ହରଭଙ୍ଗା, ୧୨/୦୭(ଚିତ୍ତରଞ୍ଜନ ସିଂ): ରାଜ୍ୟ ବା ଦେଶ ବିକଶିତ ନ ଥିବା ସମୟରେ ଗାଁରୁ ସହର ଯାଏଁ ଲୋକଙ୍କ ମଧ୍ୟରେ ଯୋଗାଯୋଗର ବ୍ୟବସ୍ଥା ଡାକ ସେବା ହିଁ ଏକ ମାତ୍ର ମାଧ୍ୟମ ଥିଲା । ପୋଷ୍ଟ କାର୍ଡ଼, ଇଂଲଣ୍ଡ ଲେଟର, ଟେଲିଗ୍ରାମ, ଲ୍ୟାଣ୍ଡଫୋନ୍ ମାଧ୍ୟମରେ ଲୋକମାନଙ୍କ ମଧ୍ୟରେ ଯୋଗାଯୋଗ ହେଉଥିଲା ଏବଂ ଦେଶର ମୁଖ୍ୟ ଭୂମିକା ନିର୍ବାହ କରୁଥିଲା ମନିଅର୍ଡର । ଧିରେ ଧିରେ ଦେଶ ତଥା ରାଜ୍ୟର ବିକାଶ ହେବା ଫଳରେ ଅନେକ ଯୋଜନା ମାଧ୍ୟମରେ ସରକାରୀ କୋଠା, ସରକାରୀ କାର୍ଯ୍ୟାଳୟ ସବୁ ତିଆରି ହୋଇ ଜନସାଧାରଣଙ୍କୁ ବହୁତ ସହଜ ଓ ସୁବିଧାରେ ସେବା ଯୋଗେଇ ଦିଆ ଯାଉଛି।
ଏବେବି ଗ୍ରାମାଞ୍ଚଳ ମାନଙ୍କରେ ଡାକଘର ଉପରେ ଲୋକ ମାନେ ନିର୍ଭର କରୁଛନ୍ତି । କିନ୍ତୁ ଦୁଃଖର ବିଷୟ ଏବେ ବି ହରଭଙ୍ଗାରେ ପ୍ରାୟ ୭୦ ବର୍ଷରୁ ଉର୍ଦ୍ଧ୍ୱ ହେବ ଡାକଘର ଭଡ଼ା ଘରେ ଚାଲିଛି । କେଉଁଠି ଛୋଟ ଏକ ଭଡ଼ା ଘରେ ତ ଆଉ କେଉଁଠି ଏକ ଚାଳଛପର ଘରେ ଡାକଘର ହୋଇଛି । ଯେଉଁଠି କି ଅଫିସ ଷ୍ଟାଫଙ୍କ ସହିତ ଜଣେ ଦୁଇଜଣ ସାଧାରଣ ଲୋକ ବସିବା ପାଇଁ ମଧ୍ୟ ଜାଗା ନାହିଁ । ଅନ୍ୟ ବିଭାଗର କାର୍ଯ୍ୟାଳୟ ପାଇଁ ସରକାର ନିଜସ୍ୱ ଜାଗା ସହିତ କାର୍ଯ୍ୟାଳୟ ନିର୍ମାଣ କରିଦେଉଥିବା ବେଳେ ଡାକ ସେବା ଭଳି ଏକ ଗୁରୁତ୍ୱପୂର୍ଣ ବିଭାଗକୁ କାହିଁକି ଅଣଦେଖା କରୁଛନ୍ତି, ସେ ନେଇ ଅନେକ ପ୍ରଶ୍ନ ଉଠୁଛି।ଏବେ ମଧ୍ୟ ବିଭିନ୍ନ ବିଭାଗ ଏହି ଡାକ ଘର ଉପରେ ନିର୍ଭର କରୁଛନ୍ତି ।
ଏହି ଡାକ ମାଧ୍ୟମରେ ବିଭିନ୍ନ ସରକାରୀ ଚିଠି ପତ୍ର, ମନିଅର୍ଡର, ସବୁ ଆସିଥାଏ ଓ ଲୋକମାନେ ମଧ୍ୟ ଉତ୍ତମ ସେବା ପାଇଥାନ୍ତି । କିନ୍ତୁ ଦୁଃଖ ଓ ପରିତାପର ବିଷୟ ବ୍ଲକର ଆଡ଼େନିଗଡ଼, ଚାରିଛକ, ହରଭଙ୍ଗା, ପୁରୁଣାକଟକ, ତିଳେଶ୍ୱର, ଭଳି ଏକ ଗୁରୁତ୍ୱପୂର୍ଣ ଜାଗାମାନଙ୍କରେ ଦୀର୍ଘ ବର୍ଷ ହେବ ଡାକଘର ଭଡ଼ା ଘରେ ଚାଲିଛି । ଫଳରେ ସାଧାରଣ ଜନତାଙ୍କ ମନରେ ଅସନ୍ତୋଷ ପ୍ରକାଶ ପାଉଛି। ଏ ଦିଗରେ ଜିଲ୍ଲାପ୍ରଶାସନ ଓ ମୁଖ୍ୟ ଡାକଅଧିକାରୀ ସ୍ୱତନ୍ତ୍ର ଦୃଷ୍ଟି ଦେଇ ସରକାରୀ ଜାଗାରେ ନୂତନ ଭାବେ ସ୍ଥାୟୀ ଡାକଘର ନିର୍ମାଣ କରିବା ପାଇଁ ଅଞ୍ଚଳର ସମସ୍ତ ଜନସାଧାରଣ ଦାବି କରିଛନ୍ତି ।
