ବେଙ୍ଗାଲୁରୁ, ୨୬।୫: କର୍ଣ୍ଣାଟକ ରାଜନୀତିରୁ ଆସୁଛି ଏକ ବଡ଼ ଖବର । ରାଜ୍ୟ ରାଜନୀତିରେ ଏକ ବଡ଼ ଧରଣର ସଙ୍ଗଠନିକ ଓ ନେତୃତ୍ୱ ପରିବର୍ତ୍ତନର ସଙ୍କେତ ମିଳିଛି । ସୂଚନା ଅନୁଯାୟୀ, ଆସନ୍ତାକାଲି କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ନିଜ ପଦରୁ ଇସ୍ତଫା ଦେଇପାରନ୍ତି । ଏହି ବଡ଼ ନିଷ୍ପତ୍ତି ପୂର୍ବରୁ ଆସନ୍ତାକାଲି ସକାଳେ ସେ ନିଜ ବାସଭବନରେ କ୍ୟାବିନେଟ୍ ମନ୍ତ୍ରୀମାନଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ 'ବ୍ରେକଫାଷ୍ଟ ମିଟିଂ' ଡକାଇଛନ୍ତି । ଅନ୍ୟପଟେ, ଆଜି ସିଦ୍ଧାରମୈୟା ବେଙ୍ଗାଲୁରୁରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ସ୍ଥିତି ସ୍ପଷ୍ଟ କରିପାରନ୍ତି ବୋଲି ଚର୍ଚ୍ଚା ହେଉଛି ।
ରାଜନୈତିକ ସରଗରମ:
ରାଜ୍ୟରେ ସୃଷ୍ଟି ହୋଇଥିବା ଏହି ସରଗରମ ପରିସ୍ଥିତି ମଧ୍ୟରେ କର୍ଣ୍ଣାଟକ କଂଗ୍ରେସ ପ୍ରଭାରୀ ରଣଦୀପ ସୁରଜେୱାଲା ବେଙ୍ଗାଲୁରୁରେ ପହଞ୍ଚି ସାରିଛନ୍ତି । ସେ ଦଳର ପ୍ରମୁଖ ନେତାମାନଙ୍କ ସହ ଘନ ଘନ ଆଲୋଚନା କରୁଥିବା ସୂଚନା ମିଳିଛି । ଯଦିଓ କଂଗ୍ରେସ ପକ୍ଷରୁ ଏହି ନେତୃତ୍ୱ ପରିବର୍ତ୍ତନ ସମ୍ପର୍କରେ କୌଣସି ଆନୁଷ୍ଠାନିକ ବା ଔପଚାରିକ ଘୋଷଣା କରାଯାଇ ନାହିଁ, ତଥାପି ଆସନ୍ତାକାଲି କର୍ଣ୍ଣାଟକ ରାଜନୀତିରେ ଏକ ବଡ଼ ମୋଡ଼ ଆସିବା ପ୍ରାୟ ନିଶ୍ଚିତ ବୋଲି ରାଜନୈତିକ ସମୀକ୍ଷକମାନେ ମତ ପ୍ରକାଶ କରିଛନ୍ତି ।
କଂଗ୍ରେସ ହାଇକମାଣ୍ଡଙ୍କ ସହ ବୈଠକ:
ଏହି ସମସ୍ତ ଘଟଣାକ୍ରମ ପଛରେ କଂଗ୍ରେସ ହାଇକମାଣ୍ଡଙ୍କ ସହ ହୋଇଥିବା ଆଲୋଚନାକୁ ହିଁ ପ୍ରମୁଖ କାରଣ ବୋଲି କୁହାଯାଉଛି ।
