ତିହିଡ଼ି, ୨୩/୧୦ : ଆସନ୍ତା ଅକ୍ଟୋବର ୩୧ ତାରିଖରେ ଦୀପାବଳି। ଏହି ଦିନ ଓଡ଼ିଆଙ୍କ ଚିରାଚରିତ ପର୍ବ ଭାବେ ଗାଁ ଗଣ୍ଡାରୁ ପିଠା ପଣା କରି ବଡ଼ ବଡୁଆଙ୍କୁ ଘର ଆଗ ଛକରେ ଡାକିଥାନ୍ତି ପରିବାର ଲୋକେ । ଏକ ସଙ୍ଗରେ କାଉଁରିଆ କାଠିକୁ ଜଳାଇ ସପରିବାରେ ସାହିପଡ଼ିଶା ମିଶି ଡାକନ୍ତି ବଡ଼ ବଡୁଆ ହୋ ଅନ୍ଧାରରେ ଆସ ଦୀପାବଳି ଆଲୋକ ଦେଖି ଆମକୁ ଆଲୋକିତ କର । ଏହା ଓଡ଼ିଶାର ଏକ ବଡ଼ ପର୍ବ । କିନ୍ତୁ ଦୀପାବଳି ପୂର୍ବରୁ ଗାଁ ହାଟରେ ବଡ଼ ବଡୁଆଙ୍କୁ ଡାକିବା ପାଇଁ ଆଉ କାଉଁରିଆ କାଠି ମିଳୁନାହିଁ । କାରଣ ଆଉ ନଳିତା ଚାଷ ପୂର୍ବ ଭଳି ଗାଁର ଚାଷୀ କରୁନାହାନ୍ତି । ସମସ୍ତେ ଧାନ ଓ ପରିବା ଚାଷ ପାଇଁ ମୁହାଁଇଛନ୍ତି । ଯେଉଥିପାଇଁ ଚଳିତ ଦୀପାବଳିରେ ଗାଁ ଗଣ୍ଡାରେ ବଡ଼ବଡୁଆଙ୍କୁ ଡାକିବାପାଇଁ କାଉଁରିଆ କାଠି ବା ନଳିତା କାଠି ମିଳୁନାହିଁ । ଗୋଟିଏ କାଠିକୁ ଟଙ୍କାକରେ ବିକ୍ରି ହେଉଛି । ଟଙ୍କାକରେ କିଲେ ଚାଉଳ ସରକାର ଦେଉଥିଲାବେଳେ ଏବେ ତାହା ମାଗଣା ହୋଇଯାଇଛି । କିନ୍ତୁ ଟଙ୍କାକରେ ଖଣ୍ଡିଏ କାଉଁରିଆ କାଠି ତାହା ପୁଣି ପୂର୍ବ ପୁରୁଷଙ୍କୁ ଡାକିବାକୁ ବିକ୍ରିହେବା ଚର୍ଚ୍ଚାର ବିଷୟ ହୋଇଛି ।
ଭଦ୍ରକ ଜିଲ୍ଲା ତିହିଡ଼ି ବ୍ଲକରେ ନଳିତା ଚାଷର ପ୍ରସାର ପାଇଁ ବ୍ୟାପକ ଭିତ୍ତିଭୂମି ଥିଲେ ମଧ୍ୟ ତ୍ରୁଟିପୂର୍ଣ୍ଣ ବ୍ୟବସ୍ଥା ଯୋଗୁ ଏହି ଚାଷର ବିକାଶ ଆଶାନୁରୂପ ହୋଇପାରୁ ନାହିଁ । ଜଣାଯାଏ ତିହିଡ଼ି ବ୍ଲକର ବୋଡ଼କ, ତଳଗୋପବିନ୍ଧା, ବିଲଣା, ଦେଉଳା, ମାଙ୍କଡ଼କୋଲା, କୁବେରା, ବାରୋ, ଈଶ୍ୱରପୁର, କାଁପଡା, ବାହାବଳପୁର, ମାଟିଆସାହି