ନୂଆଦିଲ୍ଲୀ ୨୩/୦୪: ବିଶ୍ୱ ପୁସ୍ତକ ଓ କପିରାଇଟ୍ ଦିବସ ସାଧାରଣତଃ ବିଶ୍ୱ ପୁସ୍ତକ ଦିବସ ବା ଅନ୍ତର୍ଜାତୀୟ ପୁସ୍ତକ ଦିବସ ନାମରେ ଖ୍ୟାତ । ପୁସ୍ତକ ପଠନକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ପ୍ରତି ବର୍ଷ ଏପ୍ରିଲ ୨୩ ତାରିଖରେ ଏହା ପାଳିତ ହୁଏ । ପୁସ୍ତକ ବଣ୍ଟନ ଓ ନୂଆ ପୁସ୍ତକ ପଠନକୁ ଏହି ଦିବସ ଗୁରୁତ୍ୱ ଦିଏ । ପୁସ୍ତକ ଲିଖନ, ପଠନ, ଅନୁବାଦ, ପ୍ରକାଶନ ଓ କପିରାଇଟ୍ର ସୁଫଳକୁ ସମଗ୍ର ବିଶ୍ୱରେ ପ୍ରୋତ୍ସାହିତ କରିବା ଏହି ଦିବସର ଲକ୍ଷ୍ୟ ।
ୟୁନେସ୍କୋ ଦ୍ୱାରା ପ୍ରତି ବର୍ଷ ଆୟୋଜିତ ଏହି ଦିବସ ପ୍ରଥମେ ୧୯୯୫ ମସିହା ଏପ୍ରିଲ ୨୩ ତାରିଖରେ ପାଳିତ ହୋଇଥିଲା । ଏହି ଦିନ ପ୍ରସିଦ୍ଧ ସାହିତ୍ୟିକ ଯଥା- ୱିଲିୟମ୍ ସେକ୍ସପିୟର, ମିଗୁଏଲ ସରଭାଣ୍ଟେସ୍ ଓ ଇନ୍କା ଗାର୍ସିଲାସୋ ଡି ଲା ଭେଗାଙ୍କ ଦେହାନ୍ତ ହୋଇଥିଲା । ସେମାନଙ୍କ ସମ୍ମାନାର୍ଥେ ଏହି ଦିନକୁ ବିଶ୍ୱ ପୁସ୍ତକ ଓ କପିରାଇଟ୍ ଦିବସ ଭାବେ ପାଳନ କରିବାକୁ ଚୟନ କରାଗଲା । ଚଳିତ ବର୍ଷ ଏହି ଦିବସର ବିଷୟ ରହିଛି ‘ତୁମ ମାର୍ଗରେ ପଠନ କର ।’ ଆନନ୍ଦ ଓ ପ୍ରେରଣାର ସ୍ରୋତ ଭାବେ ପଠନର ଗୁରୁତ୍ୱକୁ ଏହା ପ୍ରଦର୍ଶନ କରେ ।