ପୁତ୍ରଜୟା: ଥାଇଲାଣ୍ଡ ଓ କାମ୍ବୋଡିଆ ଦୀର୍ଘ ଦିନର ସୀମା ସଂଘର୍ଷ ପରେ ଜରୁରିକାଳିନ ଭିତ୍ତିରେ ନିରପେକ୍ଷ ଭାବେ ଯୁଦ୍ଧବିରାମ କରିବାକୁ ରାଜି ହୋଇଛନ୍ତି। ମାଲେସିଆର ପ୍ରଧାନମନ୍ତ୍ରୀ ଆନୱାର ଇବ୍ରାହିମ ଏନେଇ ଆଧିକାରିକ ସ୍ତରରେ ଘୋଷଣା କରିଛନ୍ତି। ସେ କହିଛନ୍ତି ଯେ ଉଭୟ ଦଷ ମଧ୍ୟରେ ପାଞ୍ଚ ଦିନ ଧରି ଚାଲିଥିବା ମରଣାନ୍ତକ ସୀମା ସଂଘର୍ଷ ଶେଷ କରିବା ପାଇଁ ତୁରନ୍ତ ଓ ନିରପେକ୍ଷ ଯୁଦ୍ଧବିରାମରେ ରାଜି ହୋଇଛନ୍ତି। ଏହି ଘୋଷଣା ମାଲେସିଆ ଦ୍ୱାରା ମଧ୍ୟସ୍ଥତା ପରେ ଆସିଛି। ଯେଉଁଥିରେ କାମ୍ବୋଡିଆର ପ୍ରଧାନମନ୍ତ୍ରୀ ହୁନ ମାନେଟ ଓ ଥାଇଲାଣ୍ଡର ଭାରପ୍ରାପ୍ତ ପ୍ରଧାନମନ୍ତ୍ରୀ ଫୁମଥାମ ୱେଚାୟାଚାଇ ମାଲେସିଆର ପୁତ୍ରଜୟାରେ ମିଳିତ ଭାବେ ଆଲୋଚନା କରିବା ପରେ ଏହି ନିଷ୍କର୍ସରେ ଉପନୀତ ହୋଇଥିଲେ।

ଖବର ମୁତାବକ, ଏହି ସଂଘର୍ଷ ଗତ ଜୁଲାଇ ୨୪ ତାରିଖରୁ ଆରମ୍ଭ ହୋଇଥିଲା। ସୀମାରେ ଏକ ଲ୍ୟାଣ୍ଡମାଇନ ବିସ୍ଫୋରଣରେ ପାଞ୍ଚ ଥାଇ ସୈନିକ ଆହତ ହୋଇଥିଲେ। ଉଭୟ ଦେଶ ପରସ୍ପର ଉପରେ ଆକ୍ରମଣ ଆରମ୍ଭ କରିଥିବା ଅଭିଯୋଗ କରିଥିଲେ। ଏହାପରେ ଉଭୟ ପକ୍ଷ ପରସ୍କର ଉପରେ ଆକ୍ରମଣ ଜାରି ରଖିଥିଲେ।  ଏହି ସଂଘର୍ଷରେ ୩୦ରୁ ଅଧିକ ଲୋକଙ୍କର ମୃତ୍ୟୁ ହୋଇଥିବା ବେଳେ ଥାଇଲାଣ୍ଡରେ ୧୩ ଜଣ ନାଗରିକ ଓ କାମ୍ବୋଡିଆରେ ୮ ଜଣ ନାଗରିକଙ୍କ ମୃତ୍ୟୁ ହୋଇଛି। ଏହା ସହିତ ୧.୫ ଲକ୍ଷରୁ ଅଧିକ ଲୋକ ସୀମା ଅଞ୍ଚଳରୁ ସ୍ଥାନାନ୍ତରିତ ହୋଇଥିବା ଜଣାପଡିଛି।

