ମାଲକାନଗିରି,୦୮/୦୯: ୧୯୯୨ ଅକ୍ଟୋବର ୨ ତାରିଖରେ ମାଲକାନଗିରି ସବଡିଭିଜନକୁ ଜିଲ୍ଲା ଘୋଷଣା କରାଯାଇଥିଲା । ପୂର୍ବରୁ ଏହା କୋରାପୁଟ ଜିଲ୍ଲା ଅଧୀନରେ ଥିଲା । ଜିଲ୍ଲା ବିଭାଜନ ପରେ ରାଜସ୍ୱ ଓ ବନ ବିଭାଗର ସୀମା ନର୍ଦ୍ଧାରଣ ଠିକ୍ରେ ହୋଇ ନ ଥିବାରୁ ଖଇରପୁଟ, ମାଥିଲି ବ୍ଲକର ୨୬ରୁ ଅଧିକ ଗାଁ କେଉଁ ଜିଲ୍ଲା ଅଧୀନରେ ଯାଉଛି ଏପର୍ଯ୍ୟନ୍ତ ଠିକ୍ ହୋଇ ନାହିଁ । ଏସବୁ ଗାଁର ଲୋକେ ଜଙ୍ଗଲ ଜମିପଟ୍ଟା ପାଇବାରୁ ବଞ୍ଚିତ ହେଉଛନ୍ତି । ଜିଲ୍ଲା ଘୋଷଣାର ୩୩ ବର୍ଷ ପରେ ମଧ୍ୟ ସମସ୍ୟା ଦୂର ହୋଇପାରିନି । ଗ୍ରାମବାସୀ ଅସୁବିଧାଭୋଗୁଛନ୍ତି ।
ଗ୍ରାମବାସୀ କହିଛନ୍ତି, ସେମାନେ କୋରାପୁଟ ଜିଲ୍ଲା ଅଧୀନ ଜଙ୍ଗଲରେ ଘର କରି ରହୁଛନ୍ତି । କିନ୍ତୁ ସମସ୍ତ କାମ ପାଇଁ ମାଲକାନଗିରି ଜିଲ୍ଲା ଉପରେ ନିର୍ଭରଶୀଳ । ଆଧାରକାର୍ଡ, ଭୋଟର କାର୍ଡ, ରାସନକାର୍ଡ ସମେତ ଅନ୍ୟ ସରକାରୀ ସୁବିଧା ମାଲକାନଗିରିରୁ ପାଉଛନ୍ତି । ହେଲେ ଘରଗୁଡିକ କୋରାପୁଟ ଜିଲ୍ଲା ଅଧୀନରେ ଥିବାରୁ କେଉଁ ଜିଲ୍ଲାର ଅଧିବାସୀ ତାହା ଜାଣି ପାରୁ ନଥିବା କହିଛନ୍ତି । ନିକଟରେ ବନ ବିଭାଗ ସର୍ଭେରୁ ମଧ୍ୟ ଏହା ସ୍ପଷ୍ଟ ହୋଇଛି । ସମସ୍ୟାର ସମାଧାନ ପାଇଁ ଅଞ୍ଚଳବାସୀ କୋରାପୁଟ ଓ ମାଲକାନଗିରି ପ୍ରଶାସନକୁ ବାରମ୍ବାର ଜଣାଇଆସୁଥିଲେ ମଧ୍ୟ ସମାଧାନ ହୋଇପାରିନାହିଁ । ଖଇରପୁଟ ବ୍ଲକ ଗୋବିନ୍ଦପାଲ୍ଲୀ ପଞ୍ଚାୟତ ସପ୍ତଧାରା ଓ କଷିଗାଡ଼ ନଦୀ ପାଶ୍ୱର୍ ଘାଟି ଉପରେ ୧୫ଟି ଗାଁ ରହିଛି । ସେହିପରି