ଆଦି ଅଞ୍ଚଳରେ ନଳିତା ଚାଷ ପାଇଁ ବ୍ୟାପକ ଭିତ୍ତିଭୂମି ରହିଛି । ତିହିଡ଼ି ବ୍ଲକର ଏହି ସବୁ ଅଞ୍ଚଳ ଦେଇ ରେବ, ଗେଙ୍ଗୁଟୀ, ମନ୍ତେଇ, କୁଣ୍ଡି, ସାଳନ୍ଦୀ ଆଦି ନଦୀ ବହିଯାଇଥିବାରୁ ନଦୀ କୂଳରେ ଚାଷୀମାନେ ନଳିତା ଚାଷ କରି ନିଜର ଗୁଜୁରାଣ ମେଣ୍ଟାଇ ଥାନ୍ତି । ପ୍ରତିବର୍ଷ ଏହି ସବୁ ଅଞ୍ଚଳରୁ ନଳିତା ଚାଷ ହୋଇ ଟନ ଟନ ଝୋଟ ଆମଦାନୀ ହୋଇଥାଏ । ଚାଷୀମାନେ ଏହି ଝୋଟ ରପ୍ତାନୀ କରି ଅର୍ଥନୈତିକ କ୍ଷେତ୍ରରେ ସୁଦୃଢ ହୋଇପାରନ୍ତି । ବିଶେଷ କରି ତିହିଡ଼ି ଅଞ୍ଚଳର ଝୋଟ ଧାନମଣ୍ଡଳଠାରେ ଥିବା ଝୋଟ କଳକୁ ଯାଏ । କିନ୍ତୁ ଏବେ ତାହା ବନ୍ଦ ହୋଇଯାଇଛି ।
ତିହିଡ଼ି ବ୍ଲକର ୨୧ ହଜାର ହେକ୍ଟର ଚାଷ ଜମି ମଧ୍ୟରୁ ପ୍ରତିବର୍ଷ ୨ ହଜାର ହେକ୍ଟରରୁ ଅଧିକ ଚାଷ ଜମିରେ ନଳିତା ଚାଷ କରାଯାଉଥିଲା । ତେବେ ସରକାରୀ ପ୍ରୋତ୍ସାହନ ଅଭାବରୁ ଏବେ ତାହା ୫୦ ରୁ ୬୦ ହେକ୍ଟର ଚାଷ ଜମିକୁ ଖସି ଆସିଲାଣି । ଚାଷୀମାନଙ୍କର ସମସ୍ୟାକୁ ଦୂର କରିବା ପାଇଁ କୃଷି ବିଭାଗ ନାରାଜ । ନଳିତା ଚାଷ ସମୟରେ ଚାଷୀମାନଙ୍କୁ ଉପଯୁକ୍ତ ବିହନ, ବୈଷୟିକ କୌଶଳ ଓ ଆବଶ୍ୟକ ପ୍ରୋତ୍ସାହନ ଯୋଗାଇ ଦିଆଯାଉ ନଥିବା ନେଇ ଚାଷୀମାନଙ୍କ ପକ୍ଷରୁ ଅଭିଯୋଗ ହେଉଛି । ଅନ୍ୟ ପକ୍ଷରେ ଲୋକେ କେବଳ ଧାନଚଷ ଓ ପନିପରିବା ଚାଷକୁ ଗୁରୁତ୍ୱ ଦେଉଥିବାରୁ ତିହିଡ଼ି ବ୍ଲକରେ କେବଳ ନଳିତା ଚାଷ ନୁହଁ ଆଖୁ ଚାଷ ମଧ୍ୟ ବୁଡ଼ିଯିବାକୁ ବସିଲାଣି । ବ୍ଲକର ତଳଗୋପବିନ୍ଧା ଓ କୁବେରା ପଞ୍ଚାୟତରେ ହେଉଥିବା ଆଖୁଚାଷ ଧିରେ ଧିରେ ବୁଡିଯାଉଛି ।
