ନୂଆଦିଲ୍ଲୀ : ସିନ୍ଧୁ ଜଳ ଚୁକ୍ତି ନେଇ ପାକିସ୍ତାନକୁ ବହୁତ ବଡ଼ ଝଟକା ଲାଗିଛି। ୱାର୍ଲ୍ଡ ବ୍ୟାଙ୍କର ଅଧ୍ୟକ୍ଷ ଅଜୟ ବଙ୍ଗା ସ୍ପଷ୍ଟ କରିଛନ୍ତି ଯେ , ଭାରତ ଓ ପାକିସ୍ତାନ ମଧ୍ୟରେ ୧୯୬୦ମସିହାରେ ହୋଇଥିବା ସିନ୍ଧୁ ଜଳ ଚୁକ୍ତିରେ ବିଶ୍ୱ ବ୍ୟାଙ୍କର ଭୂମିକା କେବଳ ଫେସିଲିଟେଟର ଅର୍ଥାତ୍ ମଧ୍ୟସ୍ଥି ଭାବେ ରହିଛି। ସେ ଏହି ଚୁକ୍ତିରେ ଉତ୍ପନ୍ନ ହୋଇଥିବା ସଦ୍ୟ ଗତିରୋଧକୁ ସମାଧାନ କରିବା ପାଇଁ ହସ୍ତକ୍ଷେପ କରିବ ନାହିଁ। ସେ କହିଛନ୍ତି ଯେ, ୱାର୍ଲ୍ଡ ବ୍ୟାଙ୍କ ଭାରତକୁ ରୋକିବା ପାଇଁ ହସ୍ତକ୍ଷେପ କରିବ ନାହିଁ।
ଭାରତ ନିଲମ୍ୱିତ କରିଛି ସନ୍ଧି –
ଜମ୍ମୁ –କାଶ୍ମୀରର ପହଲଗାମରେ ହୋଇଥିବା ଭୟଙ୍କର ଆତଙ୍କୀ ହମଲା ପରେ ଭାରତ ସିନ୍ଧୁ ଜଳ ଚୁକ୍ତିକୁ ତତ୍କାଳ ପ୍ରଭାବରେ ନିଲମ୍ୱିତ କରି ଦେଇ ଥିଲା। ଭାରତ ଏହି ନିଷ୍ପତ୍ତି ସେପର୍ଯ୍ୟନ୍ତ ପାଇଁ ନେଇଛି , ଯେପର୍ଯ୍ୟନ୍ତ ପାକିସ୍ତାନ ଆତଙ୍କବାଦକୁ ସମର୍ଥନ ଦେବାର ନୀତିରେ ସ୍ପଷ୍ଟ ଓ ସ୍ଥାୟୀ ରୂପେ ପଛକୁ ହଟିବ ନାହିଁ। ଏହି ସନ୍ଦର୍ଭରେ ମିଡ଼ିଆରେ ଅନେକ ଆକଳନ ଚାଲୁଥିବା ଯେ ୱାର୍ଲ୍ଡ ବ୍ୟାଙ୍କ୍ ବୋଧହୁଏ ଏହି ବିବାଦରେ ହସ୍ତକ୍ଷେପ କରିବ, କିନ୍ତୁ ଅଜୟ ବଙ୍ଗା ସ୍ପଷ୍ଟ ମନା କରି ଦେଇଛନ୍ତି।
ପ୍ରେସ୍ ସୂଚନା ବ୍ୟୁରୋ ମୁତାବିକ , ଭାରତୀୟ ବଂଶୋଦ୍ଭବ ବିଶ୍ୱବ୍ୟାଙ୍କର ଅଧ୍ୟକ୍ଷ କହିଛନ୍ତି , ଆମର ଭୂମିକା କେବଳ ଜଣେ ମଧ୍ୟସ୍ଥିର। ମିଡ଼ିଆରେ ଯେଉଁ କଥା ଆସୁଛି ଯେ, ବିଶ୍ୱ ବ୍ୟାଙ୍କ ମଝିରେ ଆସି ବିବାଦକୁ ସମାଧାନ କରିବ, ଏ ସବୁ ଭିତ୍ତିହୀନ କଥା। ସିନ୍ଧୁ ଜଳ ଚୁକ୍ତି ୧୯୬୦ରେ ଭାରତ ଓ ପାକିସ୍ତାନ ମଧ୍ୟରେ ୯ବର୍ଷର ଆଲୋଚନା ପରେ ହୋଇଥିଲା। ଏହି ସନ୍ଧି ବିଶ୍ୱ ବ୍ୟାଙ୍କର ମଧ୍ୟସ୍ଥତାରେ ଗଠନ ହୋଇଥିଲା ଏବଂ ସେ ମଧ୍ୟ ଏହା ଉପରେ ସାଇନ୍ କରିଥିଲା।
