ନୂଆଦିଲ୍ଲୀ,୧୫/୦୭: ବୈବାହିକ ବିବାଦ ପ୍ରସଙ୍ଗରେ ସୁପ୍ରିମକୋର୍ଟ ସୋମବାର ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି । ପତ୍ନୀଙ୍କ ଅଗୋଚରରେ ନିଆଯାଇଥିବା ତାଙ୍କ ଫୋନ୍ କଲ୍ ରେକର୍ଡିଂକୁ ଛାଡ଼ପତ୍ର ମାମଲାରେ ପ୍ରମାଣ ଭାବେ ବ୍ୟବହାର କରାଯାଇ ପାରିବ ବୋଲି ଅଦାଲତ କହିଛନ୍ତି। ସର୍ବୋଚ୍ଚ ଅଦାଲତ ଏହି ପରିପ୍ରେକ୍ଷୀରେ ପଞ୍ଜାବ-ହରିୟାଣା ହାଇକୋର୍ଟଙ୍କ ରାୟକୁ ଖାରଜ କରିଦେଇଛନ୍ତି । ହାଇକୋର୍ଟ ନିଜ ରାୟରେ କହିଥିଲେ କି ପତ୍ନୀଙ୍କୁ ନ ଜଣାଇ ତାଙ୍କ କଲ୍ ରେକର୍ଡିଂ କରାଯିବା ବେଆଇନ । ଏହା ଗୋପନୀୟତା ଅଧିକାରର ଉଲ୍ଲଂଘନ । ଏହାକୁ ପ୍ରମାଣ ଭାବେ ଗ୍ରହଣ କରାଯାଇ ପାରିବ ନାହିଁ ।
ସୁପ୍ରିମକୋର୍ଟ କହିଛନ୍ତି, ବୈବାହିକ ଜୀବନରେ ଗୋପନୀୟତା ଅଧିକାର ପୂରଣ ହୋଇପାରିବ ନାହିଁ । ଭାରତୀୟ ସାକ୍ଷ୍ୟ ଆଇନର ଧାରା ୧୨୨ ଅନୁସାରେ, ପତି- ପତ୍ନୀଙ୍କ ମଧ୍ୟରେ ହୋଇଥିବା ବାର୍ତ୍ତାଳାପକୁ କୋର୍ଟରେ ପ୍ରଘଟ କରାଯାଇ ପାରିବ ନାହିଁ । କିନ୍ତୁ ଛାଡ଼ପତ୍ର ଭଳି ମାମଲାରେ ଏହାକୁ ବିଡ଼ମ୍ବନା ବିବେଚନା କରାଯାଏ । ବିଚାରପତି ବି ଭି ନାଗରତ୍ନା ଓ ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ ଆହୁରି ସ୍ପଷ୍ଟ କରିଛନ୍ତି ଯେ ଏହି ମାମଲାରେ ଗୋପନୀୟତା ଅଧିକାର ଉଲ୍ଲଂଘନ ହୋଇଥିବା ଆମେ ଭାବୁନାହୁଁ । ଧାରା ୧୨୨ କେବଳ ପତି-ପତ୍ନୀଙ୍କ ମଧ୍ୟରେ ବାର୍ତ୍ତାଳାପର ଗୋପନୀୟତାକୁ ମାନ୍ୟତା ଦେଇଥାଏ । କିନ୍ତୁ ଏହା ଗୋପନୀୟତାର ସାମ୍ବିଧାନିକ ଅଧିକାର (ଅନୁଚ୍ଛେଦ ୨୧) ସହ ଜଡ଼ିତ ନୁହେଁ । ଜଷ୍ଟିସ୍ ନାଗରତ୍ନା କହିଛନ୍ତି, ଏହି ବିବାହ ଏଭଳି ସ୍ତରରେ ପହଞ୍ଚି ଯାଇଛି ଯେଉଁଠି ପତି-ପତ୍ନୀ ପରସ୍ପରର ଗୁଇନ୍ଦାଗିରି କରିଦେଇଛନ୍ତି । ସେଥିରୁ ପୂର୍ବରୁ ହିଁ ସମ୍ପର୍କ ତୁଟିସାରିଥିବା ସଙ୍କେତ ମିଳୁଛି ।
ପଞ୍ଜାବସ୍ଥିତ ବଠିଣ୍ଡାର ଏକ ଫ୍ୟାମିଲି କୋର୍ଟରୁ ଏହି ମାମଲା ଆରମ୍ଭ ହୋଇଥିଲା । ମାମଲାରେ ପତ୍ନୀଙ୍କ ଫୋନ୍ ବାର୍ତ୍ତାଳାପ ଆଧାରରେ ଛାଡ଼ପତ୍ର ଲାଗି ଆବେଦନ କରିଥିଲେ ସ୍ୱାମୀ । କୋର୍ଟ ପ୍ରମାଣ ସ୍ୱରୂପ କଲ୍ ରେକର୍ଡିଂକୁ ଗ୍ରହଣ କରିନେଇଥିଲେ । ଏହାପରେ ପତ୍ନୀ ରାୟ ବିରୋଧରେ ପଞ୍ଜାବ-ହରିୟାଣା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ହାଇକୋର୍ଟ ଏହାକୁ ଗୋପନୀୟତା ଅଧିକାର ଉଲ୍ଲଂଘନ ଦର୍ଶାଇ ଏହି ରେକର୍ଡିଂକୁ ପ୍ରମାଣ ଭାବେ ସ୍ୱୀକାର କରାଯାଇ ପାରିବ ନାହିଁ ବୋଲି ରାୟ ଦେଇଥିଲେ ।
ହାଇକୋର୍ଟ ଏହି ପରିପ୍ରେକ୍ଷୀରେ ଆନ୍ଧ୍ରପ୍ରଦେଶ ହାଇକୋର୍ଟ ଓ ଅନ୍ୟ ରାୟଗୁଡ଼ିକୁ ଆଧାର କରି କହିଥିଲେ କି ପତି-ପତ୍ନୀଙ୍କ ବ୍ୟକ୍ତିଗତ ବାର୍ତ୍ତାଳାପକୁ ଲୁଚିଛପି ରେକର୍ଡ କରାଯିବା ବେଆଇନ । ହାଇକୋର୍ଟରୁ ନିରାଶ ହେବା ପରେ ପତି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ତାଙ୍କ ଓକିଲ କହିଛନ୍ତି ଯେ ଗୋପନୀୟତା ଅଧିକାର ସୀମିତ ଏବଂ ତାହାକୁ ଅନ୍ୟ ସାମ୍ବିଧାନିକ ଅଧିକାରଗୁଡ଼ିକ ସହ ସନ୍ତୁଳିତ ରଖାଯିବା ଆବଶ୍ୟକ । ବୈବାହିକ ବିବାଦରେ ଏଭଳି ଅନେକ ମାମଲା ଥାଏ, ଯାହା କେବଳ ପତି-ପତ୍ନୀଙ୍କ ମଧ୍ୟରେ ହିଁ ଘଟିଥାଏ ଏବଂ ତାହାର କୌଣସି ସାକ୍ଷୀ ନ ଥାନ୍ତି । ଏଭଳି ସ୍ଥିତିରେ ପ୍ରଯୁକ୍ତିର ସହାୟତା ନିଆଯାଇଥାଏ ।
