ୱାଶିଂଟନ,୧୭/୦୨: ପ୍ରକୃତି କୋପରେ ହନ୍ତସନ୍ତ ଆମେରିକାର କେଣ୍ଟକିବାସୀ । ରାସ୍ତାରେ ଆଣ୍ଠୁଏ ପାଣି । ଶକ୍ତିଶାଳୀ ଝଡ ପ୍ରଭାବରେ ୯ ଜଣଙ୍କର ମୃତ୍ୟୁ ହୋଇଛି । ମୃତ ୯ ଜଣଙ୍କ ମଧ୍ୟରେ ୮ ଜଣ କେଣ୍ଟକିର ହୋଇଥିବା ଜଣାପଡିଛି । ପ୍ରବଳ ବର୍ଷା ସାଙ୍ଗକୁ ପବନର ବେଗ ବଢିଥିଲା । ବର୍ଷା ପ୍ରଭାବରେ ନଦୀ ଜଳସ୍ତର ବୃଦ୍ଧି ପାଇବା ସହ ରାସ୍ତା ଉପରକୁ ପାଣି ମାଡି ଆସିଛି । ଫଳରେ ଲୋକ ନାହିଁ ନଥିବା ଅସୁବିଧା ଭୋଗୁଛନ୍ତି । କେଣ୍ଟକି ଗଭର୍ଣ୍ଣର ଏଣ୍ଡି ବେଶିୟର ଘରୁ ନବାହିବାକୁ ଅପିଲ୍ କରିଛନ୍ତି । ଅଦିନିଆ ଶକ୍ତିଶାଳୀ ଝଡରେ ୯ ଜଣ ପ୍ରାଣ ହରାଇଛନ୍ତି । ପାଖାପାଖି ୧୦୦୦ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଛି ।
କେଣ୍ଟକି ଗଭର୍ଣ୍ଣର ଏଣ୍ଡି ବେଶିୟର କହିଛନ୍ତି, ବନ୍ୟାରେ ସଡକରେ ଫସି ରହିଥିବା ଲୋକଙ୍କୁ ସୁରକ୍ଷିତ ଉଦ୍ଧାର କରାଯାଉଛି । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରାଜ୍ୟରେ ପ୍ରାକୃତିକ ବିପର୍ଯ୍ୟୟ ହୋଇଥିବା ନେଇ ଘୋଷଣା କରିଛନ୍ତି । ରାଜ୍ୟରେ ଲୋକଙ୍କୁ ସୁରକ୍ଷିତ ଉଦ୍ଧାର କରିବା କାର୍ଯ୍ୟ ଆରମ୍ଭ କରି ଦେଇଛନ୍ତି ଉଦ୍ଧାକାରୀ ଏଜେନ୍ସିଂ । ବର୍ଷା ପ୍ରଭାବରେ ବନ୍ୟା ସ୍ଥିତି ଉପୁଜିଥିଲା । ଏହି କାରଣରୁ ରାସ୍ତାରେ ଥିବା କାର୍ ଗୁଡିକରେ ପାଣି ପଶି ଯାଇଥିଲା । ଫଳରେ ୯ଜଣ ଲୋକଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଜଣେ ମହିଳା ତାଙ୍କର ୭ ବର୍ଷର ପିଲା ରହିଛନ୍ତି । ବାହାରକୁ ନ ବାହାରିବାକୁ ସମସ୍ତଙ୍କୁ ଅପିଲ୍ କରିଛନ୍ତି କେଣ୍ଟକି ଗଭର୍ଣ୍ଣର ।
ଗତ ଶନିବାରଠୁ ବର୍ଷା ପବନ ଆରମ୍ଭ ହୋଇଥିଲା । ଏହାପରେ ରାଜ୍ୟରେ ପାଖାପାଖି ହଜାର ଲୋକଙ୍କୁ ଉଦ୍ଧାର କରାଯାଇଥିଲା । ଶକ୍ତିଶାଳୀ ଝଡ କାରଣରୁ ୩୯ ହଜାର ଘରୁ ବିଦ୍ୟୁତ ବିଚ୍ଛେଦ ହୋଇଛି । କିଛି ସ୍ଥାନରେ ପବନର ବେଗ୍ ଅଧିକ ଥିବାରୁ ଆଗକୁ ବିଦ୍ୟୁତ କଟା ଯିବାର ସମ୍ଭାବନା ରହିଛି ।
