ନୂଆଦିଲ୍ଲୀ ୦୫/୦୫: ପହଲ୍ଗାମ ଆତଙ୍କି ଆକ୍ରମଣ ଘଟଣା ପରେ ଏବେ ଆହୁରି ସକ୍ରିୟ ହୋଇ ଉଠିଛନ୍ତି ପାକିସ୍ତାନୀ ହ୍ୟାକର୍ସ । ସାଇବର ଆକ୍ରମଣ ଜରିଆରେ ଭାରତୀୟ ୟୁଜରଙ୍କୁ ସେମାନେ ଟାର୍ଗେଟ କରୁଛନ୍ତି । ଲୋକଙ୍କୁ ଅନ୍ଲାଇନ ଠକେଇ ଜାଲରେ ଫସାଇବା ଲକ୍ଷ୍ୟରେ ଏଭଳି ଟାର୍ଗେଟ କରାଯାଉଛି । କମ୍ପ୍ୟୁଟର, ଲ୍ୟାପଟପ୍ ଏବଂ ଫୋନ ଗୁଡ଼ିକୁ ଏହି ହ୍ୟାକର୍ସ ଟାର୍ଗେଟ କରୁଛନ୍ତି । ମିଡିଆ ରିପୋର୍ଟ ମୁତାବକ, ଟ୍ରାନ୍ସପରେଣ୍ଟ ଟ୍ରାଇବ ନାମକ ପାକିସ୍ତାନି ହ୍ୟାକର୍ସ ଗ୍ରୁପ କ୍ରିମସନ ର୍ୟାଟ ନାମକ ମାଲ୍ୱେୟାରକୁ ପ୍ରସାର କରି ଲୋକଙ୍କୁ ସମସ୍ୟାରେ ପକାଇବାକୁ ଜୋରଦାର ଉଦ୍ୟମ କରୁଛି । ସରକାରୀ ଫାଇଲ୍ ଭଳି ଅବିକଳ ଦେଖାଯାଉଥିବା ପିଡିଏଫ୍ ଫାଇଲ ଏହି ହ୍ୟାକର ମାନେ ପଠାଉଛନ୍ତି । ଏଥିରେ ଫିସିଂ ଲିଙ୍କ୍ ରହୁଛି ।
ପହଲଗାମ ଆତଙ୍କି ଆକ୍ରମଣ ଅପ୍ଡେଟ୍ ଶୀର୍ଷକ ଏହି ଫାଇଲ ଲୋକଙ୍କ ନିକଟକୁ ପଠାଯାଉଛି । ଏହି ଫାଇଲ ଖୋଲିବା ପରେ ସିଷ୍ଟମରୁ ଜରୁରୀ ସୂଚନା ହ୍ୟାକର୍ସ ଚୋରି କରି ନେଉଛନ୍ତି । ଏଥିରେ ପାସୱାର୍ଡ, ବ୍ୟାଙ୍କ ନେଣଦେଣ ଭଳି ଜରୁରୀ ସୂଚନା ସାମିଲ ରହିଛି । ହ୍ୟାକର୍ସ ସନ୍ଦିଗ୍ଧ ସଫ୍ଟୱେର ବ୍ୟବହାର କରି ଭାଇରସ, ୱାର୍ମ, ଟ୍ରୋଜାନ ଏବଂ ରାନସମୱେର ଛାଡୁଛନ୍ତି । ଫୋନ, ଲ୍ୟାପଟପ୍ ଏବଂ କମ୍ପ୍ୟୁଟର ଗୁଡ଼ିକୁ ଅକାମୀ କରି ଫାଇଦା ନେବା ସେମାନଙ୍କ ଲକ୍ଷ୍ୟ ରହୁଛି । ଫିସିଙ୍ଗ ଆଟାକ ସାଇବର ଆକ୍ରମଣ ଦୁନିଆରେ ଠକାମିରେ ସବୁଠାରୁ ବେଶି ମାତ୍ରାରେ ବ୍ୟବହାର ହେଉଛି । ଏହା ଦ୍ୱାରା ସାଇବର ଅପରାଧୀ ମାନେ ୟୁଜରଙ୍କ ପାସୱାର୍ଡ ଏବଂ କ୍ରେଡିଟ କାର୍ଡ ନମ୍ବର ଭଳି ସୂଚନା ଚୋରାଇ ନେଉଛନ୍ତି । ଅନ୍ୟ ପଟେ ପାସୱାର୍ଡ ଆଟାକ ଭଳି ଟୁଲ ବ୍ୟବହାର କରି ସଫ୍ଟୱେର ଜରିଆରେ ପାସୱାର୍ଡ ଚୋରି କରି ସିଷ୍ଟମକୁ ଆକାମୀ କରାଯାଉଥିବା ଘଟଣା ମଧ୍ୟ ସାମ୍ନାକୁ ଆସିଛି ।
