କଟକ ୧୯/୧୧: ରାଜ୍ୟର ବିଭିନ୍ନ ସବ୍‌-ରେଜିଷ୍ଟ୍ରାରଙ୍କ କାର୍ଯ୍ୟାଳୟରେ ଦଲାଲଙ୍କୁ  ଜଗିବ ଏ.ଆଇ (ଆର୍ଟିଫିସିଆଲ୍‌  ଇଣ୍ଟେଲିଜେନ୍ସ) । ଏଥିପାଇଁ ରାଜ୍ୟର ୨୦୩ଟି ସବ୍‌-ରେଜିଷ୍ଟ୍ରାରଙ୍କ  କାର୍ଯ୍ୟାଳୟରେ ୮୭୨ଟି କ୍ୟାମେରା  ଲଗାଯାଇଛି । ଏ.ଆଇ ବୈଷୟିକ  ସହାୟତାରେ ଏହି କ୍ୟାମେରା ସବ୍‌-ରେଜିଷ୍ଟ୍ରାରଙ୍କ କାର୍ଯ୍ୟାଳୟରେ ଦଲାଲି  କରି ଆସୁଥିବା ଲୋକଙ୍କ ଉପରେ ନଜର  ରଖିବ । ସ୍ମାର୍ଟ ସର୍ଭିଲାନ୍ସ ସିଷ୍ଟମ୍‌ ନାମରେ  ପରିଚିତ ଏହି ବ୍ୟବସ୍ଥାକୁ ମଙ୍ଗଳାବର  ବିଭାଗୀୟ ମନ୍ତ୍ରୀ ଉଦ୍‌ଘାଟନ କରିବାର  କାର୍ଯ୍ୟକ୍ରମ ରହିଛି । 

ରାଜ୍ୟର ବିଭିନ୍ନ  ସବ୍‌-ରେଜିଷ୍ଟ୍ରାରଙ୍କ କାର୍ଯ୍ୟାଳୟରେ  ବ୍ୟାପକ ଦୁର୍ନୀତି ଓ ଜମି କିଣାବିକାରେ ଜାଲିଆତି ହେଉଥିବା ନେଇ ବାରମ୍ବାର ଅଭିଯୋଗ ହେଉଛି । । ଏନେଇ ରାଜ୍ୟ ସରକାରଙ୍କୁ ବଦନାମ୍‌ ହେବାକୁ  ପଡ଼ିଛି । ବିଶେଷ କରି କିଛି ଦଲାଲ ଜମି ପଞ୍ଜିକରଣ  କାର୍ଯ୍ୟରେ ହେରଫେର କରୁଛନ୍ତି । ଏପରିକି ଏହି କାର୍ଯ୍ୟାଳୟର କିଛି କର୍ମଚାରୀ ଏଥିରେ ସମ୍ପୃକ୍ତ ରହି ସାଧାରଣ ଲୋକଙ୍କୁ ଶୋଷଣ  ମଧ୍ୟ କରୁଥିବା ଅଭିଯୋଗ ହୋଇଥାଏ । ଏହାକୁ ରୋକିବା ତଥା  ସବ୍‌-ରେଜିଷ୍ଟ୍ରାରଙ୍କ କାର୍ଯ୍ୟାଳୟରେ ସ୍ୱଚ୍ଛତା ଆଣିବା ଲାଗି ରାଜ୍ୟ  ସରକାର ସ୍ମାର୍ଟ ସର୍ଭିଲାନ୍ସ ବ୍ୟବସ୍ଥା ପାଇଁ ଯୋଜନା କରିଥିଲେ ।  ଏଥିପାଇଁ ୩୭କୋଟି ଟଙ୍କାର ବ୍ୟୟବରାଦ କରାଯାଇଥିଲା । ଏହି  ଅର୍ଥରେ ୧୭୩ଟି ସବ୍‌-ରେଜିଷ୍ଟ୍ରାରଙ୍କ କାର୍ଯ୍ୟାଳୟରେ ଚାରିଟି  ଲେଖାଏଁ ଏବଂ ବାକି ୩୦ଟି ଜିଲ୍ଲା ସବ୍‌-ରେଜିଷ୍ଟ୍ରାରଙ୍କ କାର୍ଯ୍ୟାଳୟରେ  ୬ଟି ଲେଖାଏଁ କ୍ୟାମେରା ଲଗାଯାଇଛି ।    

