ଭୁବନେଶ୍ୱର,୨୩/୧୦ : ଏଥର ‘ଦାନା’ ମୁକାବିଲାରେ କମାଲ ଦେଖାଇବ ଅତ୍ୟାଧୁନିକ ଉଦ୍ଧାର ଯାନ ‘ଆଡଭାନ୍ସ ରେସ୍କ୍ୟୁ ଟେଣ୍ଡର୍’ । ୧୦୦ରୁ ଅଧିକ ଉଦ୍ଧାର ସରଞ୍ଜାମ ଥିବା ଏହି ସ୍ୱତନ୍ତ୍ର ଦମକଳ ଗାଡି଼କୁ ବାତ୍ୟାସ୍ଥଳକୁ ପଠାଯିବ । ଯାନରେ ଥିବା ଜେନେରେଟର୍, କଟର୍ ମେସିନ୍, କଂକ୍ରିଟ କଟର୍, ଲାଇଭ୍ ଜ୍ୟାକେଟ୍, ଲାଇଭ୍ ବଏ, ସ୍କୁବା, ଲାଇଫ ଲାଇନ୍, କୁମ୍ବିଂ ଟୁଲ୍ସ ଯୋଗେ ଉଦ୍ଧାର କାର୍ଯ୍ୟ ତ୍ୱରାନ୍ୱିତ ହେବ । ଏହାଛଡ଼ା ବାତ୍ୟା ପ୍ରଭାବିତ ସ୍ଥଳରେ ବିପନ୍ନଙ୍କୁ ଆଲୋକ ଦେଖାଇବ ଅଗ୍ନିଶମ ବାହିନୀର ଟେଲିସ୍କୋପିଂ ଲାଇଟ୍ ଯାହାକି, ଆସ୍କା ଲାଇଟ୍ଠୁ ଆହୁରି ଶକ୍ତ । ଝଡ଼ ତୋଫାନ ମାଡ଼କୁ ସହି ଏହା ଚତୁର୍ଦିଗକୁ ଆଲୋକିତ କରିବ । ରାତି ଅଧରେ ବି ଉଦ୍ଧାର ଜାରି ରହିବ ।
ଜାପାନରୁ ଆସିଥିବା ଉଚ୍ଚଶକ୍ତି ସମ୍ପନ୍ନ ଆଉଟ୍ ବୋଟ୍ ମେସିନ୍ (ଓବିଏମ୍) ଥିବା ୫୦ରୁ ଅଧିକ ପାୱାର ବୋଟ୍ ଝଡ଼ ତୋଫାନରେ ବି ପାଣିଘେରରୁ ବିପନ୍ନଙ୍କୁ ଉଦ୍ଧାର କରିବ । ୧୭୮ଟି ଅଗ୍ନିଶମ ଦଳ ବିଭିନ୍ନ ଜିଲ୍ୱାରେ ଦାୟିତ୍ୱ ନେଇଛନ୍ତି । ୪୦ଟି ଅଗ୍ନିଶମ ଦଳ ବାଟରେ ଅଛନ୍ତି । ଆଜି ସେମାନେ ସମ୍ବେଦନଶୀଳ ସ୍ଥାନରେ ପହଞ୍ଚିଯିବେ । ବରମୁଣ୍ଡାସ୍ଥିତ ଓଡ଼ିଶା ଅଗ୍ନିଶମ ଓ ବିପର୍ଯ୍ୟୟ ରେସପନ୍ସ ଏକାଡେମୀ ପଡି଼ଆରେ ବାତ୍ୟା ମୁକାବିଲା ପାଇଁ ପ୍ରସ୍ତୁତି ଆରମ୍ଭ ହୋଇଛି । ମଙ୍ଗଳବାର ସନ୍ଧ୍ୟାରେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ସେଠାରେ ପହଞ୍ଚି ଅଗ୍ନିଶମ ବାହିନୀର ବାତ୍ୟା ପ୍ରସ୍ତୁତିର ସମୀକ୍ଷା କରିଥିଲେ । ଅଗ୍ନିଶମ ଡିଜି ଡ. ସୁଧାଂଶୁ ଷଡ଼ଙ୍ଗୀଙ୍କଠାରୁ ଟିକିନିଖି ସବୁ ପଚାରି ବୁଝିଥିଲେ । ଶ୍ରୀ ଷଡ଼ଙ୍ଗୀ କହିଥିଲେ, ସରକାରଙ୍କ ଜିରୋ କାଜୁଆଲ୍ଟି ଆହ୍ୱାନକୁ ସଫଳ କରିବାକୁ ଲକ୍ଷ୍ୟ ରଖିଛୁ । ୧୪ଟି ଜିଲ୍ଲାରେ ଅଗ୍ନିଶମ ବାହିନୀ ସଜାଗ ଅଛନ୍ତି ।
