ନୂଆଦିଲ୍ଲୀ,୧୦/୦୫: ମା କେବଳ ସେ ନୁହେଁ ଯିଏ ଜନ୍ମ ଦେଇଛି, ବରଂ କାହାର ଭବିଷ୍ୟତ ଗଢ଼ୁଥିବା ଏବଂ କାହାର ଜୀବନକୁ ସୁରକ୍ଷିତ ରଖୁଥିବା ଯେକୌଣସି ମହିଳା ମାତୃତ୍ବର ଉପାଧୀ ପାଇପାରିବେ। ମାତୃ ଦିବସରେ, ଆମେ ସେହିପରି ଜଣେ ପ୍ରେରଣାଦାୟୀ ମହିଳାଙ୍କ କାହାଣୀ କହିବାକୁ ଯାଊଛୁ। ସେ ହେଉଛନ୍ତି ମହିଳା କନଷ୍ଟେବଳ ଜ୍ୟୋତି ତିୱାରୀ, ଯିଏକି ନିଜ ଜୀବନକୁ ବାଜିରେ ଲଗାଇ ଶହ ଶହ ନିରୀହ ଝିଅଙ୍କ ଜୀବନକୁ ନଷ୍ଟ ହେବାରୁ ରକ୍ଷା କରିଥିଲେ। ବର୍ଷ ବର୍ଷ ଧରି, ଜ୍ୟୋତି ତିୱାରୀ ବାଲ୍ୟବିବାହକୁ ରୋକିବା ପାଇଁ ଏକ ସଂଗ୍ରାମ ଚଳାଇ ଆସୁଛନ୍ତି, ଯେଉଁଠି ଆର୍ଥିକ ବୋଝ, ସାମାଜିକ ଚାପ ଏବଂ ଭୟଙ୍କର ପରିସ୍ଥିତି ଯୋଗୁଁ ଛୋଟ ବୟସରେ ଯୁବତୀମାନଙ୍କୁ ବାଲ୍ୟବିବାହ ପାଇଁ ବାଧ୍ୟ କରାଯାଉଥିଲା।
ବନ୍ଦ କରିଛନ୍ତି ୫୦୦ ରୁ ଅଧିକ ବାଲ୍ୟବିବାହ:
ମହିଳା କନଷ୍ଟେବଳ ଜ୍ୟୋତି ତିୱାରୀ ଆଜି ପର୍ଯ୍ୟନ୍ତ ୫୦୦ ରୁ ଅଧିକ ବାଲ୍ୟବିବାହକୁ ରୋକିଛନ୍ତି। ଏହା ବ୍ୟତୀତ, ସେ ୨୦୦ ରୁ ଅଧିକ ପିଲାଙ୍କୁ ଶିଶୁ ଶ୍ରମିକ ହେବାରୁ ଉଦ୍ଧାର କରିଛନ୍ତି ଏବଂ ସେମାନଙ୍କୁ ସ୍କୁଲକୁ ପଠାଇବାରେ ସାହାଯ୍ୟ କରିଛନ୍ତି। ଏହି କାରଣରୁ ଜ୍ୟୋତିଙ୍କ ପ୍ରୟାସରେ ଯେଉଁ ପିଲାମାନଙ୍କର ଶୈଶବ ଏବଂ ଭବିଷ୍ୟତ ସୁରକ୍ଷିତ ହୋଇଛି, ସେମାନେ ଆଜି ତାଙ୍କୁ ଜଣେ ମାଆର ମାନ୍ୟତା ଦେଉଛନ୍ତି।
ଅଧିକ ପଢ଼ନ୍ତୁ: ‘ଭୋଟ ଦିଅ ବିବାହ କରାଇବୁ’… ହରିୟାଣା ବିଧାୟିକାଙ୍କ ଯୁବବର୍ଗଙ୍କୁ ମ୍ୟାରେଜ୍ ଗ୍ୟାରେଣ୍ଟି
୨୦୦ ରୁ ଅଧିକ ଶିଶୁ ଶ୍ରମିକଙ୍କୁ ଉଦ୍ଧାର କରିଛନ୍ତି:
ଜ୍ୟୋତି ତିୱାରୀ କୁହନ୍ତି ଯେ ଯେତେବେଳେ ସେ ଶିଶୁ ଶ୍ରମିକରେ ନିୟୋଜିତ ପିଲାମାନଙ୍କୁ ଉଦ୍ଧାର କରୁଥିଲେ, ସେମାନଙ୍କର ହୃଦୟ ବିଦାରକ କାହାଣୀ ଶୁଣି ତାଙ୍କ ଆଖିରେ ଲୁହ ଆସିଯାଇଥିଲା। କିଛି ପିଲା ସେମାନଙ୍କ ପିତାଙ୍କ ମୃତ୍ୟୁ ପରେ ପରିବାର ପ୍ରତିପୋଷଣ ପାଇଁ କାମ କରୁଥିଲେ ତ ଆଉ କିଛି ପିଲା ଅନାଥ ହୋଇ କେବଳ ପେଟ ପୋଷିବା ପାଇଁ କାମ କରିବାକୁ ବାଧ୍ୟ ହେଉଥିଲେ। ଅନେକ ପିଲା ହୋଟେଲ, ଢାବା ଏବଂ କାରଖାନାରେ କାମ କରୁଥିବା ଦେଖିବାକୁ ମିଳିଥିଲା। ଏପରି ପିଲାମାନଙ୍କୁ ଉଦ୍ଧାର କରି, ସେ କେବଳ ସେମାନଙ୍କୁ ଶିଶୁ ଶ୍ରମିକରୁ ମୁକ୍ତ କରିନଥିଲେ ବରଂ ସ୍କୁଲରେ ସେମାନଙ୍କର ନାଁ ଲେଖାଇ ପିଲାଙ୍କ ଭବିଷ୍ୟତ ଆଡ଼କୁ ମଧ୍ୟ ବାଟ ଦେଖାଇ ଦେଇଥିଲେ।