ଏହି କ୍ୟାମେରା ଜରିଆରେ ସବ୍‌-ରେଜିଷ୍ଟ୍ରାରଙ୍କ କାର୍ଯ୍ୟାଳୟକୁ  କିଏ ବାରମ୍ବାର ଆସୁଛନ୍ତି ସେମାନଙ୍କୁ ଚିହ୍ନଟ କରି, ସେମାନଙ୍କ  ଫଟୋଚିତ୍ର ଆଇଜିଆର(ଇନ୍ସପେକ୍ଟର ଜେନେରାଲ ରେଜିଷ୍ଟ୍ରେସନ୍‌) ରେ ଥିବା ସେଣ୍ଟ୍ରାଲ୍‌ ସର୍ଭିଲାନ୍ସକୁ ପଠାଯିବ । ସନ୍ଦେହଜନକ ବ୍ୟକ୍ତିଙ୍କ  ସମ୍ପର୍କରେ ମଧ୍ୟ ସେଣ୍ଟ୍ରାଲ୍‌ ସର୍ଭିଲାନ୍ସକୁ ସୂଚନା ପ୍ରଦାନ କରିବ ।  ଏଥିସହ ଏହି କାର୍ଯ୍ୟାଳୟକୁ ଆସୁଥିବା ସମସ୍ତ କର୍ମଚାରୀ,  ପରିଦର୍ଶକଙ୍କ ଆଚରଣ ଉପରେ ମଧ୍ୟ ନଜର ରଖିବ । ଏଆଇ  ଜରିଆରେ ବିଭିନ୍ନ ଦୃଶ୍ୟର ଫୁଟେଜ୍‌ ମଧ୍ୟ ସଂଗ୍ରହ କରାଯିବ ।  ଯାହାକି ଏକ ଦସ୍ତାବିଜ୍‌ ଭାବେ ଯେକୌଣସି ବିବାଦୀୟ ଘଟଣା  କ୍ଷେତ୍ରରେ ପ୍ରମାଣ ଭଳି କାର୍ଯ୍ୟରେ ଲାଗିବ । ଜମି ପଞ୍ଜିକରଣ  କାର୍ଯ୍ୟରେ କିପରି ସ୍ୱଚ୍ଛତାକୁ ନିଶ୍ଚିନ୍ତ କରାଯାଇ ପାରିବ ସେ ଦିଗରେ  ମଧ୍ୟ ଏହି ବ୍ୟବସ୍ଥା କାର୍ଯ୍ୟ କରିବ ବୋଲି ଜଣାଯାଇଛି । ଏପରିକି  ସବ୍‌-ରେଜିଷ୍ଟ୍ରାର୍‌ଙ୍କ କାର୍ଯ୍ୟାଳୟରେ ଅଗ୍ନିକାଣ୍ଡ ସେ ସମ୍ପର୍କରେ  ମଧ୍ୟ ଏହା ତୁରନ୍ତ ସୂଚନା ଦେବ ବୋଲି ଆଇଜିଆର ସୁବ୍ରତ  ଶତପଥୀ ସୂଚନା ଦେଇଛନ୍ତି । ଏହି ବ୍ୟବସ୍ଥା ଜମି କିଣାବିକାକୁ  ନେଇ ହେଉଥିବା ବିଭିନ୍ନ ଜାଲିଆତି ରୋକିବାରେ ସହାୟକ ହେବ  ବୋଲି ଶ୍ରୀ ଶତପଥୀ ଆଶାବ୍ୟକ୍ତ କରିଛନ୍ତି ।