- ବିସିପିପିଇଆର, ସହରାଞ୍ଚଳ ପରିବର୍ତ୍ତନ ପାଇଁ ନୀତି ଆୟୋଗର ସମର୍ଥନ ଲୋଡ଼ିଲେ ମୁଖ୍ୟମନ୍ତ୍ରୀ
- ଭୁବନେଶ୍ୱରକୁ ଦେଶର ଏକ ବେଞ୍ଚମାର୍କ ସହର ଭାବରେ ବିକଶିତ କରିବାକୁ ପରାମର୍ଶ ଦେଲେ ନୀତି ଆୟୋଗ ଉପାଧ୍ୟକ୍ଷ
- ନୀତି ଆୟୋଗ ସହିତ ସହଭାଗୀତା ଓଡ଼ିଶାର ବିକାଶ ଦୃଷ୍ଟିକୋଣର ଚାବିକାଠି
ଭୁବନେଶ୍ୱର,୨୪।୧ : ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଲୋକସେବା ଭବନରେ ନୀତି ଆୟୋଗର ଉପାଧ୍ୟକ୍ଷ ସୁମନ ବେରୀ, ନୀତି ଆୟୋଗର ସଦସ୍ୟ ଡକ୍ଟର ଅରବିନ୍ଦ ବୀରମଣି ସାକ୍ଷାତ କରିଛନ୍ତି। ଓଡ଼ିଶା ସରକାର ଏବଂ ନୀତି ଆୟୋଗ ମଧ୍ୟରେ ସହଭାଗୀତାକୁ ନେଇ ଆଲୋଚନା କରିଥିଲେ।ଏଥିରେ ଓଡ଼ିଶାର ବିକାଶ ପ୍ରାଥମିକତା, ଚାଲୁଥିବା ସଂସ୍କାର ଏବଂ ରାଜ୍ୟ ସରକାର ଓ ନୀତି ଆୟୋଗ ମଧ୍ୟରେ ଭବିଷ୍ୟତର ସହଯୋଗ ଉପରେ ଗୁରୁତ୍ୱାରୋପ କରାଯାଇଥିଲା।
ଭିତ୍ତିଭୂମି ଏବଂ ସଂଯୋଗୀକରଣ, ବିଶେଷକରି ରାସ୍ତା, ଜଳସେଚନ, ବିଦ୍ୟୁତ୍ ଏବଂ ଲଜିଷ୍ଟିକ୍ସ କ୍ଷେତ୍ରରେ ଓଡ଼ିଶା ଦ୍ୱାରା ହୋଇଥିବା ଗୁରୁତ୍ୱପୂର୍ଣ୍ଣ ଅଗ୍ରଗତି ଉପରେ ମୁଖ୍ୟମନ୍ତ୍ରୀ ଆଲୋକପାତ କରିଥିଲେ। ଯାହା ଶିଳ୍ପ ପ୍ରସାର ଏବଂ ଗ୍ରାମୀଣ ଅଭିବୃଦ୍ଧିକୁ ପରିଚାଳିତ କରୁଛି ବୋଲି କହିଥିଲେ। ସେ ସ୍ଥାନୀୟ ଆର୍ଥିକ ସମ୍ଭାବନା ସହିତ ସମନ୍ୱିତ ଦକ୍ଷତା ବିକାଶ ମାଧ୍ୟମରେ ଏମ୍ଏସ୍ଏମ୍ଇଗୁଡ଼ିକୁ ସୁଦୃଢ଼ କରିବା, ଉତ୍ପାଦନ କ୍ଲଷ୍ଟର ବିକାଶ କରିବା, ନିବେଶକ ଆକର୍ଷିତ କରିବା ଏବଂ ନିଯୁକ୍ତି ସୃଷ୍ଟି କରିବା ପ୍ରତି ରାଜ୍ୟର ଆଭିମୁଖ୍ୟ ଉପରେ ମୁଖ୍ୟମନ୍ତ୍ରୀ ଗୁରୁତ୍ୱାରୋପ କରିଥିଲେ।
ଭୁବନେଶ୍ୱର-କଟକ-ପୁରୀ-ପାରାଦୀପ ଅର୍ଥନୈତିକ କ୍ଷେତ୍ର (BCPPER)ର ବିକାଶ ପାଇଁ ମୁଖ୍ୟମନ୍ତ୍ରୀ ନୀତି ଆୟୋଗର ସମର୍ଥନ ଲୋଡ଼ିଥିଲେ। ଯାହାକୁ ରାଜ୍ୟର ଅଭିବୃଦ୍ଧି ଏବଂ ଦ୍ରୁତ ସହରୀକରଣର ଏକ ପ୍ରମୁଖ ଇଞ୍ଜିନ ଭାବରେ ପରିକଳ୍ପିତ କରାଯାଇଛି। ସେ ଗୁରୁତ୍ୱାରୋପ କରିଥିଲେ ଯେ ପ୍ରାୟ ୯୦ ଟି ପ୍ରାଥମିକତା ପ୍ରକଳ୍ପ ସହିତ ପ୍ରସ୍ତାବିତ ଅର୍ଥନୈତିକ କ୍ଷେତ୍ର ଓଡ଼ିଶାର ସହରାଞ୍ଚଳ ଏବଂ ଶିଳ୍ପ ପରିଦୃଶ୍ୟକୁ ପରିବର୍ତ୍ତନ କରିବାର ସମ୍ଭାବନା ରଖିଛି ।
