ଭୁବନ,୨୭।୪  ମାନସିକ ବିକାରଗ୍ରସ୍ତ ଝିଅର କାଠ ଫାଳିଆ ମାଡରେ ବୃଦ୍ଧ ମାଆର ମୃତ୍ୟୁ ଘଟିଛି । ଏପରି ଅଭାବନୀୟ ଘଟଣା ଭୁବନ ଥାନା ଅନ୍ତର୍ଗତ ମଝପାଳ ଗ୍ରାମର ଦେଖିବାକୁ ମିଳିଛି । ମୃତକ ଜଣକ ହେଲେ ଦୁର୍ଗାବତୀ ଦାଶ। 

 ମଝିପାଳ ଗ୍ରାମର ସ୍ବର୍ଗତ ବିଭୁତି ଭୁଷଣ ଦାଶ ସ୍ତ୍ରୀ ଦୁର୍ଗାବତୀ ଦାଶ ଓ ବିବାହିତ ମାନସିକ ବିକାରଗ୍ରସ୍ତ ଝିଅ   ଆଶାଲତା ଦାଶ ଘରେ ରୁହନ୍ତି ।  ଦୁର୍ଗାବତୀଙ୍କ ଏକମାତ୍ର ପୁଅ ଆଲୋକ ଦାଶ ନିଜର ପରିବାର ନେଇ ତାଳଚେରରେ ପ୍ରାଇଭେଟ କଂପାନୀରେ କାର୍ଯ୍ୟ କରନ୍ତି ।ପୁଅ ଆଲୋକ ମାଆକୁ ନିଜ ପାଖକୁ ନେବାକୁ ଚାହିଁଥିଲେ ବି ମାନସିକ ବିକାରଗ୍ରସ୍ତ ଝିଅକୁ ଛାଡି ଯାଇନଥାଲେ ।ତେବେ  ମାଆ ଦୁର୍ଗାବତୀଙ୍କ ସହିତ ପୁଅ ଆଲୋକ ଓ ଅନ୍ୟ ଭଉଣୀମାନେ ପ୍ରତିଦିନ ଫୋନ ଯୋଗେ ଯୋଗାଯୋଗ କରୁଥିଲେ । କିନ୍ତୁ ଆଜି ସକାଳେ ମାଆ ଦୁର୍ଗାବତୀଙ୍କ ସହିତ ଯୋଗାଯୋଗ ହୋଇପାରିନଥିଲା । ସନ୍ଦେହ ହେବାରୁ ଗ୍ରାମବାସୀଙ୍କ ସହଯୋଗ ଲୋଡି ଖବରର ସତ୍ୟାସତ୍ୟ ଜାଣିବାକୁ ପାଇଥିଲେ । ତେବେ ଘଟଣା ସମ୍ପର୍କରେ ଭୁବନ ପୋଲିସ ଖବର ପାଇ ଘଟଣାସ୍ଥଳରେ ପହଞ୍ଚିଥିଲେ । ଭୁବନ ପୋଲିସ ମୃତଦେହକୁ ଜବତ କରିବା ସହିତ ଢେଙ୍କାନାଳ ସାଇଣ୍ଟଫିକ୍ ଦଳକୁ ଖବର କରିଥିଲେ । ଘଟଣାସ୍ଥଳରେ ସାଇଣ୍ଟିଫିକ ଟିମ ପହଞ୍ଚି ତଦନ୍ତ କରି ଶବକୁ ବ୍ୟବଚ୍ଛେଦ ପାଇଁ ଭୁବନ ମେଡିକାଲକୁ ପଠାଇଛନ୍ତି । ଭୁବନ ପୋଲିସ ମାନସିକ ବିକାରଗ୍ରସ୍ତ ଝିଅକୁ ଅଟକ ରଖି ତଦନ୍ତ ଚଳାଇଛି ।