ବଶାଖାପଟଣମ,୨୧/୦୬: ଅନ୍ତର୍ଜାତୀୟ ଯୋଗ ଦିବସ ଅବସରରେ ବଶାଖାପଟଣମ ବେଳାଭୂମିରେ ଯୋଗ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆରକେ ବିଚ୍ ଠାରୁ ଭୋଗପୁରମ ପର୍ଯ୍ୟନ୍ତ ୨୬ କିଲୋମିଟର କରିଡରରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ସେଠାରେ ୩ ଲକ୍ଷ ଲୋକ ସାମିଲ ହୋଇଛନ୍ତି । ଦୁନିଆରେ ମାନସିକ ଚିନ୍ତାରେ ପୀଡିତ ଲୋକଙ୍କ ପାଇଁ ଯୋଗ ଏକ ପଜ୍ ବଟନ୍ ହୋଇଥାଏ ବୋଲି କାର୍ଯ୍ୟକ୍ରମକୁ ସମ୍ବୋଧନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ।
୧୧ତମ ଯୋଗ ଦିବସ ଉପଲକ୍ଷେ କାର୍ଯ୍ୟକ୍ରମର ନେତୃତ୍ୱ ନେଇ ପ୍ରଧାନମନ୍ତ୍ରୀ କହିଛନ୍ତି,'' ବିଶ୍ୱକୁ ଯୋଡ଼ିଛି ଯୋଗ । ଆଜି ଦୁନିଆ କୌଣସି ନା କୌଣସି ଚିନ୍ତା ଦେଇ ଗତି କରୁଛି । ଅଶାନ୍ତି ଓ ଅସ୍ଥିରତା ବଢୁଛି । ଯୋଗରୁ ଆମକୁ ଶାନ୍ତି ଓ ଦିଗ ମିଳିଥାଏ । ଯୋଗ ଏମିତି ଏକ ପଜ ବଟନ୍, ଯାହା ମାନବତାକୁ ସନ୍ତୁଳନର ନିଶ୍ୱାସ ନେବାକୁ ଏବଂ ନିୟନ୍ତ୍ରଣକୁ ଆଣିବାରେ ସହାୟକ ହୋଇଥାଏ । ଯୋଗର ଅର୍ଥ ଯୋଡ଼ି ହେବା । ୧୧ ବର୍ଷ ପରେ ଆମେ ଦେଖୁଛୁ ଯୋଗ ଦୁନିଆର କୋଟି କୋଟି ଲୋକଙ୍କ ଜୀବନଶୈଳୀର ଅଂଶ ହୋଇଛି । ଯେବେ ଭାରତ ସଂଯୁକ୍ତ ରାଷ୍ଟ୍ର ମହାସଭାରେ ୨୧ ଜୁନ୍କୁ ଯୋଗ ଦିବସ ଭାବେ ପାଳନ କରିବାକୁ ପ୍ରସ୍ତାବ ଦେଲା । କମ୍ ସମୟରେ ୧୭୫ ଦେଶ ଭାରତକୁ ସମର୍ଥନ କଲେ । ଏହା କେବଳ ପ୍ରସ୍ତାବ ନଥିଲା ମାନବତାର ଉନ୍ନତି ପାଇଁ ସାମୂହିକ ପ୍ରୟାସ ଥିଲା ।''
ଅଧିକ ପଢନ୍ତୁ...ଅନ୍ତର୍ଜାତୀୟ ଯୋଗ ଦିବସ; ଯୋଗ କରନ୍ତୁ, ସୁସ୍ଥ ରୁହନ୍ତୁ
ପ୍ରଧାନମନ୍ତ୍ରୀ ଆହୁରି କହିଛନ୍ତି, ''ମୋତେ ଗର୍ବ ଲାଗେ ଯେବେ ଦିବ୍ୟାଙ୍ଗ ସାଥୀ ଯୋଗଶାସ୍ତ୍ର ପଢନ୍ତି । ବୈଜ୍ଞାନିକ ମହାକାଶରେ ଯୋଗ କରନ୍ତି । ଗାଁ ଗାଁରେ ଯୁବାସାଥୀ ଯୋଗ ଅଲମ୍ପିକ୍ସରେ ଭାଗ ନିଅନ୍ତି । ଅପେରା ହାଉସ୍ର ସିଡ଼ି ହେଉ କି ଏଭେରେଷ୍ଟର ଶିଖର ହେଉ ବା ସମୁଦ୍ରର ବିସ୍ତାର ସବୁ ସ୍ଥାନରୁ ଗୋଟିଏ ସନ୍ଦେଶ ଆସେ ଯୋଗ ସମସ୍ତଙ୍କର ସମସ୍ତଙ୍କ ପାଇଁ । ଯୋଗ କେବଳ ଏକ ବ୍ୟାୟାମ ନୁହେଁ ଏହା ବଞ୍ଚିବାର ଦିଗ ।''