ଦ୍ୱିପାକ୍ଷୀୟ ମାମଲାରେ ହସ୍ତକ୍ଷେପ କରିବ ନାହିଁ ୱାର୍ଲ୍ଡ ବ୍ୟାଙ୍କ୍-
ଅଜୟ ବଙ୍ଗା ସିଏନବିସି –ଟିଭି -୧୮କୁ ଦେଇଥିବା ଏକ ଇଣ୍ଟରଭ୍ୟୁରେ କହିଛନ୍ତି , ଆମର ଭୂମିକା କେବଳ ସୁବିଧା ପ୍ରଦାନ କରିବା ଯାଏ ସୀମିତ। ବିଶ୍ୱ ବ୍ୟାଙ୍କ ଏହି ଟ୍ରଷ୍ଟ ଫଣ୍ଡର ମାଧ୍ୟମରେ ତଟସ୍ଥ ବିଶେଷଜ୍ଞ ବା ମଧ୍ୟସ୍ଥତା ନ୍ୟାୟାଳୟର ନିଯୁକ୍ତି ପାଇଁ ଶୁଳ୍କର ପେମେଣ୍ଟ କରିଥାଏ, ଯାହା ଚୁକ୍ତି ସମୟରେ ସ୍ଥାପନ କରାଯାଇ ଥିଲା। ଏହା ବ୍ୟତୀତ ଆମର କୌଣସି ଭୂମିକା ନାହିଁ। ସେ ଜୋର ଦେଇ କହିଛନ୍ତି ଯେ, ବିଶ୍ୱ ବ୍ୟାଙ୍କ ଏହି ଦ୍ୱିପାକ୍ଷୀୟ ମାମଲାରେ ହସ୍ତକ୍ଷେପ କରିବ ନାହିଁ। ଚୁକ୍ତି ଅନୁସାରେ , ଇଣ୍ଡସ ନଦୀ ପ୍ରଣାଳୀର ୮୦ ପ୍ରତିଶତର ଆବଣ୍ଟନ ପାକିସ୍ତାନକୁ ଓ ୨୦ ପ୍ରତିଶତ ଭାରତକୁ କରାଯାଇଛି।
ବଙ୍ଗା କହିଛନ୍ତି , ଏହା ତାଙ୍କର ନିଷ୍ପତ୍ତି ଯେ , ସେ କଣ କରିବେ। ଆମ କିଛି କରି ପାରିବୁ ନାହିଁ। ହେଲେ ସେ ଏହା ମଧ୍ୟ କହିଛନ୍ତି ଯେ, ବିଶ୍ୱ ବ୍ୟାଙ୍କକୁ ନୂଆ ଘଟଣାକ୍ରମ ବିଷୟରେ ଉଭୟ ସରକାର ଠାରୁ କୌଣସି ଔପଚାରିକ କମ୍ୟୁନିକେସନ ପ୍ରାପ୍ତ ହୋଇ ନାହିଁ। ସେ କହିଛନ୍ତି ଯେ, ଏହି ଚୁକ୍ତିରେ ଏମିତି କୌଣସି ପ୍ରାବଧାନ ନାହିଁ, ଯାହା ଏହାକୁ କୌଣସି ଦେଶ ଦ୍ୱାରା ନିଲମ୍ୱିତ କରିବାରେ ରୋକିବ।
ସିନ୍ଧୁ ଜଳ ସନ୍ଧି-
- ପଶ୍ଚିମୀ ନଦୀ ଗୁଡ଼ିକ (ସିନ୍ଧୁ , ଝେଲମ , ଚିନାବ) –ପାକିସ୍ତାନକୁ ଆବଣ୍ଟିତ
- ପୂର୍ବୀୟ ନଦୀ ଗୁଡ଼ିକ ( ରାବୀ , ବ୍ୟାସ, ସତଲୁଜ)-ଭାରତକୁ ଆବଣ୍ଟିତ
ହେଲେ , ଉଭୟ ଦେଶକୁ ପରସ୍ପରର ନଦୀ ଗୁଡ଼ିକରୁ ସୀମିତ ମାତ୍ରାରେ ପାଣି ବ୍ୟବହାର କରିବାର ଅଧିକାର ମଧ୍ୟ ଚୁକ୍ତିରେ ରହିଛି। ଭାରତକୁ ସିନ୍ଧୁ ନଦୀ ପ୍ରଣାଳୀରେ ମୋଟ ୨୦ ପ୍ରତିଶତ ଜଳ ବ୍ୟବହାର କରିବାର ଅଧିକାର ଅଛି। ଯେବେକି ୮୦ ପ୍ରତିଶତ ଜଳ ପାକିସ୍ତାନକୁ ମିଳିଥାଏ।
