ନୂଆଦିଲ୍ଲୀ,୮।୫: ଭାରତର ‘ଅପରେସନ୍ ସିନ୍ଦୂର’ ପରେ ପାକିସ୍ତାନ ହୋଇପଡିଛି ବିକଳ। ବୁଧବାର ରାତିରେ ଜମ୍ମୁ-କଶ୍ମୀରରୁ ନେଇ ଗୁଜରାଟର କଚ୍ଛ ପର୍ଯ୍ୟନ୍ତ ପ୍ରାୟ ୧୫ଟି ସହର ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା। ହେଲେ ତା’ର ଏହି ଷଡଯନ୍ତ୍ର ବିଫଳ ହୋଇଥିଲା। ଭାରତର ଏୟାର ଡିପେନ୍ସ ସିଷ୍ଟମ ଏସ୍-୪୦୦ ପାକିସ୍ତାନ ମିସାଇଲକୁ ଆକାଶରେ ହିଁ କରିଦେଇଥିଲା ନିଷ୍କ୍ରିୟ। ଏହାପରେ ପାକିସ୍ତାନର ଏୟାର ଡିଫେନ୍ସ ସିଷ୍ଟମ HQ-9 କୁ ଡ୍ରୋନ୍ ମାଡ଼ କରି ଧ୍ବଂସ କରିଦେଇଥିଲା।
ଉଲ୍ଲେଖନୀୟ ଯେ, ଏସ୍-୪୦୦ ଏୟାର ଡିଫେନ୍ସ ସିଷ୍ଟମ ବର୍ତ୍ତମାନ ଦୁନିଆରେ ସବୁଠାରୁ ଶକ୍ତିଶାଳୀ ବାୟୁ ପ୍ରତିରକ୍ଷା ପ୍ରଣାଳୀ। ଏହାକୁ ‘ସୁଦର୍ଶନ ଚକ୍ର’ ଭାବରେ ନାଁ ଦିଆଯାଇଛି। ଭାରତ ଏହି ସିଷ୍ଟମକୁ ନିଜର ପ୍ରମୁଖ ପ୍ରତିରକ୍ଷା ସହଯୋଗୀ ଋଷଠାରୁ କିଣିଥିଲା। ନିଜର ନାଁ ଅନୁସାରେ ଏସ୍-୪୦୦ ସିଷ୍ଟମ ୪୦୦ କିଲୋମିଟର ଦୂରରେ ଥିବା ବିପଦକୁ ରୋକିବାରେ ସକ୍ଷମ। ସେଭଳି ଏହା ୬୦୦ କିଲୋମିଟର ଦୂର ପର୍ଯ୍ୟନ୍ତ ଟାର୍ଗେଟକୁ ମଧ୍ୟ ଟ୍ରାକ୍ କରିପାରେ। ଭାରତ ଏପର୍ଯ୍ୟନ୍ତ ଏଭଳି ୪ଟି ସିଷ୍ଟମ ମୁତୟନ କରିଛି। ଏହାର ଗୋଟିଏ ସ୍କ୍ବାର୍ଡନ ଜମ୍ମୁ-କଶ୍ମୀର ଓ ପଞ୍ଜାବର ସୁରକ୍ଷା ପାଇଁ ପଠାନକୋଟ୍ରେ ମୁତୟନ କରାଯାଇଛି। ସେଭଳି ଦ୍ବିତୀୟଟି ରାଜସ୍ଥାନ ଓ ଗୁଜରାଟର ରଣନୈତିକ କ୍ଷେତ୍ରକୁ କଭର କରୁଛି।
ସେଭଳି ପାକିସ୍ତାନର ଏୟାର ଡିଫେନ୍ସ ସିଷ୍ଟମକୁ ନଷ୍ଟ କରିବାରେ ଇସ୍ରାଏଲର ହାର୍ପି ଡ୍ରୋନ୍ ମଧ୍ୟ ମୁତୟନ କରାଯାଇଥିଲା। ହାର୍ପିକୁ ରାଡାର ସିଷ୍ଟମ ଉପରେ ହମଲା କରିବା ପାଇଁ ପ୍ରସ୍ତୁତ କରାଯାଇଥିଲା। ଏହି ଡ୍ରୋନ୍ରେ ଏକ ଖାସ୍ ଟ୍ରାକର ରହିଥାଏ, ଯାହାକି ରେଡିଏସନ୍କୁ ଟ୍ରାକ୍ କରି ନିଜର ଟାର୍ଗେଟ ନିଜେ ଖୋଜି ନେଇଥାଏ। ଏହାପରେ କରିଥାଏ ଜୋରଦାର ପ୍ରହାର। ଏହା ଯେ କୌଣସି ଦେଶର ଫ୍ରିକ୍ବେଏନ୍ସିକୁ ସଠିକ୍ ଭାବରେ ଟାର୍ଗେଟ କରିପାରେ। କେବଳ ସେତିକି ନୁହେଁ ହାର୍ପି ଡ୍ରୋନ୍ ଲଗାତାର ୯ ଘଣ୍ଟା ପର୍ଯ୍ୟନ୍ତ କାମ କରିପାରେ।
