ଭୁବନେଶ୍ୱର,୨୭/୧୦: ଦୁର୍ଦ୍ଦଶା ଦେଇ ଚାଲିଗଲା ବାତ୍ୟା ‘ଦାନା’ । ଚାଷୀ ଏବେ କାନ୍ଦୁଛି । ବାତ୍ୟା ‘ଦାନା’ ଯୋଗୁଁ ପ୍ରାୟ ୨ ଲକ୍ଷ ଏକର ଜମିର ଫସଲ ନଷ୍ଟ ହୋଇଥିବା ପ୍ରାଥମିକ ଆକଳନରୁ ଜଣାପଡ଼ିଛି । କେଉଁଠି ପବନରେ ଧାନ ଗଛ ଶୋଇପଡ଼ିଛି ତ ଆଉ କେଉଁଠି ଫସଲ ଉପରେ ଚାଲିଛି ପାଣି । ପନିପରିବା ମଧ୍ୟ ପାଣି ଭର୍ତ୍ତି କ୍ଷେତରେ ଭାସୁଛି । ବିଶେଷ କରି ଭଦ୍ରକ, ବାଲେଶ୍ୱର ଓ କେନ୍ଦ୍ରାପଡ଼ା ଜିଲ୍ଲାରେ ‘ଦାନା’ ମୁହଁରେ ଯାଇଛି ବର୍ଷକର ଦାନା ।
ବାତ୍ୟା କ୍ଷେତକୁ ପୂରା ଛାରଖାର କରି ଦେଇଛି । ଚାଷୀ ଏବେ ମୁଣ୍ଡରେ ହାତ ଦେଇ ବସିଛି । ସରକାର କିନ୍ତୁ ଚାଷୀକୂଳ ପାଇଁ ଅଣ୍ଟା ଭିଡ଼ିଛନ୍ତି । ସପ୍ତାହକ ମଧ୍ୟରେ କ୍ଷୟକ୍ଷତି ରିପୋର୍ଟ ଆସିବ । ସରକାର ରିଲିଫ୍ କୋଡ୍ର ସଂଶୋଧିତ ନିର୍ଦ୍ଦେଶାବଳୀ ଅନୁଯାୟୀ ସହାୟତା ଯୋଗାଇଦେବେ । କ୍ଷୟକ୍ଷତି ରିପୋର୍ଟ ଆସିଲେ, ସେହି ଆଧାରରେ ପ୍ରଭାବିତ ଲୋକଙ୍କୁ ଡିବିଟି ମାଧ୍ୟମରେ ବ୍ୟାଙ୍କ ଆକାଉଣ୍ଟକୁ କ୍ଷତିପୂରଣ ରାଶି ପ୍ରଦାନ କରାଯିବ ବୋଲି ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓ ସୂଚନା ଦେଇଛନ୍ତି । ଜଳସେଚିତ ଜମି ଫସଲ ନଷ୍ଟ ହୋଇଥିଲେ ଚାଷୀଙ୍କୁ ହେକ୍ଟର ପିଛା ୧୭ହଜାର ଟଙ୍କା, ଅଣଜଳସେଚିତ ଜମି ପାଇଁ ୮ହଜାର ୫ଶହ ଟଙ୍କା ଓ ବାରମାସୀ ଚାଷ ପାଇଁ ହେକ୍ଟର ପିଛା ୨୨ ହଜାର ୫ଶହ ଟଙ୍କା ସହାୟତା ମିଳିବ ।
କୃଷି ବିଭାଗର ପ୍ରାଥମିକ ଆକଳନ ଦର୍ଶାଇଛି, ‘ଦାନା’ ପ୍ରଭାବରେ ୫ ଜିଲ୍ଲାର ୫୦ ବ୍ଲକର ୮୦ ହଜାର ହେକ୍ଟର ଜମିରୁ ଅଧିକ ଫସଲ ଉଜୁଡ଼ିଛି । ସେଥିମଧ୍ୟରୁ ୭୦ହଜାର ୧୪୩ ହେକ୍ଟର ଜମିରେ ଧାନ, ୮୫୧୬ରେ ଅଣଧାନ ଓ ୧୮୧୪ ହେକ୍ଟରରେ ପରିବା ଚାଷ ନଷ୍ଟ ହୋଇଛି । ସବୁଠୁ ଅଧିକ କ୍ଷତିଗ୍ରସ୍ତ ହୋଇଛି ଭଦ୍ରକ ଜିଲ୍ଲା । ଜିଲ୍ଲାର ୭ଟି ବ୍ଲକର ୮୮ ହଜାର ହେକ୍ଟର ଚାଷ ଜମି ପାଣିରେ ବୁଡ଼ି ରହିଛି । ସେଥିରୁ ପ୍ରାୟ ୨୫ ହେକ୍ଟର ଚାଷଜମିରେ ଫସଲ କ୍ଷତି ହୋଇସାରିଛି । ପାଣି ନଛାଡ଼ିଲେ ଅଧିକ ଫସଲ କ୍ଷତି ହେବାର ଆଶଙ୍କା ରହିଛି ।
