ନୂଆଦିଲ୍ଲୀ: ଏନକ୍ରିପ୍ସନ (ତଥ୍ୟ ସୁରକ୍ଷିତ ରଖିବାର ପ୍ରଣାଳୀ) ବ୍ରେକ୍ କରିବାକୁ ବାଧ୍ୟକଲେ ଭାରତରୁ ଫେରିଯିବୁ ବୋଲି ସୋସିଆଲ ମିଡିଆ ପ୍ଲାଟଫର୍ମ ହ୍ବାଟ୍ସଆପ୍ ପକ୍ଷରୁ କୋର୍ଟରେ କୁହାଯାଇଛି । ମେଟାର ବହୁ ଲୋକପ୍ରିୟ ମେସେଜିଂ ପ୍ଲାଟଫର୍ମ ହ୍ବାଟ୍ସଆପ୍କୁ ଲୋକେ ଏହାର ଗୋପନୀୟତା ଲାଗି ବ୍ୟବହାର କରିବାକୁ ପସନ୍ଦ କରୁଛନ୍ତି । ଏଥିରେ ପଠାଯାଉଥିବା ମେସେଜ୍ ଏଣ୍ଡ-ଟୁ-ଏଣ୍ଡ ଏନକ୍ରିପଟେଡ୍ । ଏଭଳି ସ୍ଥିତିରେ ଏନକ୍ରିପ୍ସନ ହଟାଇବାକୁ ବାଧ୍ୟ କଲେ ଭାରତରେ ବ୍ୟବସାୟ ବନ୍ଦ କରିଦେବୁ ବୋଲି ହ୍ବାଟ୍ସଆପ୍ ପକ୍ଷର ଓକିଲ ଦିଲ୍ଲୀ ହାଇକୋର୍ଟରେ କହିଛନ୍ତି ।
ହ୍ବାଟ୍ସଆପ୍ ଏବଂ ଏହାର ପ୍ୟାରେଣ୍ଟ କମ୍ପାନି ମେଟା ୨୦୨୧ରେ ଭାରତରେ ଲାଗୁ ହୋଇଥିବା ଆଇଟି ନିୟମ ବିରୋଧରେ ଦିଲ୍ଲୀ ହାଇକୋର୍ଟରେ ଆବେଦନ କରିଥିଲା । ହାଇକୋର୍ଟ ଗୁରୁବାର (ଏପ୍ରିଲ ୨୫)ରେ ଉଭୟ ପକ୍ଷଙ୍କ ଆବେଦନର ଶୁଣାଣି କରିଛନ୍ତି । ତେବେ ନୂଆ ଆଇଟି ନିୟମ ଅନୁସାରେ, ସୋସିଆଲ ମିଡିଆ ମେସେଜିଂ ଆପ୍ରେ କୌଣସି ଚାଟ୍ ସଂପର୍କରେ ଜାଣିବାକୁ ଏବଂ ସର୍ବପ୍ରଥମେ ମେସେଜ କ୍ରିଏଟ କରିଥିବା ବ୍ୟକ୍ତିଙ୍କୁ ଚିହ୍ନଟ କରିବା ଲାଗି ପ୍ରାବଧାନ ରହିବା ଜରୁରୀ । କିନ୍ତୁ ଏଥିରେ ଜଣେ ୟୁଜରଙ୍କ ଗୋପନୀୟତା ପ୍ରଭାବିତ ହେବ ବୋଲି ହ୍ବାଟ୍ସଆପ୍ ଅଭିଯୋଗ କରିଆସିଛି ।
ସୂଚନାଯୋଗ୍ୟ, କେନ୍ଦ୍ର ସରକାର ୨୫ ଫେବୃଆରୀ ୨୦୨୧ରେ ‘ଇନଫର୍ମେସନ୍ ଟେକ୍ନୋଲୋଜି’ ନିୟମ ଲାଗୁ କରିଥିଲେ । ଟ୍ବିଟର, ଫେସବୁକ, ଇନଷ୍ଟାଗ୍ରାମ ଏବଂ ହ୍ବାଟ୍ସଆପ୍ ଭଳି ବଡ଼ ସୋସିଆଲ ମିଡିଆ ପ୍ଲାଟଫର୍ମ ଏହି ନିୟମ ମାନିବାକୁ ବାଧ୍ୟ ବୋଲି କହିଥିଲେ ସରକାର । କମ୍ପାନିକୁ ପ୍ରାଇଭେସି ପଲସିକୁ ଧ୍ୟାନରେ ରଖିବାକୁ କୁହାଯାଇଥିଲା । ଏହା ସହ ଯେଉଁଭଳି କୌଣସି ପ୍ରକାର ପ୍ରତିବନ୍ଧିତ କଣ୍ଟେଟ୍ ତିଆରି ଏବଂ ପ୍ରସାରିତ ନୁହୁଏ ତାଉପରେ ଧ୍ୟାନ ଦେବାକୁ ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକୁ ନିର୍ଦେଶ ଦେଇଥିଲେ ଭାରତ ସରକାର ।