ସନ୍ଦିଗ୍ଧ ଇମେଲ କିମ୍ବା ଏସ୍ଏମ୍ଏସ୍ ଜରିଆରେ ଅନଲାଇନ ଠକେଇ କରୁଛନ୍ତି ସାଇବର ଅପରାଧି । ଲଟେରୀ, ଇମେଲ, ବ୍ୟାଙ୍କ ଆକାଉଣ୍ଟ ଅପଡେଟ କରାଇବା ବାହାନାରେ ମଧ୍ୟ ସେମାନେ ଲୋକଙ୍କୁ ସମସ୍ୟେରେ ପକାଉଛନ୍ତି । ଏଭଳି ସ୍ଥିତିରେ ସାଇବର ଆକ୍ରମଣକାରୀଙ୍କ ଠାରୁ ବର୍ତ୍ତିବାକୁ ହେଲେ ଜରୁରୀ ଡାଟାର ବ୍ୟାକଅପ ବନାଇବା ଆବଶ୍ୟକ । ସୋସିଆଲ ସାଇଟ୍ସ, ନେଟ୍ ବ୍ୟାଙ୍କିଙ୍କ ଭଳି ସମ୍ବେଦନଶୀଳ ପ୍ରସଙ୍ଗରେ ଭିନ୍ନ ଭିନ୍ନ ଷ୍ଟ୍ରଙ୍ଗ ପାସୱାର୍ଡ ବ୍ୟବହାର କରନ୍ତୁ । ପାସୱାର୍ଡକୁ ବିଭିନ୍ନ ସମୟରେ ବଦଳାଇବା ମଧ୍ୟ ଆବଶ୍ୟକ । ପବ୍ଲିକ ପ୍ଲେସରେ ନିଜ ଫୋନକୁ ୱାଇଫାଇରେ ସଂଯୋଗ କରିବାଠାରୁ ଦୂରେଇ ରୁହନ୍ତୁ । ୱାଇଫାଇରେ ବ୍ୟାଙ୍କିଙ୍ଗ ସହ ଜଡ଼ିତ କୌଣସି କାମ କରନ୍ତୁ ନାହିଁ । କୌଣସି ସନ୍ଦିଗ୍ଧ ଇମେଲ, ମେସେଜ, ଫୋନ ଏବଂ ଭିଡିଓକଲର ଜବାବ ଦିଅନ୍ତୁ ନାହିଁ । ବ୍ରାଉଜର, ଅପରେଟିଂ ସିଷ୍ଟମ ଏବଂ ସଫ୍ଟୱେରକୁ ନିରନ୍ତର ଭିତ୍ତିରେ ଅପଡେଟ କରନ୍ତୁ । ଅଜଣା ଏବଂ ଭରସା ପାଉନ ଥିବା ଲିଙ୍କ୍ ଉପରେ କ୍ଲିକ୍ କରିବା ଠାରୁ ଦୂରେଇ ରୁହନ୍ତୁ ।
ଡିଭାଇସରେ ଆଣ୍ଟି ଭାଇରସ ସଫ୍ଟୱେର, ଯାଞ୍ଚ ହୋଇ ନ ଥିବା ଆପ୍ ଡାଉନଲୋଡରୁ ବର୍ତ୍ତିବା, ଭର୍ଚୁଆଲ ପ୍ରାଇଭେଟ ନେଟୱର୍କ ବ୍ୟବହାର, ଟୁ ଫାକ୍ଟର ଅଥେଣ୍ଟିକେସନ ଭଳି ଦିଗ ଗୁଡ଼ିକୁ ଧ୍ୟାନରେ ରଖନ୍ତୁ । ମେ ପହିଲାରେ ଆସିଥିବା ଏକ ରିପୋର୍ଟ ମୁତାବକ, ପାକିସ୍ତାନି ସାଇବର ହ୍ୟାକର୍ସ ମାନେ ଭାରତୀୟ ସରକାରୀ ସଂସ୍ଥା ଏବଂ ଅଫିସ ଗୁଡ଼ିକୁ ଟାର୍ଗେଟ କରୁଛନ୍ତି । ଅଦ୍ୟାବଧି ୧୦ ଲକ୍ଷରୁ ଉଦ୍ଧ୍ୱର୍ ସାଇବାର ଆଟାକ ଏମାନଙ୍କ ଦ୍ୱାରା ହୋଇଥିବା ଆକଳନ କରାଯାଇଛି । ଏମାନଙ୍କ ଟାର୍ଗେଟରେ ପ୍ରତିରକ୍ଷା, ଶିକ୍ଷା, ଟେଲିକମ, ପରିବହନ ଭଳି କ୍ଷେତ୍ର ସାମିଲ ରହିଛି । ଅଧିକାଂଶ ସାଇବର ଆକ୍ରମଣ ପାକିସ୍ତାନ ସହ ଜଡ଼ିତ ରହିଛି । ଅନ୍ୟ ପଟେ ବାଂଲାଦେଶ, ମରୋକା ଏବଂ ମଧ୍ୟ ପ୍ରାଚ୍ୟ ଦେଶ ଗୁଡ଼ିକରୁ ମଧ୍ୟ ଭାରତ ଉପରେ ସାଇବର ଆକ୍ରମଣ ହେଉଛି । ଜାତୀୟ ସୁରକ୍ଷାକୁ ବାଧାପ୍ରାପ୍ତ କରିବାକୁ ଏମାନେ ଏଭଳି କାଣ୍ଡ ଭିଆଉଛନ୍ତି । ମେ ପହିଲାରେ ଏମାନେ ଆର୍ମି ସ୍କୁଲ ଏବଂ ଏୟାରଫୋର୍ସ ୱେବସାଇଟ ହ୍ୟାକ କରିବାକୁ ଚେଷ୍ଟା କରିଥିଲେ । ୨୮ ଏପ୍ରିଲ ପରଠୁ ହ୍ୟାକିଂ ଘଟଣା ବୃଦ୍ଧି ହୋଇଛି ।