ମୁଖ୍ୟମନ୍ତ୍ରୀ କହିଥିଲେ ଯେ ଜାତୀୟ ସଂସ୍କାର ଏଜେଣ୍ଡା ସହିତ ସମନ୍ୱୟ ରଖି ଓଡ଼ିଶା ସରକାର ବ୍ୟବସାୟ କରିବାର ସହଜତା ଏବଂ ନିବେଶ ସୁବିଧାକୁ ସର୍ବୋଚ୍ଚ ପ୍ରାଥମିକତା ପ୍ରଦାନ କରାଯାଉଛି । ନୀତି ଆୟୋଗ ସହିତ ସହଭାଗୀତା ଓଡ଼ିଶାର ଅନ୍ତର୍ଭୁକ୍ତିମୂଳକ ଅଭିବୃଦ୍ଧି, ଶିଳ୍ପ ବିକାଶ ଏବଂ ନାଗରିକଙ୍କ ପାଇଁ ଉନ୍ନତ ଜୀବନଶୈଳୀ ପ୍ରତି ଯାତ୍ରାକୁ ଆହୁରି ତ୍ୱରାନ୍ୱିତ କରିବ ।
ରାଜ୍ୟର ବିକାଶ ପଥକୁ ପ୍ରଶଂସା କରି ଶ୍ରୀ ବେରୀ ମୁଖ୍ୟମନ୍ତ୍ରୀଙ୍କ ନେତୃତ୍ୱ ଏବଂ ଓଡ଼ିଶା ସରକାରଙ୍କ ସଂସ୍କାରମୁଖୀ ଆଭିମୁଖ୍ୟକୁ ପ୍ରଶଂସା କରିଥିଲେ। ସେ ଉଲ୍ଲେଖ କରିଥିଲେ ଯେ ଆର୍ଥିକ ଦୃଷ୍ଟିରୁ ଓଡ଼ିଶା ଶ୍ରେଷ୍ଠ ପ୍ରଦର୍ଶନକାରୀ ରାଜ୍ୟ ମଧ୍ୟରୁ ଗୋଟିଏ ଭାବରେ ଉଭା ହୋଇଛି। ଶିଳ୍ପ ବିକାଶ ଏବଂ ନିବେଶ ପାଇଁ ଏକ ଦୃଢ଼ ଏବଂ ସ୍ଥିର ବ୍ୟବସାୟିକ ପରିବେଶ ସୃଷ୍ଟି କରିଛି। ରାଜ୍ୟରେ ଶିଳ୍ପାୟନକୁ ପ୍ରଭାବିତ କରିପାରୁଥିବା ପ୍ରଭାବଶାଳୀ ସଂସ୍କାର ପାଇଁ ନିଆଯାଇଥିବା ପଦକ୍ଷେପ ପାଇଁ ସେ ରାଜ୍ୟକୁ ପ୍ରଶଂସା କରିଥିଲେ।
ଯେ ଦକ୍ଷ ସ୍ୱେରେଜ ପରିଚାଳନା, ପରିଷ୍କାର ପରିଚ୍ଛନ୍ନତା, ସବୁଜ ସ୍ଥାନ ଏବଂ ସ୍ଥାୟୀ ସହରାଞ୍ଚଳ ଭିତ୍ତିଭୂମି ଉପରେ ଗୁରୁତ୍ୱ ଦେଇ ଭୁବନେଶ୍ୱର ଏକ ମଡେଲ ସହର ଭାବରେ ବିଶେଷ ଧ୍ୟାନ ଦେବା ଉଚିତ ବୋଲି ଶ୍ରୀ ବେରୀ ମତ ଦେଇଥିଲେ । ଭୁବନେଶ୍ୱରକୁ ଦେଶର ଏକ ମାନଦଣ୍ଡ ସହର ଭାବରେ ବିକଶିତ କରିବା ପାଇଁ ପରାମର୍ଶ ଦେଇଥିଲେ।
ସେହିପରି ଡକ୍ଟର ଅରବିନ୍ଦ ବୀରମାଣି ମଧ୍ୟ ରାଜ୍ୟର ଭବିଷ୍ୟତବାଦୀ ନୀତି ଏବଂ ଅନ୍ତର୍ଭୁକ୍ତିମୂଳକ ଏବଂ ସ୍ଥାୟୀ ଅଭିବୃଦ୍ଧି ପ୍ରତି ଏହାର ପ୍ରତିବଦ୍ଧତାକୁ ପ୍ରଶଂସା କରିଥିଲେ । ବୈଠକରେ ମୁଖ୍ୟ ସଚିବ ଅନୁ ଗର୍ଗ, ଅର୍ଥ ବିଭାଗର ପ୍ରମୁଖ ସଚିବ ସଞ୍ଜିବ ମିଶ୍ର, ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଶାସ୍ୱତ ମିଶ୍ର ଏବଂ ଉନ୍ନୟନ କମିଶନର ଡି.କେ. ଶ୍ରୀ ସିଂହ ପ୍ରମୁଖ ଯୋଗ ଦେଇଥିଲେ।
ଆହୁରି ପଢନ୍ତୁ : ଜନଗଣନା ପାଇଁ ଆଗୁଆ ହୋଇପାରେ ପଞ୍ଚାୟତ ନିର୍ବାଚନ : ମନମୋହନ ସାମଲ
