ନୂଆଦିଲ୍ଲୀ,୦୧/୦୯: ବିହାର ଏସଆଇଆର ବିରୋଧରେ ଏକାଠି ହୋଇଛନ୍ତି ବିରୋଧୀ । ବିହାରରେ ରାଜନୀତି ମାହୋଲ ଏକଦମ୍‌ କଂଗ୍ରେସମୟ ହୋଇଛି । କଂଗ୍ରେସ ନେତା ରାହୁଲ ଗାନ୍ଧୀ, ତେଜସ୍ୱୀ ଯାଦବଙ୍କ ନେତୃତ୍ୱରେ ବିହାରରେ ଅଗଷ୍ଟ ୧୭ରୁ ୧୬ ଦିନିଆ 'ଭୋଟର ଅଧିକାର ଯାତ୍ରା' ଶେଷ ହୋଇଛି । ଆଜି ଯାତ୍ରାର ଅନ୍ତିମ ଦିନ । ପାଟନାରେ ରଣ ହୁଙ୍ଗାର ଦେଇଛନ୍ତି ରାହୁଲ ଗାନ୍ଧୀ । ଶାସକ ବିଜେପିକୁ ଟାର୍ଗେଟ କରିଛନ୍ତି । ଭାରତୀୟ ଜନତା ପାର୍ଟିଠୁ ଜନତାଙ୍କୁ ସତର୍କ ରହିବାକୁ କହିଛନ୍ତି ।

ଶାସକ ବିଜେପି ଓ ନିର୍ବାଚନ ଆୟୋଗଙ୍କୁ ଟାର୍ଗେଟ୍ କରି ରାହୁଲ ଗାନ୍ଧୀ କହିଛନ୍ତି,"ଭାରତୀୟ ନିର୍ବାଚନ କମିଶନ ଆମକୁ ଭୋଟର ତାଲିକା, ଭିଡିଓଗ୍ରାଫି ଦେଉନାହାଁନ୍ତି । 'ଭୋଟ୍ ଚୋରି' ଅର୍ଥ ଆମର ଅଧିକାର, ସଂରକ୍ଷଣ, ନିଯୁକ୍ତି, ଶିକ୍ଷା, ଗଣତନ୍ତ୍ରର ଚୋରି । ସେମାନେ ତୁମର ରାସନ କାର୍ଡ, ଜମି ଛଡ଼ାଇ ନେବେ ଏବଂ ଆଦାନୀ ଏବଂ ଅମ୍ବାନୀଙ୍କୁ ଦେବେ । ଯେଉଁମାନେ ମହାତ୍ମା ଗାନ୍ଧୀଙ୍କୁ ହତ୍ୟା କରିଥିଲେ, ସେହିମାନେ ଡକ୍ଟର ବି.ଆର. ଆମ୍ବେଦକର ଏବଂ ମହାତ୍ମା ଗାନ୍ଧୀଙ୍କ ସମ୍ବିଧାନକୁ ନଷ୍ଟ କରିବାକୁ ଚେଷ୍ଟା କରୁଛନ୍ତି । ଆମେ ସେମାନଙ୍କୁ ଭାରତର ସମ୍ବିଧାନକୁ ନଷ୍ଟ କରିବାକୁ ଦେବୁ ନାହିଁ । ଆମେ ଯାତ୍ରା ସମୟରେ ବହୁତ ସମର୍ଥନ ପାଇଛୁ । ବିହାରରେ ଏକ ନୂଆ ସ୍ଲୋଗାନ ଆସିଛି, 'ଭୋଟ୍ ଚୋର, ଗାଦି ଛାଡ'...ଚୀନ ଏବଂ ଆମେରିକାରେ ମଧ୍ୟ ଲୋକମାନେ 'ଭୋଟ୍ ଚୋର, ଗାଦି ଛାଡ' କହୁଛନ୍ତି । ଆଗକୁ 'ହାଇଡ୍ରୋଜେନ୍‌' ବୋମା ଆସିବ, ବିଜେପିଠୁ ସତର୍କ ହୋଇଯାଆନ୍ତୁ ଜନତା ।"

ଅଧିକ ପଢନ୍ତୁ...୧୬ ଦିନିଆ 'ଭୋଟର ଅଧିକାର ଯାତ୍ରା'; ରାହୁଲ ଗାନ୍ଧୀଙ୍କ 'ଦେଶୀ ପଲିଟିକ୍ସ', ବିହାରରେ ସରିବ କଂଗ୍ରେସର ୩୫ ବର୍ଷର ବନବାସ ?

'ଭୋଟର ଅଧିକାର ଯାତ୍ରା'ର ଅନ୍ତିମ ଦିନରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ କହିଛନ୍ତି, ''ଭୋଟ ଚୋରି କରି ବିଜେପି ବିହାରରେ ଜିତିବାକୁ ଚାହୁଁଛନ୍ତି । ସେ ଭୋଟ୍, ପଇସା ଚୋରି କରୁଛନ୍ତି । ତୁମେ ସବୁ ସତର୍କ ରହୁ ନଚେତ୍ ସେମାନେ ତୁମକୁ ବୁଡେଇ ଦେବେ । ୬ ମାସରେ ମୋଦି ସରକାର ଭାଙ୍ଗିବ ।''