ନୂଆଦିଲ୍ଲୀ,୧୦/୦୪: ମଧ୍ୟପ୍ରାଚ୍ୟରେ ଯୁଦ୍ଧର ତାଣ୍ଡବଲୀଳାରେ କତାରର ଶକ୍ତି ପ୍ଲାଣ୍ଟଗୁଡ଼ିକ ହୋଇଯାଇଛି ଛାରଖାର । ଫଳରେ ବିଶ୍ୱ ଶକ୍ତି (ତୈଳ ଏବଂ ପ୍ରାକୃତିକ ଗ୍ୟାସ୍) ଯୋଗାଣର ଏକ ପଞ୍ଚମାଂଶ ଅଂଶ ପ୍ରଭାବିତ ହୋଇଛି । ଯୋଗାଣ ବାଧାପ୍ରାପ୍ତ ହେବା ଦ୍ୱାରା ଗ୍ୟାସ୍ ବଜାର ଅସ୍ତବ୍ୟସ୍ତ ହୋଇଯାଇଛି ଏବଂ ଦର ବଡ଼ ମାତ୍ରାରେ ବୃଦ୍ଧି ପାଇଛି । ଭାରତ ଭଳି ଅନେକ ରାଷ୍ଟ୍ରରେ ଏଲ୍ପିଜି ଅଭାବ ସ୍ଥିତି ଉପୁଜିଛି । ଏହା ମଧ୍ୟରେ ରୁଷ ଖେଳୁଛି ପ୍ରକୃତ ଖେଳ । ପରିସ୍ଥିତିର ଫାଇଦା ଉଠାଇବା ପାଇଁ ଏହା ହୋଇଯାଇଛି ତତ୍ପର ।
ବ୍ଲୁମ୍ବର୍ଗର ଏକ ରିପୋର୍ଟ ଅନୁସାରେ, ରୁଷ ବିଶ୍ୱ ଗ୍ୟାସ୍ ସଂକଟର ଲାଭ ଉଠାଇବାକୁ ଉଦ୍ୟମ ଚଳାଇଛି । ଶକ୍ତି ପାଇଁ ଡହଳ ବିକଳ ଦକ୍ଷିଣ ଏସିଆକୁ ଗ୍ୟାସ ବିକ୍ରି କରିବାକୁ ଏହା ଏବେ ଦେଉଛି ଲୋଭନୀୟ ଅଫର । ରୁଷ୍ର ଗ୍ୟାସ ଆମେରିକା ଦ୍ୱାରା ପ୍ରତିବନ୍ଧିତ । ଏଭଳି ସ୍ଥିତିରେ ଏହା ଏ ଗ୍ୟାସ୍କୁ ବମ୍ପର ଅଫରରେ ବିକ୍ରି କରିବା ପାଇଁ ଉଦ୍ୟମ କରୁଛି । ରିପୋର୍ଟ ଅନୁସାରେ, ରୁଷ ଏଲ୍ଏନ୍ଜିକୁ ସ୍ପଟ୍ ବଜାର ଦର ତୁଳନାରେ ୪୦ଧ ରିହାତିରେ ବିକ୍ରି କରିବାକୁ ଅଫର ଦେଉଛି । ରିପୋର୍ଟରେ ଆହୁରି କୁହାଯାଇଛି ଯେ, ଗତ ସପ୍ତାହରେ ଚୀନ୍ ଏବଂ ରୁଷସ୍ଥିତ କେତେକ ଅଜଣା ମଧ୍ୟସ୍ଥ କମ୍ପାନିଗୁଡ଼ିକ ମାଧ୍ୟମରେ ଏହି ଗ୍ୟାସ୍ର ଖେପଗୁଡ଼ିକୁ ସ୍ପଟ ବଜାର ଦରଠାରୁ ୪୦% ରିହାତିରେ ବିକ୍ରି କରାଯାଇଥିଲା । ସୂତ୍ର ଅନୁସାରେ, ବିକ୍ରି କରିଥିବା କମ୍ପାନି ଦାବି କରିଛନ୍ତି ଯେ, ସେମାନେ ଏଭଳି ଦସ୍ତାବିଜ ଉପଲବ୍ଧ କରିପାରିବେ, ଯାହାଦ୍ୱାରା ଏହା ଜଣାଯିବ ଯେ, ଏହି ଗ୍ୟାସ ଖେପ ଅଣ-ରୁଷ ଉତ୍ସ ଯେପରି ଓମାନ ଏବଂ ନାଇଜେରିଆରୁ ଆସିଛି ।
