ନୂଆଦିଲ୍ଲୀ,୦୯/୧୨: କଣ ରୋହିତ ଶର୍ମା ଭାରତର ସବୁଠୁ ଖରାପ ଅଧିନାୟକ । କଣ କହୁଛି ରେକର୍ଡ । ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜରେ ଦ୍ବିତୀୟ ଟେଷ୍ଟ ଆଡିଲେଡରେ ଖେଳାଯାଇଥିଲା । ଅଷ୍ଟ୍ରେଲିଆ ବିପକ୍ଷ ଦ୍ବିତୀୟ ଟେଷ୍ଟରେ ଭାରତ ୧୦ ୱିକେଟରେ ପରାସ୍ତ ହୋଇଛି । ଏହି ପରାଜୟ ପରେ ଟିମ୍ ଇଣ୍ଡିଆ କ୍ୟାପ୍ଟେନ ରୋହିତ ଶର୍ମା ଏକ ଅଲୋଡା ରେକର୍ଡର ଅଧିକାରୀ ହୋଇଛି । ଲଗାତାର ୪ଟି ଟେଷ୍ଟ ମ୍ୟାଚ ପରାସ୍ତ ହେବାରେ ସେ ଅନ୍ୟତମ ଭାରତୀୟ ଅଧିନାୟକ ହୋଇଛନ୍ତି ।
ପୂର୍ବରୁ ଏହି ଅଲୋଡା ରେକର୍ଡ ତାଲିକାରେ ଭାରତର ଏମଏକେ ପଟୌଦୀ, ସଚିନ ତେନ୍ଦୁଲକର, ଦତ୍ତାଜୀରାଓ ଗାୟକୱାଡ, ମହେନ୍ଦ୍ର ସିଂହ ଧୋନୀ ଓ ବିରାଟ କୋହଲି ରହିଥିଲେ । ଏବେ ରୋହିତ ଶର୍ମା ତାଲିକାରେ ସାମିଲ ହୋଇଛନ୍ତି । ଏମଏକେ ପଟୌଦୀଙ୍କ ନେତୃତ୍ବରେ ୧୯୬୭ରୁ ୧୯୬୮ରେ ଭାରତ ଲଗାତାର ୬ଟି ଟେଷ୍ଟ ମ୍ୟାଚରେ ପରାସ୍ତ ହୋଇଥିଲା । ସେହିପରି ୧୯୯୯ରୁ ୨୦୦୦ ମଧ୍ୟରେ ସଚିନ ତେନ୍ଦୁଲକରଙ୍କ ନେତୃତ୍ବରେ ଭାରତ ଲଗାତାର ୫ଟି ଟେଷ୍ଟ ମ୍ୟାଚ ହାରିଥିଲା ।
ସେହିପରି ୧୯୫୯ରେ ଦତ୍ତାଜୀରାଓ ଗାୟକ୍ବାର୍ଡଙ୍କ ଅଧିନାୟକତ୍ବରେ ଭାରତ ଲଗାତାର ୪ଟି ଟେଷ୍ଟ ମ୍ୟାଚ ହାରିଥିଲା । ୨୦୧୧ ଓ ୨୦୧୪ରେ ଧୋନୀଙ୍କ ଅଧିନାୟକତ୍ବରେ ଭାରତ ଲଗାତାର ୪ଟି ଟେଷ୍ଟ ମ୍ୟାଚରେ ପରାସ୍ତ ହୋଇଥିଲା । ସେହିପରି ୨୦୨୦-୨୧ରେ ବିରାଟ କୋହଲିଙ୍କ କ୍ୟାପ୍ଟେନ୍ସିରେ ଭାରତ ଲାଗାତାର ୪ଟି ଟେଷ୍ଟ ମ୍ୟାଚ ହାରିଥିଲା । ଏବେ ଏହି ତାଲିକାରେ ରେହିତ ଶର୍ମା ଯୋଡି ହୋଇଛନ୍ତି ।
କ୍ୟାପ୍ଟେନ ରୋହିତ ଶର୍ମାଙ୍କ ଟେଷ୍ଟ କ୍ୟାରିୟର- କହି ରଖୁଛୁ କି ରୋହିତ ଶର୍ମା ବର୍ତ୍ତମାନ ସୁଦ୍ଧା ଭାରତ ପାଇଁ ୬୫ ଟେଷ୍ଟ ମ୍ୟାଚ ଖେଳିଛନ୍ତି । ୧୧୩ ପାଳିରେ ୪୨୭୯ ରନ କରିଛନ୍ତି । ସେଥିରେ ତାଙ୍କର ୧୨ଟି ଶତକ ଓ ୧୮ଟି ଅର୍ଦ୍ଧଶତକ ସାମିଲ ଅଛି । ୨୧୨ ସର୍ବାଧିକ ସ୍କୋର ରହିଛି ।