ମାଡକାପଦର ପଞ୍ଚାୟତରେ ୬ଟି ଗାଁ, ମାଥିଲି ବ୍ଲକ ଧୁଙ୍ଗିଆପୁଟ ପଞ୍ଚାୟତରେ ୨ଟି ଗାଁ, କଟନିପାଲ୍ଲୀ ପଞ୍ଚାୟତରେ ଗୋଟିଏ ଗାଁ, କିଆଙ୍ଗ ପଞ୍ଚାୟତରେ ଗୋଟିଏ ଏଭଳି ମୋଟ ୨୬ ଟି ଗାଁ କୋରାପୁଟ ଜିଲ୍ଲା ଅଧୀନରେ ରହିଥିବା ବେଳେ ଗ୍ରାମବାସୀ ମାଥିଲି ଓ ଖଇରପୁଟ ବ୍ଲକ ଦ୍ୱାରା ସମସ୍ତ ସୁବିଧା ପାଉଛନ୍ତି । ଏହି ଗାଁଗୁଡ଼ିକ ରାଜସ୍ୱ ମାନଚିତ୍ରରେ କୋରାପୁଟ ଜିଲ୍ଲା ବୋଲି ଦର୍ଶାଯାଇଛି । ଏଠାରେ ସମସ୍ତ ଉନ୍ନୟନ କାର୍ଯ୍ୟ ମାଲକାନଗିରି ଦ୍ୱାରା ଚାଲିଛି । ପୂର୍ବରୁ ଅନେକ ଲୋକଙ୍କୁ ମାଲିକାନଗିରି ଜିଲ୍ଲା ଦର୍ଶାଇ ଜଙ୍ଗଲ ଜମିପଟ୍ଟା ମଧ୍ୟ ଦିଆଯାଇଛି । ଏବେ ବି ଆହୁରି ଲୋକ ଜଙ୍ଗଲ ଜମିପଟ୍ଟା ପାଇବାରୁ ବଞ୍ଚିତ ଅଛନ୍ତି । ଅନ୍ୟପକ୍ଷେ ମାଥିଲି ବନ ବିଭାଗ ତଦନ୍ତ ରିପୋର୍ଟ ଦେବା ପାଇଁ ଅନିଚ୍ଛା ପ୍ରକାଶ କରୁଛି । ମାଥିଲି ବନାଞ୍ଚଳ ଅଧିକାରୀ ବାସୁଦେବ ନାୟକ କହିଛନ୍ତି, ମୋଟ ୨୬ଟି ଗାଁ କୋରାପୁଟ ଜିଲା ରାଜସ୍ୱ ମାନଚିତ୍ରରେ ଦର୍ଶାଯାଇଥିବାରୁ ସେହି ଗାଁ ଲୋକଙ୍କୁ ଜଙ୍ଗଲ ଜମିପଟ୍ଟା ପ୍ରଦାନ ପାଇଁ ରିପୋର୍ଟ ଦେବା ସମ୍ଭବ ନୁହେଁ । ରାଜସ୍ୱ ମାନଚିତ୍ରରେ ମାଲକାନଗିରି-କୋରାପୁଟ ସୀମା ଗୋବିନ୍ଦପାଲ୍ଲୀ ପୁଲିସ ଚେକ୍ ପୋଷ୍ଟ୍ ନିକଟରେ ରହିଛି । କିନ୍ତୁ ଗୋବିନ୍ଦପାଲ୍ଲୀଠାରୁ ୧୨ କିମି ଦୂର କଷିଗାଡ଼ରେ ମାଲକାନଗିରି-କୋରାପୁଟ ସୀମା ବୋଲି ନାମଫଳକ ଲଗାଯାଇଛି । ଜିଲ୍ଲା ପ୍ରଶାସନ ଠିକ୍ରେ ସୀମା ନିର୍ଦ୍ଧାରଣ କଲେ ଏସବୁ ଗାଁର ଲୋକେ ଉପକୃତ ହୋଇପାରିବେ ।
