ଭୁବନେଶ୍ୱର, ୨୦/୧୧ : ଭୁବନେଶ୍ୱର ଉପକଣ୍ଠ ନୂଆ ସହର କାର୍ଯ୍ୟ ଆଉ ପାଦେ ଆଗକୁ ବଢ଼ିଛି। ନୂଆ ସହର ପାଇଁ ୮ ହଜାର କୋଟି ଟଙ୍କା ଖର୍ଚ୍ଚ ହେବ । ଜମି ଅଧିଗ୍ରହଣ ପାଇଁ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ପ୍ରକ୍ରିୟା ଆରମ୍ଭ ହୋଇଛି । ଖୁବ୍ଶୀଘ୍ର କାମ ଆରମ୍ଭ ହେବ ବୋଲି ଆଜି ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ସୂଚନା ଦେଇଛନ୍ତି । ଗୋଠପାଟଣା, ମଳିପଡ଼ା, ଦାସପୁରକୁ ଲାଗି ଏହି ନ୍ୟୁ ସିଟି ନିର୍ମାଣ ହେବ । ସହରରେ ପ୍ରାୟ ୨ ଲକ୍ଷରୁ ଅଧିକ ଲୋକେ ରହିବା ଭଳି ଭିତ୍ତିଭୂମୀ ନିର୍ମାଣ କରାଯିବ । ରାସ୍ତା, ଡ୍ରେନ୍, ଗମନାଗମନକୁ ଗୁରୁତ୍ୱ ଦିଆଯାଇଛି । ଏନେଇ ନୂଆ ନକ୍କା ପ୍ରସ୍ତୁତ କରିବ ବିଡିଏ।
ଗମନାଗମନକୁ ଦୃଷ୍ଟିରେ ରଖି ନାକାଗେଟ୍ ଛକରୁ କାଟେଣୀ ପର୍ଯ୍ୟନ୍ତ ୪ ଥାକିଆ ରାସ୍ତା ନିର୍ମାଣ କରାଯିବ । ଆଗକୁ ରିଙ୍ଗ ରୋଡ୍ ସହିତ ରାସ୍ତା ସଂଯୋଗ କରିବାକୁ ଯୋଜନା କରାଯାଇଛି । ଟ୍ରାଫିକ୍ ଭିଡ଼ କମାଇବାକୁ ଶାଖା ରାସ୍ତା ନିର୍ମାଣ ହେବ । ସିଟିରେ ମୋ ବସ୍ ଚଳପ୍ରଚଳ କରିବ । ସମ୍ପୂର୍ଣ୍ଣ ଭାବେ ଇ- ବସ ଚଳାଇବାକୁ ପ୍ରସ୍ତାବ ଦିଆଯାଇଛି । ସେଠାରେ ଇ-ବସ୍ ଡିପୋ ନିର୍ମାଣ ହେବ । ମେଟ୍ରୋ ଟ୍ରେନ ସଂଯୋଗ ମଧ୍ୟ କରାଯିବ ବୋଲି ଜଣାପଡ଼ିଛି । ମୋଟ୍ ୮୧୬୯ କୋଟି ଟଙ୍କା ଖର୍ଚ୍ଚ କରିବାକୁ ଟାର୍ଗେଟ ରଖାଯାