ବେଲପାହାଡ଼,୦୧/୦୬(ଜ୍ଞାନ ରଞ୍ଜନ ପଟ୍ଟନାୟକ): ମାଡି ଚାଲିଛି ଦ୍ରୁତ ଶିଳ୍ପାୟନ । ପଡୋଶୀ ସୁନ୍ଦରଗଡ ଜିଲ୍ଲାର ହେମଗିରି ତହସିଲ ଅଞ୍ଚଳରେ କୋଇଲା ଖନନ ଜନିତ ଜଙ୍ଗଲ ଧ୍ୱସଂ ପରେ ବେଲପାହାଡ ପାଶ୍ୱର୍ବର୍ତ୍ତୀ ଇଲାକା ବି ଉଜୁଡିବାର ସଂକେତ ଦେଲାଣି । ଏପରିସ୍ଥିତିରେ ଇତିହାସ ପୃଷ୍ଠାରେ ଅଞ୍ଚଳର ଦୁଇ ମନୋରମ ପର୍ଯ୍ୟଟନ କ୍ଷେତ୍ର ଉଲ୍ଲାପଗଡ ଓ ବିକ୍ରମଖୋଲ ରହିଯିବ ବୋଲି ପରିବେଶବିତ୍ମାନେ ଆଶଙ୍କା ବ୍ୟକ୍ତ କରିଛନ୍ତି ।
ଉଲ୍ଲାପଗଡ଼ ଓ ବିକ୍ରମଖୋଲ ଅଞ୍ଚଳ ପ୍ରକୃତିର ଏକ ଅମୂଲ୍ୟ ଉପହାର । ଘନ ଜଙ୍ଗଲ, ପାହାଡ଼, ଝରଣା, ବନ୍ୟପ୍ରାଣୀ ଓ ଐତିହାସିକ ମହତ୍ତ୍ୱ ପାଇଁ ଏହି ଅଞ୍ଚଳ ବର୍ଷ ବର୍ଷ ଧରି ପରିଚିତ । ଦ୍ରୁତଶିଳ୍ପାୟନ ଯୋଗୁ ବର୍ତ୍ତମାନ ଏକ ବଡ଼ ପ୍ରଶ୍ନ ସାମ୍ନାକୁ ଆସିଛି, ଆଗାମୀ ପିଢ଼ି କ’ଣ ଏହି ସବୁଜ ଐତିହ୍ୟକୁ ଦେଖିପାରିବ? ଔଦ୍ୟାଗିକ ବିକାଶ ଓ କୋଇଲା ଖଣି ସମ୍ପ୍ରସାରଣର ବଢ଼ୁଥିବା ଚାପ ମଧ୍ୟରେ ଏହି ଜଙ୍ଗଲ ଅଞ୍ଚଳର ଭବିଷ୍ୟତକୁ ନେଇ ପରିବେଶବିତ୍, ପ୍ରକୃତିପ୍ରେମୀ ଏବଂ ସ୍ଥାନୀୟ ଲୋକଙ୍କ ମଧ୍ୟରେ ଚିନ୍ତା ବଢ଼ିବାରେ ଲାଗିଛି । ପ୍ରକୃତିର ଏକ ସମୃଦ୍ଧ ଭଣ୍ଡାର ଉଲ୍ଲାପଗଡ଼ ଓ ବିକ୍ରମଖୋଲ କେବଳ ଜଙ୍ଗଲ ନୁହେଁ । ଏହା ହେଉଛି ଜୈବ ବିବିଧତାର ଏକ ସମୃଦ୍ଧ ଭଣ୍ଡାର । ଏଠାରେ ବିଭିନ୍ନ ପ୍ରଜାତିର ଗଛ, ଔଷଧୀୟ ଉଦ୍ଭିଦ, ପକ୍ଷୀ ଓ ବନ୍ୟପ୍ରାଣୀ ବସବାସ କରନ୍ତି । ବର୍ଷା ଜଳ ସଂରକ୍ଷଣ, ଭୂତଳ ଜଳସ୍ତର ବଜାୟ ରଖିବା, ବାୟୁକୁ ବିଶୁଦ୍ଧ କରିବା ଏବଂ ସ୍ଥାନୀୟ ଜଳବାୟୁକୁ ସନ୍ତୁଳିତ ରଖିବାରେ ଏହି ଜଙ୍ଗଲର ଭୂମିକା ଅପରିସୀମ ।
ସ୍ଥାନୀୟ ଲୋକଙ୍କ ଜୀବନ ଓ ସଂସ୍କୃତି ମଧ୍ୟ ଏହି ଜଙ୍ଗଲ ସହ ଓତଃପ୍ରୋତ ଭାବେ ଜଡିତ । ବର୍ଷ ବର୍ଷ ଧରି ଏହି ଅଞ୍ଚଳ ପ୍ରକୃତି ଓ ମଣିଷ ମଧ୍ୟରେ ସହଅବସ୍ଥାନର ଏକ ଉତ୍କୃଷ୍ଟ ଉଦାହରଣ ହୋଇରହିଛି । ବିକ୍ରମଖୋଲ କେବଳ ପ୍ରାକୃତିକ ନୁହେଁ, ଐତିହାସିକ ଦୃଷ୍ଟିରୁ ମଧ୍ୟ ଏକ ଗୁରୁତ୍ୱପୂର୍ଣ୍ଣ ସ୍ଥାନ । ଏଠାରେ ଥିବା ପ୍ରାଚୀନ ଶିଳାଲିପି ଓ ପ୍ରତ୍ନତାତ୍ତ୍ୱ ିକ ନିଦର୍ଶନ ଗବେଷକମାନଙ୍କୁ ବହୁ ବର୍ଷ ଧରି ଆକର୍ଷିତ କରିଆସୁଛି । ଇତିହାସ, ପ୍ରକୃତି ଓ ସଂସ୍କୃତିର ଏହି ଅନନ୍ୟ ସମନ୍ୱୟ ଓଡ଼ିଶାର ଐତିହ୍ୟକୁ ଆହୁରି ସମୃଦ୍ଧ କରିଛି । ଝାରସୁଗୁଡା ଓ ପାଶ୍ୱର୍ବର୍ତ୍ତୀ ଅଞ୍ଚଳ କୋଇଲା ଖଣି ଏବଂ ଶିଳ୍ପାୟନ ପାଇଁ ପରିଚିତ । ଏହି ବିକାଶ ରାଜ୍ୟର ଅର୍ଥନୀତିକୁ ଶକ୍ତିଶାଳୀ କରିଥିବା ବେଳେ ପରିବେଶ ଉପରେ ମଧ୍ୟ ଏହାର ପ୍ରଭାବ ପଡ଼ିଛି ।
ପରିବେଶବିତ୍ମାନଙ୍କ ଆଶଙ୍କା ଯେ ଭବିଷ୍ୟତରେ ଯଦି ନୂତନ ଖଣି ପ୍ରକଳ୍ପ କିମ୍ବା ଶିଳ୍ପ ସମ୍ପ୍ରସାରଣ ଏହି ଅଞ୍ଚଳ ଆଡ଼କୁ ବଢ଼େ, ତେବେ ହଜାର ହଜାର ଗଛ କଟାଯାଇପାରେ । ଏହାର ପ୍ରଭାବରେ ବନ୍ୟପ୍ରାଣୀଙ୍କ ବାସସ୍ଥାନ ନଷ୍ଟ ହେବା ସହିତ ଜଳସ୍ରୋତ ଏବଂ ସ୍ଥାନୀୟ ପରିବେଶ ଉପରେ ଗଭୀର ପ୍ରଭାବ ପଡ଼ିପାରେ । ବିଶ୍ୱ ଆଜି ଜଳବାୟୁ ପରିବର୍ତ୍ତନର ଚ୍ୟାଲେଞ୍ଜ ସହ ସଂଘର୍ଷ କରୁଛି । ତାପମାତ୍ରା ବୃଦ୍ଧି, ଅନିୟମିତ ବର୍ଷା, ଖରା ଓ ବନ୍ୟା ଭଳି ସମସ୍ୟା ଦିନକୁ ଦିନ ବଢ଼ୁଛି । ଏପରି ସମୟରେ ଜଙ୍ଗଲ ହେଉଛି ପ୍ରକୃତିର ସବୁଠାରୁ ବଡ଼ ସୁରକ୍ଷା କବଚ । ତେଣୁ ବିକାଶ ଓ ପରିବେଶ ମଧ୍ୟରେ ସନ୍ତୁଳନର ଆବଶ୍ୟକତା ରହିଛି ।
ଅଧିକ ପଢ଼ନ୍ତୁ :- Mahanadi River: ମହାନଦୀ ତ୍ରିକୋଣଭୂମି ଅଞ୍ଚଳ ସ୍ଥିତି ଉଦ୍ବେଗଜନକ, ମାଡ଼ି ଚାଲିଛି ବାଲିଚର, ସରୁଆ ହେଉଛି ନଈ ଧାର, ଆଗକୁ ବନ୍ୟା ବଢ଼ିବ
ରୋଜଗାର, ଶିଳ୍ପ ଓ ଭିତ୍ତିଭୂମିର ଉନ୍ନତି ଏକ ରାଜ୍ୟର ପ୍ରଗତି ପାଇଁ ଜରୁରୀ । କିନ୍ତୁ ସେହି ବିକାଶ ଯଦି ପ୍ରକୃତିର ମୂଲ୍ୟରେ ହୁଏ, ତେବେ ତାହାର ଦୀର୍ଘମିଆଦି ପ୍ରଭାବ ସମାଜ ପାଇଁ କ୍ଷତିକାରକ ହୋଇପାରେ । ଯେକୌଣସି ପ୍ରକଳ୍ପ ପୂର୍ବରୁ ପରିବେଶ ପ୍ରଭାବ ଆକଳନକୁ ଗୁରୁତ୍ୱ ଦେବା, ସଂରକ୍ଷଣ କ୍ଷେତ୍ର ଚିହ୍ନଟ କରିବା ଏବଂ ସ୍ଥାନୀୟ ଲୋକଙ୍କ ମତାମତକୁ ସମ୍ମାନ ଦେବାର ଆବଶ୍ୟକତା ରହିଛି । ଉଲ୍ଲାପଗଡ଼ ଓ ବିକ୍ରମଖୋଲ ଭଳି ଅଞ୍ଚଳ କେବଳ ଝାରସୁଗୁଡାର ନୁହେଁ, ସମଗ୍ର ଓଡ଼ିଶାର ଗର୍ବ । ମାତ୍ର ବିକାଶ ଯଜ୍ଞରେ ଏହି ଜୈବ ବିବିଧତାର ଭଣ୍ଡାରର ଆହୁତି ଭବିଷ୍ୟତ ପିଢି ପାଇଁ କେତେ ଯେ ବିଧ୍ୱସଂକରକ ହେବ ତାହା ଅବର୍ଣ୍ଣନୀୟ ବୋଲି ପରିବେଶବିତ୍ମାନେ ମତପ୍ରକାଶ କରିଛନ୍ତି ।