ପ୍ରକାଶଯୋଗ୍ୟ, ହୋର୍ମୁଜ ବନ୍ଦ ହେବା ଏବଂ କତାରରେ ବିଶ୍ୱର ସର୍ବବୃହତ୍ ଏଲ୍ଏନ୍ଜି ରପ୍ତାନି ପ୍ଲାଣ୍ଟରେ ହୋଇଥିବା ହମ୍ଲା କାରଣରୁ ବିଶ୍ୱ ଗ୍ୟାସ ଯୋଗାଣର ପ୍ରାୟ ଏକ ପଞ୍ଚମାଂଶ ଠପ୍ ହୋଇଯାଇଛି । ଫଳରେ ପ୍ରାକୃତିକ ଗ୍ୟାସ ବଜାରରେ ଅସ୍ଥିରତା ଦେଖାଦେଇଛି ଏବଂ ଦର ବଡ଼ ମାତ୍ରାରେ ବଢ଼ିଯାଇଛି । କତାରର ଯୋଗାଣ ଅଟକିବା ଫଳରେ ବାଂଲାଦେଶ-ଭାରତ ସମେତ କେତେକ ଏସୀୟ ଦେଶ ବିକଳ୍ପ ଉତ୍ସରୁ ଉଚ୍ଚ ଦରରେ ଗ୍ୟାସ କ୍ରୟ କରୁଛନ୍ତି । ରିପୋର୍ଟରେ କୁହାଯାଇଛି ଯେ, ଏସବୁକୁ ଦେଖି ରୁଷ ବଡ଼ ଅଫର ଦେଇଛି । ବାଂଲାଦେଶ ସ୍ପଟ୍ ବଜାରରୁ ଏଲ୍ଏନ୍ଜିର ଖେପ କିଣିବା ଆରମ୍ଭ କରିଦେଲାଣି ଏବଂ ଅନେକ ସମୟରେ ଏହାକୁ ମଧ୍ୟପ୍ରାଚ୍ୟ ଦେଶଗୁଡ଼ିକ ସହ ନିଜର ଦୀର୍ଘକାଳୀନ ଚୁକ୍ତି ଅଧୀନରେ ଲାଗୁଥିବା ରାଶିଠାରୁ ପ୍ରାୟ ଦୁଇଗୁଣା ଖର୍ଚ୍ଚ କରିବାକୁ ପଡୁଛି । ଏଲ୍ଏନ୍ଜି ଯୋଗାଣରେ ହ୍ରାସ ଯୋଗୁ ବାଂଲାଦେଶ ଏବଂ ଭାରତ ଭଳି ଦେଶଙ୍କୁ ନିଜ ନିଜର ସାର ଶିଳ୍ପକୁ ଗ୍ୟାସ ଯୋଗାଣ କମାଇବାକୁ ପଡ଼ିଛି ।
ଆହୁରି ପଢନ୍ତୁ-ପରିବେଶ ପ୍ରତି ବଡ଼ ଆହ୍ୱାନ;ନଦୀରେ ଢାଳିଦେଲେ ୧୧ ହଜାର ଲିଟର କ୍ଷୀର,ଭିଡ଼ିଓ ଭାଇରାଲ
ପ୍ରକାଶଯୋଗ୍ୟ, ପ୍ରତିବନ୍ଧିତ ସାମଗ୍ରୀକୁ ନେଇ ଭାରତ ସତର୍କତା ଅବଲମ୍ବନ କରିଆସିଛି ଏବଂ ସରକାର ପୂର୍ବରୁ ହିଁ କହିଛନ୍ତି ଯେ, ଭାରତ ପ୍ରତିବନ୍ଧିତ ସାମଗ୍ରୀ ଆଡ଼କୁ ଯିବ ନାହିଁ । ତେବେ ଆମେରିକା ରୁଷ ତେଲ କ୍ରୟ ଉପରେ ସାମୟିକ ଭାବେ କଟକଣା ଉଚ୍ଛେଦ କରିବା ପରେ ଭାରତ ରୁଷ ଏବଂ ଇରାନ ତେଲ କ୍ରୟ କରିଛି । ଅନ୍ୟପକ୍ଷରେ, ପ୍ରତିବନ୍ଧ ପରେ ବି ନିଜର ଆର୍କଟିକ ଏଲ୍ଏନ୍ଜି ୨ ଏବଂ ପୋର୍ଟୋବାୟା ରପ୍ତାନି ପ୍ଲାଣ୍ଟରୁ ରୁଷ ଲଗାତର ରପ୍ତାନି ବୃଦ୍ଧି କରୁଛି । କିନ୍ତୁ ଅଧିକାଂଶ କ୍ରେତା ଆମେରିକାର ପ୍ରତିବନ୍ଧ କାରଣରୁ ତେଲଗ୍ୟାସର ଆମଦାନିରୁ ଦୂରେଇ ରହୁଛନ୍ତି । ରିପୋର୍ଟ ଅନୁସାରେ, ଚୀନ୍ ଗୁପ୍ତ ଜାହାଜ ମାଧ୍ୟମରେ ରୁଷ ତେଲ ଏବଂ ଗ୍ୟାସ୍ ଆମଦାନି ଜାରି ରଖିଛି ।
