ନୂଆଦିଲ୍ଲୀ,୨୯/୦୮: ଦେଶରେ ଯଦି ଆଜି ସାଧାରଣ ନିର୍ବାଚନ ହୁଏ ତେବେ ବିଜେପି ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ ବା ଏନ୍ଡିଏର ୩୨୪ ଆସନରେ ଜିତିବ । ବିଜେପି ଆସନ ମଧ୍ୟ ୨୪୦ରୁ ବଢି ୨୬୦ରେ ପହଞ୍ଚିବ । ଦଳ ବହୁମତ ମ୍ୟାଜିକ ନମ୍ବର ୨୭୨ରୁ ତଳେ ରହିବ । ବ୍ୟାକ୍ ଟୁ ବ୍ୟାକ୍ ୩ଟି ପ୍ରମୁଖ ବିଧାନସଭା ନିର୍ବାଚନରେ ବିଜେପିର ବିପୁଳ ବିଜୟ ପରେ 'ମୁଡ୍ ଅଫ୍ ଦି ନେସନ୍' ସର୍ଭେରୁ ଏହି ପରିଣାମ ଆସିଛି । ସର୍ଭେ ଅନୁଯାୟୀ ଯଦି ଆଜି ନିର୍ବାଚନ ହେବ ତେବେ ଏନ୍ଡିଏ ୩୨୪ ଓ କଂଗ୍ରେସ ନେତୃତ୍ୱାଧୀନ ଇଣ୍ଡି ମେଣ୍ଟ ୨୦୮ ଆସନରେ ଜିତିବ ।
ଜୁଲାଇ ୧ରୁ ଅଗଷ୍ଟ ୧୪ ମଧ୍ୟରେ ଇଣ୍ଡିଆ ଟୁଡ଼େ ସିଭୋଟର 'ମୁଡ୍ ଅଫ୍ ଦି ନେସନ୍' ସର୍ଭେ ହୋଇଥିଲା । ସମସ୍ତ ଲୋକସଭା ନିର୍ବାଚନ କ୍ଷେତ୍ରରୁ ପ୍ରାୟ ୫୪ ହଜାର ୭୮୮ ଜଣ ଏହି ସର୍ଭେରେ ସାମିଲ ହୋଇଥିଲେ । ସେହିପରି ସି-ଭୋଟର୍ ରେଗୁଲାର୍ ଟ୍ରାକର୍ ତଥ୍ୟରୁ ଅତିରିକ୍ତ ୧, ୫୨,୦୩୮ ଲୋକଙ୍କ ମତାମତ ନିଆଯାଇଥିଲା । ରିପୋର୍ଟ ପାଇଁ ମୋଟ୍ ୨ ଲକ୍ଷ ୦୬ ହଜାର ୮୨୬ ଲୋକ ସାମିଲ ହୋଇଥିଲେ ।
ଯଦି ଆଜି ନିର୍ବାଚନ ହୁଏ ମେଣ୍ଟ ଆଧାରରେ କହିବାକୁ ଗଲେ ସର୍ଭେ ମୁତାବକ ଏନ୍ଡିଏ ମେଣ୍ଟକୁ ୪୬.୭%, ଇଣ୍ଟି ମେଣ୍ଟକୁ ୪୦.୯% ଏବଂ ଅନ୍ୟକୁ ୧୨.୪% ଭୋଟ ସେୟାର ମିଳିବ । ୨୦୨୪ ଲୋକସଭା ନିର୍ବାଚନରେ ଏନଡିଏକୁ ୪୩% ଭୋଟ ମିଳିଥିବା ବେଳେ ଇଣ୍ଡି ମେଣ୍ଟକୁ ୪୦% ମିଳିଥିଲା ।
ଅଧିକ ପଢନ୍ତୁ...ଆମେରିକା ଟାରିଫ୍ ବିବାଦ ଭିତରେ ଜାପାନରେ ପ୍ରଧାନମନ୍ତ୍ରୀ ମୋଦି; ଟୋକିଓରେ ଭବ୍ୟ ସ୍ୱାଗତ
ଆଜି ନିର୍ବାଚନ ହେଲେ କାହାକୁ ମିଳିବ କେତେ ସିଟ୍ ? ସର୍ଭେରେ ଏହା ପଚାରାଯାଇଥିଲା କି, ଆଜି ଲୋକସଭା ନିର୍ବାଚନ ହେଲେ କେଉଁ ଦଳକୁ କେତେ ସିଟ୍ ମିଳିବ। ବିଜେପିକୁ ୨୬୦, କଂଗ୍ରେସକୁ ୯୭ ଏବଂ ଅନ୍ୟ ଦଳକୁ ୧୮୬ ଆସନ ମିଳିବା ନେଇ ଅନୁମାନ କରାଯାଇଥିଲା । ୨୦୨୪ ଲୋକସଭା ନିର୍ବାଚନରେ ବିଜେପିକୁ ୨୪୦, କଂଗ୍ରେସକୁ ୯୯ ସିଟ୍ ମିଳିଥିଲା । ଫେବୃଆରୀରେ ହୋଇଥିବା ସର୍ଭେ ଅନୁସାରେ ବିଜେପିକୁ ୨୮୧ ଟି ଏବଂ କଂଗ୍ରେସକୁ ୭୮ଟି ସିଟ୍ ମିଳିବ ବୋଲି ଅନୁମାନ କରାଯାଇଥିଲା । ଦଳ ଅନୁସାରେ ଭୋଟ ସେୟାର କଥା କହିଲେ ବିଜେପି ଖାତାରେ ୪୦.୬%, କଂଗ୍ରେସ ଖାତାରେ ୨୦.୮%, ଏବଂ ଅନ୍ୟାନ୍ୟ ଦଳକୁ ୩୮.୬% ଭୋଟ ମିଳିଥାନ୍ତା ।
କହି ରଖୁଛୁ କି, ୨୦୨୪ ଲୋକସଭା ନିର୍ବାଚନରେ ବିଜେପି ୫୪୩ ଆସନରୁ କେବଳ ୨୪୦ ଆସନରେ ଜିତିଥିଲା । ସରକାର ଗଠନ ପାଇଁ ମ୍ୟାଜିକ୍ ନମ୍ବର ୨୭୨ ଠାରୁ ବିଜେପି ପାଖରେ ୩୨ ଆସନ କମ୍ ଥିଲା । ତେବେ ଏନ୍ଡିଏ ସହଯୋଗୀଙ୍କ ସମର୍ଥନରେ ନରେନ୍ଦ୍ର ମୋଦି ୨୯୩ ଆସନ ସହ ପୁଣିଥରେ ସରକାର ଗଠନ କରିଥିଲେ ।
