ଭୁବନେଶ୍ୱର, ୨୩/୧୧: ଆଜି ପ୍ରଥମାଷ୍ଟମୀ । ଘରେ ଘରେ ପୂଜା ହେଉଛନ୍ତି ବଡ଼ ସନ୍ତାନ । ଓଡ଼ିଆ ପରମ୍ପରାରେ ଏହି ପୂଜାର ବିଶେଷ ମହତ୍ତ୍ୱ ରହିଛି । ଘରର ପ୍ରଥମ ସନ୍ତାନକୁ ପଢ଼ୁଆଁ କରିବା ପାଇଁ ତାଙ୍କୁ ଷଠୀ ମାଆଙ୍କ ପାଖରେ ବନ୍ଦାପନା କରି ପୂଜାର୍ଚ୍ଚନା କରାଯାଉଛି । ଏହି ପୂଜା ପାଇଁ ଖାସ୍‌ କରି ପ୍ରସ୍ତୁତ କରାଯାଇଥାଏ ଏଣ୍ଡୁରି ପିଠା । ସେଥିପାଇଁ ଚାରିଦିଗ ଏଣ୍ଡୁରି ପିଠାର ବାସ୍ନାରେ ମହକୁଛି । 

ମାର୍ଗଶିର ମାସର ପ୍ରଥମ ଅଷ୍ଟମୀକୁ ପ୍ରଥମାଷ୍ଟମୀ କୁହାଯାଏ । ଏହି ପର୍ବ ମାମୁଁ ଘର ସହିତ ଜଡ଼ିତ । ଘରର ପ୍ରଥମ ସନ୍ତାନକୁ ପଢ଼ୁଆଁ କରିବା ଲାଗି ମାମୁ ନୂଆ ପୋଷାକ, ପିଠା, ବିଭିନ୍ନ ଫଳ ଓ ପୂଜା ସାମଗ୍ରୀ ଭଉଣୀ ଘରକୁ ନେଇ ଯାଇଥାନ୍ତି । ସେଥିପାଇଁ ବଜାରରେ ନୂଆ ବିରି, ନୂଆ ଚାଉଳ, ମୂଳା, ପିଢାରେ ଦେବା ପାଇଁ ଆଖୁ, ଗେଣ୍ଡୁଫୁଲ, ଫଳର ପସରା ମେଲିଛି ।

ଏହି ପୂଜା କେବଳ ଆମ ସମାଜରେ ନୁହେଁ, ବଡ଼ ଦେଉଳରେ ମଧ୍ୟ ପଢୁଆଁ ହୋଇଥାନ୍ତି ବଡ଼ ଠାକୁର । ଶ୍ରୀମନ୍ଦିରରେ ପରମ୍ପରା ଅନୁଯାୟୀ ପ୍ରଥମାଷ୍ଟମୀ ନୀତି ପାଳନ ସହ ଶ୍ରୀବିଗ୍ରହମାନଙ୍କୁ ପୋଢୁଆଁ କରାଯାଇଥାଏ । ବଡ଼ ଠାକୁରଙ୍କୁ ପଢୁଆଁ କରବା ପାଇଁ ତାଙ୍କ ମାମୁଁ ଘର ନିଆଳିରୁ ଭାର ଆସିଥିଲା ।