ଇସ୍ଲାମାବାଦ: ଆର୍ଥିକ ଦୁଃସ୍ଥିତି ଦେଇ ଗତି କରୁଥିବା ପାକିସ୍ତାନରେ ଏବେ ଲୋକଙ୍କ ପାଖରୁ ଟଙ୍କା ଆଦାୟ କରିବାକୁ ସରକାର ନୂଆ ଉପାୟ ଆଣିଛନ୍ତି ।ଗତ କିଛି ବର୍ଷ ହେଲା ପାକିସ୍ତାନରେ ସୂର୍ଯ୍ୟ ଶକ୍ତିର ବ୍ୟବହାର ଦ୍ରୁତ ଗତିରେ ବୃଦ୍ଧି ପାଇଛି । ହେଲେ ୨୦୩୦ ସୁଦ୍ଧା ୬୦ ପ୍ରତିଶତ ନବୀକରଣଯୋଗ୍ୟ ଶକ୍ତି ସୃଷ୍ଟି କରିବାକୁ ଲକ୍ଷ୍ୟ ରଖିଥିବା ପାକିସ୍ତାନ ଏବେ ବହୁ ପଛରେ ରହିଛି । ସୋଲାର ପ୍ୟାନେଲ୍ ବ୍ୟବହାର କରିବାକୁ ଲୋକମାନଙ୍କୁ ସରକାର ପ୍ରୋତ୍ସାହନ କରୁଥିବା ବେଳେ ଦାମ କମାଇବାକୁ ରାଜି ନଥିବା ଜଣାପଡ଼ିଛି । ଲୋକେ ଚଢ଼ା ଦରରେ ସୋଲାର ପ୍ୟାନେଲ୍ କିଣୁଛନ୍ତି । ଏଥିରୁ କିଛି ଅଂଶ ସରକାର ଆଦାୟ କରୁଥିବା କୁହାଯାଉଛି ।
ସୋଲାର ପ୍ୟାନେଲ ଚୀନ୍ରୁ ଆମଦାନୀ କରୁଛି ପାକିସ୍ତାନ । ଯଦିଓ ଚୀନ୍ରେ ସୋଲାର ପ୍ୟାନେଲ୍ ଦାମ କମ୍ ଥିବାରୁ ପାକିସ୍ତାନରେ ବି ଦାମ କମିଛି । କିନ୍ତୁ ସରକାର ଅତିରିକ୍ତ ଟ୍ୟାକ୍ସ ଲଗାଉଥିବା ଜଣାପଡ଼ିଛି । ଦେଶରେ ବିଜୁଳୀ ଶକ୍ତିର ଅଭାବ ହେତୁ ସୌର ଶକ୍ତି ବ୍ୟବହାର ଉପରେ ସରକାର ଜୋର ଦେଉଛନ୍ତି । ହେଲେ ଏଭଳି ଅନେକ ଲୋକ ଅଛନ୍ତି ଯେଉଁମାନେ ସୋଲାର ପ୍ୟାନେଲ୍ କ୍ରୟ କରିବାରେ ସକ୍ଷମ ନୁହଁନ୍ତି ।
ସୋଲାର ପ୍ୟାନେଲ୍ ଉପରେ ସରକାର ଟ୍ୟାକ୍ସ ଲଗାଇବାକୁ ନିଷ୍ପତ୍ତି ନେବା ପରେ ଦେଶବ୍ୟାପୀ ବିରୋଧ ଆରମ୍ଭ ହୋଇଛି । ସୋସିଆଲ ମିଡିଆରେ ସରକାରଙ୍କୁ ବିରୋଧର ସାମ୍ନା କରିବାକୁ ପଡ଼ିଛି । ସେପଟେ ଆର୍ଥିକ ନିରପେକ୍ଷତା ଲାଗି ଏଭଳି ନିୟମର ଆବଶ୍ୟକତା ରହିଛି ବୋଲି ସରକାର ସ୍ପଷ୍ଟୀକରଣ ଦେଇଛନ୍ତି । ଅନ୍ୟପକ୍ଷରେ ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ୍) ପାକିସ୍ତାନ ଲାଗି ବେଲଆଉଟ୍ ପ୍ୟାକେଜ୍ର ତୃତୀୟ କିସ୍ତି ଜାରି କରିଛନ୍ତି ।
ତୃତୀୟ କିସ୍ତିରେ ପାକିସ୍ତାନକୁ ଆଇଏମଏଫ୍ ୧.୧ ବିଲିୟନ୍ ଡଲାର ଦେଇଛି । ଏହା ପରେ ପାକିସ୍ତାନ ଉପରେ ଆଇଏମଏଫ୍ର ଋଣ ୩ ବିଲିୟନ୍ ଡଲାରକୁ ବୃଦ୍ଧି ପାଇଛି । ଋଣ ବୋଝରେ ଚାପି ହୋଇ ରହିଥିବା ପାକିସ୍ତାନ ଏବେ ସାଧାରଣ ଲୋକଙ୍କ ପାଖରୁ ଅତ୍ୟଧିକ କର ଆଦାୟ କରିବାରେ ଲାଗିଛି । କର ଦେଇପାରୁନଥିବା ଲୋକଙ୍କ ବିଜୁଳୀ ଏବଂ ଗ୍ୟାସ କନେକ୍ସନ କାଟିବାକୁ ଏବଂ ମୋବାଇଲ ସିମ୍ ବ୍ଲକ କରିବାକୁ ସରକାର ଚେତାବନୀ ଦେଉଥିବା ଜଣାପଡ଼ିଛି ।