ମାଲେସିଆର ମଧ୍ୟସ୍ଥତା ଓ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ହସ୍ତକ୍ଷେପ ପରେ ଏହି ଯୁଦ୍ଧବିରାମ ସମ୍ଭବ ହୋଇଛି। ଟ୍ରମ୍ପ ଉଭୟ ଦେଶର ନେତାଙ୍କ ସହ ଆଲୋଚନା କରି ସଂଘର୍ଷ ଜାରି ରହିଲେ ବାଣିଜ୍ୟ ଚୁକ୍ତି ସ୍ଥଗିତ ରହିବ ବୋଲି ଚେତାବନୀ ଦେଇଥିଲେ। ଚୀନ ଓ ଆମେରିକାର ରାଷ୍ଟ୍ରଦୂତମାନେ ମଧ୍ୟ ଏହି ଆଲୋଚନାରେ ଉପସ୍ଥିତ ରହିଥିଲେ।

ଏହି ଯୁଦ୍ଧବିରାମ ଜୁଲାଇ ୨୮ ତାରିଖ ମଧ୍ୟରାତ୍ରିରୁ (୧୨ଟା) କାର୍ଯ୍ୟକାରୀ ହେବ ବୋଲି ଜଣାପଡିଛି। ଉଭୟ ଦେଶ ଜୁଲାଇ ୨୯ ତାରିଖରେ ସୀମାରେ ସାମରିକ କମାଣ୍ଡରମାନଙ୍କ ଏକ ବୈଠକ ଓ ଆଗଷ୍ଟ ୪ ତାରିଖରେ କାମ୍ବୋଡିଆରେ ଜେନେରାଲ ବର୍ଡର କମିଟିର ଆଲୋଚନା ପାଇଁ ରାଜି ହୋଇଛନ୍ତି। ମାଲେସିଆ, ଆସିଆନର ବର୍ତ୍ତମାନ ଅଧ୍ୟକ୍ଷ ଭାବେ ଏହି ଯୁଦ୍ଧବିରାମର ତଦାରଖ ଓ ନିଶ୍ଚିତତା ପାଇଁ ଏକ ପର୍ଯ୍ୟବେକ୍ଷକ ଦଳ ଗଠନ କରିବାକୁ ପ୍ରସ୍ତୁତ ରହିଛି ବୋଲି ସୂଚନା ପ୍ରଦାନ କରିଛିୟ।

ଏହି ସଂଘର୍ଷର ମୂଳ କାରଣ ୮୧୭ କିଲୋମିଟର ସୀମାରେ ଥିବା କେତେକ ବିବାଦୀୟ ଅଞ୍ଚଳକୁ ନେଇ ରହିଛି। ବିଶେଷତଃ ପ୍ରେହ ଭିହାର ଓ ତା ମୁଏନ ଥୋମ ମନ୍ଦିର ନେଇ ଉଭୟ ଦେଶ ମଧ୍ୟରେ ଦୀର୍ଘ ଦିନରୁ ବିବାଦ ରହିଆସିଛି। ୧୯୬୨ରେ ଆନ୍ତର୍ଜାତୀୟ ନ୍ୟାୟାଳୟ (ICJ) ପ୍ରେହ ବିହାରକୁ କାମ୍ବୋଡିଆର ଅଧିକାରରେ ଦେଇଥିଲା। କିନ୍ତୁ ଥାଇଲାଣ୍ଡ ଏହାକୁ ସମ୍ପୂର୍ଣ୍ଣ ଭାବେ ଗ୍ରହଣ କରି ନାହିଁ। ମେ’ ମାସ ୨୦୨୫ ମସିହାରେ ଜଣେ କାମ୍ବୋଡିଆନ ସୈନିକଙ୍କ ମୃତ୍ୟୁ ପରେ ଏହି ବିବାଦ ପୁଣି ଥରେ ତୀବ୍ରତର ହୋଇଥିଲା।

ଏହି ଯୁଦ୍ଧବିରାମ ସୀମା ଅଞ୍ଚଳରେ ଶାନ୍ତି ଫେରାଇ ଆଣିବା ଓ ସ୍ଥାନାନ୍ତରିତ ଲୋକଙ୍କୁ ଘରକୁ ଫେରିବାରେ ସାହାଯ୍ୟ କରିବ ବୋଲି ଆଶା କରାଯାଉଛି।