ଭୁବନେଶ୍ୱର,୨୫/୧୦: ଚଳିତ ଆର୍ଥିକ ବର୍ଷରେ ରାଜ୍ୟରେ ୩୦୦ ଶାଖା ଡାକଘର ସ୍ଥାପନ ହେବାର ଢେର ସମ୍ଭାବନା ରହିଛି । ଏ ନେଇ କେନ୍ଦ୍ର ଯୋଗାଯୋଗ ବିଭାଗ ପ୍ରସ୍ତାବ ମାଗିଛି । ବ୍ୟାଙ୍କ ସେବା ନ ଥିବା ପଞ୍ଚାୟତଗୁଡିକରେ ବ୍ୟାଙ୍କିଙ୍ଗ ସେବା ପହଞ୍ଚାଇବା ଦିଗରେ ଏଭଳି କାର୍ଯ୍ୟକ୍ରମ ଗ୍ରହଣ କରାଯିବ ।
ରାଜ୍ୟରେ ଏବେ ୮୯୧୨ ଡାକ ଘର ରହିଛି । ସେଥିମଧ୍ୟରୁ ୩୫ଟି ମୁଖ୍ୟ ଡାକଘର, ୧୧୫୦ ଉପ-ଡାକଘର, ୭୬୯୨ ଶାଖା ଡାକଘର ରହିଛି । ଏହା ମଧ୍ୟରେ ୧୨ ମୁଖ୍ୟ ଡାକଘର, ୩୭୩ ଶାଖା ଡାକଘର, ୨୯୩୬ ଶାଖା ଡାକଘର ୧୩ ମାଓ ଅଧ୍ୟୁଷିତ ଜିଲାରେ ରହିଛ । ୨୦୨୩-୨୪ରେ ୯୦୦ଶାଖା ଡାକଘର ଖୋଲିବାକୁ ଓଡ଼ିଶା ପୋଷ୍ଟାଲ ସର୍କଲ ପ୍ରସ୍ତାବ ଦେଇଥିଲା ।
ତେବେ ମନ୍ତ୍ରଣାଳୟ ୪୧୬ ଡାକଘର ପାଇଁ ମଞ୍ଜୁରି ଦେଇଥିଲା । ଏହି ଡାକଘରଗୁଡିକ ଏବେ କାର୍ଯ୍ୟକ୍ଷମ ହେବା ସହ ୫ କିମି ଅଞ୍ଚଳ ମଧ୍ୟରେ ବ୍ୟାଙ୍କିଙ୍ଗ ସେବା ପ୍ରଦାନ କରୁଛନ୍ତି । ଓଡ଼ିଶା ପୋଷ୍ଟାଲ ସର୍କଲର ଡେପୁଟି ଡିଭିଜିନାଲ ମ୍ୟାନେଜର ସତ୍ୟବାଦୀ ବିଶ୍ୱାଳ କହିଛନ୍ତି, ରାଜ୍ୟରେ ୩୦୦ ଶାଖା ଡାକଘର ସ୍ଥାପନ କରିବାକୁ କେନ୍ଦ୍ର ସରକାରଙ୍କୁ ପ୍ରସ୍ତାବ ଦିଆଯାଇଛି । ଏହା ଦ୍ୱାରା ୩୦ ଜିଲାରେ ବ୍ୟାଙ୍କ ସେବା ନ ଥିବା ଗ୍ରାମ ପଞ୍ଚାୟତଗୁଡିକ ଉପରେ ଧ୍ୟାନ ରଖାଯିବ ।