ଗୁରୁତ୍ୱପୂର୍ଣ୍ଣ ବୈଠକ: ନିକଟରେ ନୂଆଦିଲ୍ଲୀରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାଡ଼ଗେ ଏବଂ ବରିଷ୍ଠ ନେତା ରାହୁଲ ଗାନ୍ଧୀଙ୍କ ଉପସ୍ଥିତିରେ ଏକ ହାଇ-ପ୍ରୋଫାଇଲ୍ ବୈଠକ ଅନୁଷ୍ଠିତ ହୋଇଥିଲା ।
ପ୍ରମୁଖ ନେତାଙ୍କ ଉପସ୍ଥିତି: ଏହି ବୈଠକରେ ସିଦ୍ଧାରାମୈୟା, ଉପ-ମୁଖ୍ୟମନ୍ତ୍ରୀ ଡି.କେ. ଶିବକୁମାର ଏବଂ କଂଗ୍ରେସ ସାଧାରଣ ସମ୍ପାଦକ କେ.ସି. ଭେଣୁଗୋପାଳ ମଧ୍ୟ ସାମିଲ ଥିଲେ ।
ସୂତ୍ର ଅନୁଯାୟୀ: କଂଗ୍ରେସ ଶୀର୍ଷ ନେତୃତ୍ୱ ଚାହୁଁଛନ୍ତି ଯେ ସିଦ୍ଧାରାମୈୟା ଦେଶର ଜଣେ ପ୍ରମୁଖ OBC ଚେହେରା ଭାବେ ଜାତୀୟ ରାଜନୀତିରେ ସକ୍ରିୟ ହୁଅନ୍ତୁ । ତାଙ୍କୁ ରାଜ୍ୟସଭାକୁ ପଠାଇବା ସହ ନୂଆଦିଲ୍ଲୀରେ ଦଳର ଏକ ବଡ଼ ଓ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେବା ପାଇଁ ହାଇକମାଣ୍ଡ ଆଶ୍ୱାସନା ଦେଇଛନ୍ତି ।
ଡି.କେ. ଶିବକୁମାର ପରବର୍ତ୍ତୀ ମୁଖ୍ୟମନ୍ତ୍ରୀ ହେବେ କି ?
ସିଦ୍ଧାରାମୈୟାଙ୍କ ଇସ୍ତଫା ଖବର ପରେ ଏବେ ଉପ-ମୁଖ୍ୟମନ୍ତ୍ରୀ ଡି.କେ. ଶିବକୁମାରଙ୍କ ସମର୍ଥକଙ୍କ ମଧ୍ୟରେ ଉତ୍ସାହ ପ୍ରକାଶ ପାଇଛି ଏବଂ ଆଶା ବଢ଼ି ଯାଇଛି । ରାଜନୈତିକ ମହଲରେ ଜୋରଦାର ଚର୍ଚ୍ଚା ଚାଲିଛି ଯେ, ଯଦି ସିଦ୍ଧାରାମୈୟା ପଦ ଛାଡନ୍ତି, ତେବେ ଡି.କେ. ଶିବକୁମାର କର୍ଣ୍ଣାଟକର ପରବର୍ତ୍ତୀ ମୁଖ୍ୟମନ୍ତ୍ରୀ ହେବାର ସମ୍ଭାବନା ସବୁଠାରୁ ଅଧିକ । ଏବେ ସମସ୍ତଙ୍କ ନଜର ଆସନ୍ତାକାଲି ହେବାକୁ ଥିବା କ୍ୟାବିନେଟ୍ ବୈଠକ ଏବଂ ହାଇକମାଣ୍ଡଙ୍କ ଚୂଡ଼ାନ୍ତ ନିଷ୍ପତ୍ତି ଉପରେ ରହିଛି ।
ଆହୁରି ପଢ଼ନ୍ତୁ... ଶୁଭେନ୍ଦୁ ଅଧିକାରୀଙ୍କ ଗୋଟିଏ ଚେତାବନୀ ପରେ ସୀମାନ୍ତରେ ଭିଡ଼, ବାଂଲାଦେଶୀ କହିଲେ "ଆମକୁ ଶୀଘ୍ର ନିଜ ଦେଶକୁ ଯିବାକୁ ଦିଅ"