ପ୍ରାଥମିକ ଆକଳନ ଅନୁସାରେ କେନ୍ଦ୍ରାପଡ଼ା ଜିଲ୍ଲାର ୮ ବ୍ଲକର ୨୮ ହଜାର ୪୨୬ ହେକ୍ଟର ଚାଷ ଜମି କ୍ଷତିଗ୍ରସ୍ତ ହୋଇଛି । ବାଲେଶ୍ୱର ଜିଲ୍ଲାର ୧୨ଟି ବ୍ଲକର ୪୩ ହଜାର ହେକ୍ଟର ଜମି ପାଣିରେ ବୁଡ଼ି ରହିଛି । ଯାଜପୁରର ୭ଟି ବ୍ଲକର ୨୧୭୦୯ ହେକ୍ଟର ଜମି ଓ ମୟୂରଭଞ୍ଜର ୧୬ଟି ବ୍ଲକର ୨୩୮୧ ହେକ୍ଟର ଜମି ମଧ୍ୟ ପ୍ରଭାବିତ ହୋଇଛି ।
ବର୍ଷା କମିବା ପରେ କୃଷି ଓ ରାଜସ୍ୱ ଅଧିକାରୀମାନେ ଯାଇ କ୍ଷୟକ୍ଷତିର ଜିଓ ଟାଗିଂ ରିପୋର୍ଟ ପ୍ରସ୍ତୁତ କରିବେ । ସେହି ରିପୋର୍ଟ ଜିଲ୍ଲା ପ୍ରଶାସନ ପକ୍ଷରୁ ସ୍ୱତନ୍ତ୍ର ରିଲିଫ କମିଶନର (ଏସ୍ଆରସି)ଙ୍କ କାର୍ଯ୍ୟାଳୟକୁ ଦିଆଯିବ । ଏହାପରେ କ୍ଷତିଗ୍ରସ୍ତଙ୍କୁ ମିଳିବ ସରକାରୀ ସହାୟତା।
ଶନିବାର କୃଷି ବିଭାଗର ବରିଷ୍ଠ ଅଧିକାରୀ ଓ ପ୍ରଭାବିତ ଜିଲ୍ଲାର କୃଷି ଅଧିକାରୀମାନଙ୍କ ସହ ଏକ ସମୀକ୍ଷା ବୈଠକ ପରେ ଉପ ମୁଖ୍ୟମନ୍ତ୍ରୀ ଶ୍ରୀ ସିଂହଦେଓ କହିଛନ୍ତି, ଜିଲ୍ଲାସ୍ତରରୁ ଏବେ ଚାଷଜମି ପ୍ରଭାବିତ ହେବାର ପ୍ରାଥମିକ ଆକଳନ ଆସି ରିପୋର୍ଟ ଆସିଛି । ବର୍ଷା କମିବା ପରେ ଅଧିକାରୀମାନେ କ୍ଷେତ୍ରକୁ ଯାଇ କ୍ଷୟକ୍ଷତି ରିପୋର୍ଟ ପ୍ରସ୍ତୁତ କରି ସରକାରଙ୍କୁ ପଠାଇବାକୁ ନିର୍ଦ୍ଦେଶ ଜାରି ହୋଇଛି । ଜିଲ୍ଲାସ୍ତରରରୁ ସମ୍ପୂର୍ଣ୍ଣ ରିପୋର୍ଟ ଆସିବା ପରେ ହିଁ ଲୋକଙ୍କୁ ଡିବିଟି ମାଧ୍ୟମରେ କ୍ଷତିପୂରଣ ଦିଆଯିବ । ଭୁଲ୍ ରିପୋର୍ଟ ନ ଦେବାକୁ ଅଫିସରମାନଙ୍କୁ ସତର୍କ କରାଯାଇଛି । ଯଦି କେହି ଏଭଳି ଭୁଲ୍ ରିପୋର୍ଟ ଦେବା ଜଣାପଡ଼େ ସରକାର କଡ଼ା କାର୍ଯ୍ୟାନୁଷ୍ଠାନ ନେବେ । କୃଷି ବିଭାଗ ପ୍ରମୁଖ ସଚିବ ଡ. ଅରବିନ୍ଦ ପାଢ଼ୀ କହିଛନ୍ତି, ରାଜସ୍ୱ ଓ କୃଷି ବିଭାଗର ମିଳିତ ସହଯୋଗରେ କ୍ଷୟକ୍ଷତି ଆକଳନ କରାଯିବ । ସମ୍ପୂର୍ଣ୍ଣ ସ୍ୱଚ୍ଛତାର ସହ ଏହା କରାଯିବା ସହ ସର୍ବନିମ୍ନ ୧ହଜାର ଟଙ୍କା କ୍ଷତିପୂରଣ ଦିଆଯିବ ।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ମଧ୍ୟ କ୍ଷୟକ୍ଷତି ରିପୋର୍ଟ ଶୀଘ୍ର ପ୍ରସ୍ତୁତ କରିବାକୁ ରାଜସ୍ୱ ଏବଂ କୃଷି ବିଭାଗକୁ ନିର୍ଦ୍ଦେଶ ଦେଇଛି । ଯେତେଶୀଘ୍ର ସମ୍ଭବ କ୍ଷତିଗ୍ରସ୍ତଙ୍କୁ ସରକାରୀ ସହାୟତା ଯୋଗାଇଦେବାକୁ ମୁଖ୍ୟମନ୍ତ୍ରୀ କାର୍ଯ୍ୟାଳୟ ପରାମର୍ଶ ଦେଇଛି ।