ଅନେକ ଥର, ଗାଁ ଲୋକଙ୍କ ବିରୋଧ ଏବଂ ଆକ୍ରମଣର ସମ୍ମୁଖୀନ ହୋଇଥିଲେ ଜ୍ୟୋତି:
ଜ୍ୟୋତି କୁହନ୍ତି ଯେ, ଆଜି ମଧ୍ୟ ସେ ସମୟ ସମୟରେ ସେହି ପିଲାମାନଙ୍କ ସହିତ ସାକ୍ଷାତ କରିଆସୁଛନ୍ତି। ପିଲାମାନେ ତାଙ୍କ ସହିତ ନିଜ ମାଆ ଭଳି ସମାନ ସମ୍ମାନ ଏବଂ ସ୍ନେହରେ ବ୍ୟବହାର କରନ୍ତି। ସେହିପରି, ଜ୍ୟୋତି ସେମାନଙ୍କୁ ତାଙ୍କ ନିଜ ଛୁଆ ପରି ଭଲ ପାଆନ୍ତି। ସେ କୁହନ୍ତି ଯେ ଏହି ପିଲାମାନଙ୍କୁ ସେମାନଙ୍କର ଶିକ୍ଷା ଗ୍ରହଣ କରିବା ଏବଂ ଜୀବନରେ ଉନ୍ନତି କରିବା ଦେଖିବା ଠାରୁ ତାଙ୍କୁ ଆଉ କିଛି ବଡ଼ ଆନନ୍ଦ ଦେଇନପାରେ।
ଆହୁରି ପଢ଼ନ୍ତୁ: ମୁଁ ମୁଖ୍ୟମନ୍ତ୍ରୀ ଭାବେ ପ୍ରତିଜ୍ଞା କରୁଛି...ଦୁର୍ନୀତିକୁ ଜମା ପ୍ରଶୟ ଦେବିନି, ରାଜକୋଷର ଟଙ୍କାଟିଏ ବି ଅପବ୍ୟବହାର ହେବନି
ଜ୍ୟୋତି ତିୱାରୀଙ୍କ ପାଇଁ ବାଲ୍ୟବିବାହ ରୋକିବା କେବେବି ସହଜ କାମ ନଥିଲା। ଅନେକ ସମୟରେ, ସେ ଦୂରଦୂରାନ୍ତ ଗାଁରେ ବିଳମ୍ବିତ ରାତିରେ ବାଲ୍ୟବିବାହ ହେଉଥିବାର ରିପୋର୍ଟ ପାଉଥିଲେ। ଏପରି ପରିସ୍ଥିତିରେ, ସେ ଏବଂ ତାଙ୍କ ଦଳ ରାତି ଅଧରେ ଗାଁରେ ପହଞ୍ଚିବାକୁ ଧାଇଁ ଆସୁଥିଲେ। ଅନେକ କ୍ଷେତ୍ରରେ, ସେମାନଙ୍କୁ ଗାଁ ଲୋକଙ୍କ ବିରୋଧ ଏବଂ ଆକ୍ରମଣର ସମ୍ମୁଖୀନ ହେବାକୁ ପଡୁଥିଲା।
ଅନେକ ସମ୍ମାନରେ ହୋଇଛନ୍ତି ସମ୍ମାନୀତ:
ଜ୍ୟୋତି କହିଛନ୍ତି ଯେ ସେ ଅନେକ ଥର ଜୀବନ ପ୍ରତି ବିପଦପୂର୍ଣ୍ଣ ଆକ୍ରମଣର ସମ୍ମୁଖୀନ ହୋଇଥିଲେ, ତଥାପି ସେ ଭୟରେ ପଛକୁ ହଟିବା ଶିଖି ନଥିଲେ। ତାଙ୍କର ଏକମାତ୍ର ଉଦ୍ଦେଶ୍ୟ ଥିଲା ଯେ କୌଣସି ନିରୀହ ଯୁବତୀ କମ୍ ବୟସରେ ବିବାହ ବନ୍ଧନରେ ଆବଦ୍ଧ ହୋଇ ତାର ଭବିଷ୍ୟତକୁ ନଷ୍ଟ ନକରୁ। ତାଙ୍କର ସାହସିକତା ଏବଂ ଆଦର୍ଶ କାର୍ଯ୍ୟକୁ ସ୍ୱୀକୃତି ଦେଇ, ପୋଲିସ ବିଭାଗ ତାଙ୍କୁ ସର୍ବୋଚ୍ଚ ପୁରସ୍କାର, "ରୁସ୍ତମଜୀ ପୁରସ୍କାର" ରେ ସମ୍ମାନିତ କରିଛି। ଏହି ସମ୍ମାନକୁ ତାଙ୍କ ସଂଘର୍ଷ, ସମର୍ପଣ ଏବଂ ସେବା ମନୋଭାବର ପ୍ରତୀକ ଭାବରେ ବିବେଚନା କରାଯାଏ।
ପ୍ରମେୟ ପୃଷ୍ଠାର ପ୍ରମୁଖ ଖବର: Tamil Nadu CM: ତାମିଲନାଡୁରେ 'ବିଜୟ' ଯୁଗ...୧୯୬୭ ପରେ ପ୍ରଥମ ଅଣଦ୍ରାବିଡ଼ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ଥାଲାପତି
