ନୂଆଦିଲ୍ଲୀ, ୦୬/୦୫ : ନିର୍ବାସିତ ବାଂଲାଦେଶୀ ଲେଖିକା ତସ୍ଲିମା ନସ୍ରିନ୍ ପହଲଗାମ୍ ଆତଙ୍କୀ ଆକ୍ରମଣକୁ ନେଇ ବଡ଼ ବୟାନ ଦେଇଛନ୍ତି । ସେ କହିଛନ୍ତି, ଯେ ପର୍ଯ୍ୟନ୍ତ ଇସ୍ଲାମ୍ ରହିବ, ସେ ପର୍ଯ୍ୟନ୍ତ ଆତଙ୍କବାଦ ମଧ୍ୟ ରହିବ । ୧୪ ଶହ ବର୍ଷ ବିତିଥିଲେ ସୁଦ୍ଧା ଇସ୍ଲାମ ଏ ଯାଏ ବିକଶିତ ହୋଇନାହିଁ । ନୂଆଦିଲ୍ଲୀରେ ଆୟୋଜିତ ସାହିତ୍ୟ ସମାବେଶରେ ଯୋଗଦେଇ ତସ୍ଲିମା ଏହି ବୟାନ ଦେଇଛନ୍ତି । ଏହି ପରିପ୍ରେକ୍ଷୀରେ ସେ ପହଲଗାମ୍ ଆକ୍ରମଣ ଓ ଢାକାରେ ୨୦୧୬ରେ ସଂଘଟିତ ଆତଙ୍କୀ ହମ୍ଲା ମଧ୍ୟରେ ଥିବା ସାମଞ୍ଜସ୍ୟ ବାବଦରେ ରେଖାଙ୍କିତ କରିଛନ୍ତି ।
ସେ କହିଛନ୍ତି ଯେ, ୨୦୧୬ରେ ଢାକା ଆକ୍ରମଣରେ ଏଥିପାଇଁ ମୁସଲମାନଙ୍କୁ ହତ୍ୟା କରାଯାଇଥିଲା, କାରଣ ସେମାନେ କଲମା ପଢ଼ିପାରି ନ ଥିଲେ । ଯେତେବେଳେ ତର୍କ ଓ ମାନବତା ଉପରେ ଆସ୍ଥା ଭାରୀ ପଡ଼େ ସେତେବେଳେ ଏଭଳି ଘଟିଥାଏ । ଇସ୍ଲାମ୍ ବିକଶିତ ନ ହେବା ପର୍ଯ୍ୟନ୍ତ ଏହା ଆତଙ୍କବାଦୀଙ୍କୁ ଜନ୍ମ ଦେଇ ଚାଲିଥିବ । ଏପ୍ରିଲ ୨୨ରେ ଦକ୍ଷିଣ କାଶ୍ମୀରର ପହଲଗାମ୍ ନିକଟରେ ଆତଙ୍କବାଦୀମାନେ ୨୬ ଲୋକଙ୍କୁ ଗୁଳିକରି ହତ୍ୟା କରିଥିଲେ । ୨୦୧୬ ଜୁଲାଇ ୧ରେ ଆତଙ୍କୀମାନେ ବାଂଲାଦେଶ ରାଜଧାନୀ ଢାକାରେ ହୋଲୀ ଆର୍ଟିଜାନ୍ ବେକରୀରେ ଗୁଳିମାଡ଼ କରିଥିଲେ । ଏଥିରେ ୨୯ ଜଣ ପ୍ରାଣ ହରାଇଥିଲେ ।
ତସ୍ଲିମା ଆହୁରି କହିଛନ୍ତି, ଯଦି ସଂସ୍କୃତି, ଧର୍ମ କିମ୍ବା ପରମ୍ପରା ନାମରେ ମହିଳାଙ୍କ ସୁରକ୍ଷାକୁ ଅଣଦେଖା କରାଯାଏ ତେବେ ସେହି ସଂସ୍କୃତି ଉପରେ ପ୍ରଶ୍ନ ଉଠିବା ଆବଶ୍ୟକ । ଯେଉଁ ସମାଜ ନିଜ ଅଧା ଜନସଂଖ୍ୟାର ସୁରକ୍ଷା କରିପାରିବ ନାହିଁ, ତାହା ବିଫଳ । ସେ ନିଜ ଭାଷଣରେ କହିଛନ୍ତି, ୟୁରୋପରେ ଚର୍ଚ୍ଚ ସଂଗ୍ରହାଳୟରେ ପରିଣତ ହେଉଛି । କିନ୍ତୁ ମୁସଲମାନ ପ୍ରତ୍ୟେକ ସ୍ଥାନରେ ମସ୍ଜିଦ ବନାଇବାରେ ବ୍ୟସ୍ତ । ହଜାର ହଜାର ମସ୍ଜିଦ ଥିବା ସତ୍ତେ୍ୱ ସେମାନେ ଆହୁରି ମସ୍ଜିଦ ବନାଇବାକୁ ଚାହୁଁଛନ୍ତି । ସେମାନେ ଜିହାଦୀ ସୃଷ୍ଟି କରୁଛନ୍ତି । ମଦ୍ରାସା ରହିବା ଉଚିତ ନୁହେଁ । ପିଲାମାନେ ଗୋଟିଏ ନୁହେଁ, ସବୁ ପୁସ୍ତକ ପଢ଼ିବା ଆବଶ୍ୟକ ।
ସେ କହିଛନ୍ତି, ମୁଁ ଆମେରିକାର ସ୍ଥାୟୀ ବାସିନ୍ଦା । ସେଠାରେ ୧୦ ବର୍ଷ ରହିଛି । କିନ୍ତୁ ମୋତେ ସେଠାରେ ଜଣେ ବାହାର ବ୍ୟକ୍ତି ଭାବେ ଅନୁଭବ ହୋଇଥାଏ । କୋଲକାତା ଆସିଲେ ମୋତେ ନିଜ ଘର ଭଳି ଅନୁଭବ ହୋଇଥାଏ । ପଶ୍ଚିମବଙ୍ଗରୁ ବାହାରିବା ପରେ ଦିଲ୍ଲୀ ଦ୍ୱିତୀୟ ଘର ଭଳି ଲାଗିଥାଏ । ମୋ ଦେଶ ମୋତେ ଯାହା ଦେଇପାରିନାହିଁ, ତାହା ମୁଁ ଏଠାରେ ପାଇଛି । ଉଲ୍ଲେଖଯୋଗ୍ୟ, ଧର୍ମବିରୋଧୀ ବୟାନ ମାମଲାରେ ତସ୍ଲିମା ୧୯୯୪ରୁ ସ୍ୱିଡେନ, ଆମେରିକା ଓ ଭାରତରେ ନିର୍ବାସିତ ଜୀବନ ବଞ୍ଚିଆସୁଛନ୍ତି ।
ଏହି ଖବରଟିକୁ ପଢନ୍ତୁ-ପହଲଗାମ ପ୍ରତିଶୋଧ ପ୍ରସ୍ତୁତି ; ପାକିସ୍ତାନକୁ ଘାରିଲା ଯୁଦ୍ଧ ଭୟ, LoCରେ ଆକ୍ରମଣ କରିପାରେ ଭାରତ, କହିଲେ ପାକ୍ ପ୍ରତିରକ୍ଷା ମନ୍ତ୍ରୀ
