିକୁ ବୃଦ୍ଧି କରାଯାଇଛି ।
ଉଲ୍ଲେଖଯୋଗ୍ୟ, ୨୦୨୫-୨୬ ବର୍ଷରେ ଜିଲ୍ଲାର ୭ଟି ବ୍ଲକ ପାଇଁ ୧୪ ହଜାର ମେଟ୍ରିକ୍ ଟନ୍ ୟୁରିଆ, ୧୦ ହଜାର ମେଟ୍ରିକ୍ ଟନ୍ ଡିଏପି, ୨୬୦୦ ମେଟ୍ରିକ୍ ଟନ୍ ଏମ୍ଓପି, ୫୦୦ ମେଟ୍ରିକ୍ ଟନ୍ ଏସ୍ଏସ୍ପି ୫୦୦ ସାର ଆସିଥିଲା । ସେହିପରି ୨୦-୨୦-୦-୧୩ ନାମକ ସାର ୩୯୪୦ ମେଟ୍ରିକ ଟନ୍, ୨୮-୨୮-୦ ନାମକ ସାର ୮୬୨୫ ମେଟ୍ରିକ୍ ଟନ୍ ଟନ୍, ୧୦-୨୬-୨୬ ନାମକ ସାର ୪୦ ମେଟ୍ରିକ୍ ଟନ୍, ୧୬-୧୬-୧୬ ନାମକ ସାର ୯୦ ମେଟ୍ରିକ୍ ଟନ୍, ୧୪-୩୫-୧୪ ନାମକ ସାର ୫ ମେଟ୍ରିକ୍ ଟନ୍କୁ ମିଶାଇ ମୋଟ୍ ୩୯.୮୦୦ ମେଟ୍ରିକ୍ ଟନ୍ ସାର ଯୋଗାଣ ହୋଇଥିଲା । ୟୁରିଆ ଅଭାବକୁ ନେଇ ଗତବର୍ଷ ଚାଷୀ ଅସନ୍ତୋଷ ତୀବ୍ର ହୋଇଥିଲା । ଏବେ ୭ଟି ବ୍ଲକର ଚାଷୀ ପାଖାପାଖି ୧୮ ହଜାର ମେଟ୍ରିକ୍ ଟନ୍ ୟୁରିଆ ସାର ଆବଶ୍ୟକ କରୁଛନ୍ତି । ହେଲେ ଯୁଦ୍ଧ ସ୍ଥିତିରେ ୟୁରିଆ ଟାର୍ଗେଟ ୧୦ରୁ ୧୨ ହଜାର ମେଟ୍ରିକ୍ ଟନ୍ ମଧ୍ୟରେ ସୀମିତ ରଖାଯାଇଛି ।
ଆହୁରି ପଢନ୍ତୁ-ସାଇବର ଅପରାଧୀଙ୍କ ନୂଆ ଫଣ୍ଡା ‘ସେକ୍ସଷ୍ଟ୍ରକ୍ସନ’: ଜେଲ ଭୟ ଦେଖାଇ ଟଙ୍କା ଅସୁଲ, ଟାଗେର୍ଟରେ ଟିନ୍-ଏଜର ଏବଂ ବୟସ୍କ ଗୋଷ୍ଠୀ
ଅନ୍ୟପଟେ ୨୦୨୫-୨୬ ବର୍ଷର ଟାର୍ଗେଟଠାରୁ ୨୦୨୬-୨୭ ବର୍ଷର ଟାର୍ଗେଟରେ ନାନୋ ୟୁରିଆ ପରିମାଣକୁ ବଢ଼ାଯାଇଛି । ୟୁରିଆ ଉପରୁ ନିର୍ଭରଶୀଳତା କମାଇବାକୁ ଏଭଳି ପଦକ୍ଷେପ ନିଆଯାଇଥିବା କୁହାଯାଇଛି । ଉଲ୍ଲେଖଯୋଗ୍ୟ, ୨୦୨୫-୨୬ ବର୍ଷରେ ତିହିଡ଼ି ବ୍ଲକରେ ନାନୋ ୟୁରିଆ ଟାର୍ଗେଟ ଥିଲା ୨୧୨୦ ଲିଟର । ଏଥର ହୋଇଛି ୩୦୦୦ ଲିଟର । ଏହିକ୍ରମରେ ଭଦ୍ରକ ବ୍ଲକରେ ୨୫୧୦ରୁ ୩୧୩୫, ବାସୁଦେବପୁର ବ୍ଲକରେ ୩୧୦୫ରୁ ୪୦୦୫, ଚାନ୍ଦବାଲି ବ୍ଲକରେ ୩୧୪୭ରୁ ୪୨୦୦, ଧାମନଗର ବ୍ଲକରେ ୧୮୧୦ରୁ ୨୬୦୦, ଭଣ୍ଡାରିପୋଖରୀ ବ୍ଲକରେ ୧୮୭୦ରୁ ୨୨୦୦, ବନ୍ତ ବ୍ଲକରେ ୨୦୨୮ରୁ ୨୮୬୦ ଲିଟର ନାନୋ ୟୁରିଆ ବୃଦ୍ଧି କରାଯାଇଛି । ଅପରପକ୍ଷେ ସାର ସଙ୍କଟର ସମ୍ମୁଖୀନ ହେବାକୁ କୃଷି ବିଭାଗ ଅଧ୍ୟାଦେଶ ଭଳି ଚିଠି ଜାରି କରିଛି । ଚାଷୀମାନେ ଅଧିକୃତ ବିକ୍ରେତାଙ୍କଠାରୁ ଆଧାର ମାଧ୍ୟମରେ ଓଟିପି ଦେଇ ସାର କିଣୁଥିବା ବେଳେ ସତର୍କ ରହିବାକୁ ପରାମର୍ଶ ଦେଇଛି । ଅସାଧୁ ସାର କାରବାର ରୋକିବାକୁ ପିଇଓଏସ୍ ମେସିନ୍ରୁ ବାହାରୁ ଥିବା ସ୍ଲିପ୍ ମାଗିବାକୁ କହିଛି ।