ନୂଆ ଶାଖା ଡାକଘର ସହ ୫ ନୂଆ ପୋଷ୍ଟାଲ ସବ୍ ଡିଭିଜନ ସ୍ଥାପନ ହେବ । ଏଥିସହ ୯୮୩ ପଦବୀ ସୃଷ୍ଟି କରାଯିବ । ଫଳରେ ବ୍ୟାଙ୍କ ସେବା ନ ଥିବା ଗ୍ରାମଗୁଡିକୁ ଉନ୍ନତ ଭାବେ ସେବା ଯୋଗାଣ ହୋଇପାରିବ । ସେହିଭଳି ଡାକ ଘର ରପ୍ତାନି କେନ୍ଦ୍ର (ଡିଏନ୍କେ) ଖୋଲିବା ମଧ୍ୟ ଯୋଜନା ରହିଛି । ରପ୍ତାନିକାରୀ ସେମାନଙ୍କ ସାମଗ୍ରୀ ବିଦେଶକୁ ପହଞ୍ଚାଇବାରେ ଏହା ୱାନ୍ଷ୍ଟପ ସଲ୍ୟୁଶନ ଭାବେ କାମ କରିବ । ରାଜ୍ୟରେ ଏଭଳି ୩୫ଟି ସେଣ୍ଟର ରହିଛି । ୨୦୨୨ ଅକ୍ଟୋବରରେ ପ୍ରଥମେ ଏଭଳି କେନ୍ଦ୍ର ରାଜ୍ୟରେ ସ୍ଥାପନ କରାଯାଇଥିଲା ।
ଏବେ ଡିଏନ୍କେଗୁଡିକ ୫୫୪ କନସାଇନମେଣ୍ଟ ବୁକିଂ କରିଛନ୍ତି । ଏହି ସାମଗ୍ରୀ ସବୁ ଅଷ୍ଟ୍ରେଲିଆ, ନର୍ୱେ, ଫିନଲ୍ୟାଣ୍ଡ, ୟୁକେ, ୟୁଏସ୍ଏ, ଗ୍ରୀସ, ସାଉଦିଆରବ, କାନାଡା, ମେକ୍ସିକୋ, ବେଲ୍ଜିୟମ, ଇଟାଲି, ଜର୍ମାନୀ, ସ୍ୱିଡେନ, ନ୍ୟୁଜିଲାଣ୍ଡ, ଫ୍ରାନ୍ସ, ସ୍ପେନ୍, ନାଇଜେରିଆ ଏବଂ ନେପାଳ ଭଳି ରାଜ୍ୟକୁ ପଠାଯାଇଛି ।
ଡିଏନ୍କେ ଦ୍ୱାରା ଶିଳ୍ପୀ, କାରିଗର, ସ୍ଥାନୀୟ ଉତ୍ପାଦନକାରୀ, ଏମ୍ଏସ୍ଏମ୍ଇଗୁଡିକୁ ରପ୍ତାନି ଡକ୍ୟୁମେଣ୍ଟେସନ ପୂରଣ କରିବାକୁ ପଡ଼ିବ । ସେମାନଙ୍କୁ ଆମଦାନି ଏବଂ ରପ୍ତାନି କୋଡ୍ ଜେନେରେଟ କରିବାକୁ ସହାୟତା କରାଯିବ ବୋଲି ଶ୍ରୀ ବିଶ୍ୱାଳ କହିଛନ୍ତି ।
ଉଲ୍ଲେଖଯୋଗ୍ୟ, ରାଜ୍ୟରେ ଏବେ ୪୩୭୩ ବ୍ୟାଙ୍କ ସେବା ନ ଥିବା ପଞ୍ଚାୟତ ରହିଛି । ବ୍ୟାଙ୍କଗୁଡିକ ଏହି ସ୍ଥାନଗୁଡିକରେ ସେବା ଯୋଗାଣ ନେଇ ଏବେ ଯାଏ ସକ୍ଷମ ହୋଇନାହାନ୍ତି । ଏହାବାଦ ଏସବୁ ସ୍ଥାନରେ ଇଣ୍ଟରନେଟ ମଧ୍ୟ ବଡ଼ ସମସ୍ୟା ଭାବେ ଉଭା ହୋଇଛି ।
