ପୁରୀ,୦୮/୦୯: ଅନ୍ତର୍ଜାତୀୟ ବାଲୁକାଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଓଡ଼ିଶାର ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକ ତଥା ଗାୟକ ଅଭିଜିତ ମଜୁମଦାରଙ୍କ ସୁସ୍ଥତା କାମନା କରି ବାଲୁକା ଚିତ୍ର ପ୍ରସ୍ତୁତ କରିଛନ୍ତି । ପୁରୀ ବେଳାଭୂମିରେ ରବିବାର ଦିନ ସେ ଏହି କଳାକୃତି ପ୍ରସ୍ତୁତ କରିଛନ୍ତି । ଏହି ବାଲୁକା ଚିତ୍ର କଳାରେ ‘ଗେଟ୍ ୱେଲ୍ ସୁନ୍ ଅଭିଜିତ ମଜୁମଦାର୍’ ବାର୍ତ୍ତା ସେ ଲେଖିଛନ୍ତି । ଏହାସହ ମହାପ୍ରଭୁ ଶ୍ରୀଜଗନ୍ନାଥଙ୍କ ପାଖରେ ଆଶୁ ଆରୋଗ୍ୟ ପ୍ରାର୍ଥନା କରୁଛୁ ବୋଲି ମଧ୍ୟ ବାଲୁକା କଳାରେ ଲେଖାଯାଇଛି । ଏହାସହ ଅଭିଜିତ ମଜୁମଦାରଙ୍କର ବାଲୁକା ଚିତ୍ର ମଧ୍ୟ ଅଙ୍କା ଯାଇଛି । ଅଭିଜିତ ଅସୁସ୍ଥ ହୋଇ ଗତ ୪ତାରିଖରୁ ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅଛନ୍ତି ।
ସ୍ୱାସ୍ଥ୍ୟ ବୁଲେଟିନ୍ରେ ସୂଚନା ଦିଆଯାଇଛି, ଏବେବି ଅଭିଜିତ୍ କୋମାରେ ଅଛନ୍ତି । ତାଙ୍କୁ ଭେଣ୍ଟିଲେସନ୍ ସପୋର୍ଟରେ ରଖାଯାଇଛି । ଷ୍ଟାଣ୍ଡାର୍ଡ ପ୍ରୋଟୋକଲ୍ ଅନୁସାରେ ତାଙ୍କୁ ଚିକିତ୍ସା କରାଯାଉଛି । ଚିକିତ୍ସା ପରେ ତାଙ୍କ କିଡ୍ନୀ ଓ ଲିଭର ସମସ୍ୟାରେ ସୁଧାର ଆସିଛି । ଏମ୍ସ ଆଇସିୟୁ ଓ ଇସିଏମ୍ଓ ସ୍ପେସାଲିଷ୍ଟ ଡା. ଶ୍ରୀକାନ୍ତ ବେହେରା ଓ ତାଙ୍କ ଟିମ୍ ଅଭିଜିତ୍ଙ୍କ ଉପରେ ନଜର ରଖିଛନ୍ତି । ଉଲ୍ଲେଖଯୋଗ୍ୟ ଯେ ଗତ ଗୁରୁବାର ଅଭିଜିତ୍ଙ୍କୁ ଏମ୍ସରେ ଭର୍ତ୍ତି କରାଯାଇଥିଲା । ସେ ନିମୋନିଆ ସହ ବହୁବିଧ ରୋଗରେ ଆକ୍ରାନ୍ତ । ତାଙ୍କର ଲିଭର୍ରେ ଗୁରୁତର ସମସ୍ୟା ଦେଖାଦେଇଥିଲା । ଉଚ୍ଚ ରକ୍ତଚାପ, ରକ୍ତ ସଂକ୍ରମଣ ସହ ସହ ଶରୀରରେ ଥାଇରଏଡ୍ କମିଯାଇଥିଲା ।
