ନୂଆଦିଲ୍ଲୀ,୧୩/୧୧: କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସ୍ଏଫ୍)ର ପ୍ରଥମ ମହିଳା ବାଟାଲିୟନକୁ ସ୍ୱରାଷ୍ଟ୍ର ମନ୍ତ୍ରଣାଳୟ ମଙ୍ଗଳବାର ମଞ୍ଜୁରି ଦେଇଛି । ଏହି ପ୍ରସ୍ତାବିତ ବାଟାଲିୟନ୍ରେ ୧ ହଜାରରୁ ଅଧିକ ମହିଳା କର୍ମୀ ରହିବେ । ସମସ୍ତ ପ୍ରକାର ସୁରକ୍ଷା ସଂକ୍ରାନ୍ତ କାର୍ଯ୍ୟରେ ଏମାନଙ୍କୁ ମୁତୟନ କରାଯିବ । ଭିଆଇପିଙ୍କ ସୁରକ୍ଷା, ବିମାନବନ୍ଦର, ଦିଲ୍ଲୀ ମେଟ୍ରୋ, ଶିଳ୍ପ ସୁରକ୍ଷା ଆଦି ପାଇଁ ସେମାନଙ୍କୁ ମୁତୟନ କରାଯିବ । ସିଆଇଏସ୍ଏଫ୍ର ଉପ ମହାନିର୍ଦ୍ଦେଶକ ଦୀପକ ବର୍ମା କହିଛନ୍ତି, ମହିଳା ବାଟାଲିୟନ ଗଠନ ହେବା ଦ୍ୱାରା ଅଧିକରୁ ଅଧିକ ମହତ୍ତ୍ୱାକାଂକ୍ଷୀ ଯୁବତୀ ସିଆଇଏସ୍ଏଫ୍ରେ ସାମିଲ ହେବା ପାଇଁ ଆଗ୍ରହ ପ୍ରକାଶ କରିବେ । ଏହାଦ୍ୱାରା ମହିଳାଙ୍କୁ ଏକ ନୂଆ ପରିଚୟ ମିଳିବ ।
ସୂଚନା ମୁତାବକ, ନୂଆ ବାଟାଲିୟନର ମୁଖ୍ୟାଳୟ ନିମନ୍ତେ ଶୀଘ୍ର ନିଯୁକ୍ତି, ପ୍ରଶିକ୍ଷଣ ଓ ସ୍ଥାନ ଚୟନ ଲାଗି ପଦକ୍ଷେପ ନିଆଯାଇଛି । ଅଧିକାଂଶ ମହିଳାଙ୍କୁ କମାଣ୍ଡୋ ତାଲିମ ଦିଆଯିବ । ଉଲ୍ଲେଖଯୋଗ୍ୟ, କେନ୍ଦ୍ରୀୟ ବଳରେ କେବଳ ମହିଳାଙ୍କ ବାଟାଲିୟନ ବନାଇବା ପ୍ରସ୍ତାବ ୫୩ତମ ସିଆଇଏସ୍ଏଫ୍ ଦିବସ ସମାରୋହ ଅବସରରେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ନିର୍ଦ୍ଦେଶ ଅନୁସାରେ ଆରମ୍ଭ ହୋଇଥିଲା । ସିଆଇଏସ୍ଏଫ୍ରେ ପ୍ରାୟ ୧ ଲକ୍ଷ ୯୦ ହଜାର କର୍ମୀ ଅଛନ୍ତି, ଯେଉଁମାନଙ୍କ ମଧ୍ୟରେ ୭% ମହିଳା । ୧୨ ବାଟାଲିୟନ ବିଶିଷ୍ଟ ସିଆଇଏସ୍ଏଫ୍ରେ ବର୍ତ୍ତମାନ ଗୋଟିଏ ବି ମହିଳା ବାଟାଲିୟନ୍ ନାହିଁ । ସିଆଇଏସ୍ଏଫ୍ର ପ୍ରଥମ ମହିଳା ବାଟାଲିୟନରେ ୧,୦୨୫ ମହିଳାଙ୍କୁ ନିଯୁକ୍ତି ଦିଆଯିବ । ଏମାନଙ୍କୁ କମାଣ୍ଡୋ ତାଲିମ ପ୍ରଦାନ କରାଯିବ, ଯଦ୍ଦ୍ୱାରା ଜରୁରି ସମୟରେ ମହିଳା ବାଟାଲିୟନର ଏହି କମାଣ୍ଡୋମାନେ ସୁରକ୍ଷା ଦାୟିତ୍ୱ ସମ୍ଭାଳି ପାରିବେ । ଅଧିକାରୀଙ୍କ ମୁତାବକ, ସିଆଇଏସ୍ଏଫ୍ରେ ଏବେ ବି ମହିଳା ଅଛନ୍ତି । ମହିଳା କମାଣ୍ଡୋ ଅଛନ୍ତି । କିନ୍ତୁ ସେମାନଙ୍କର ନିର୍ଦ୍ଦିଷ୍ଟ ବାଟାଲିୟନ୍ ନାହିଁ । ତେଣୁ ନୂଆ ନିଯୁକ୍ତି ପ୍ରକ୍ରିୟା ଆରମ୍ଭ କରାଯାଇ ମହିଳା ବାଟାଲିୟନ ଛିଡ଼ା କରାଯିବ । ଆସନ୍ତା ବର୍ଷ ସୁଦ୍ଧା ସିଆଇଏସ୍ଏଫ୍କୁ ଏହାର ପ୍ରଥମ ମହିଳା ବାଟାଲିୟନ ମିଳିବା ନେଇ ଆଶା କରାଯାଉଛି ।
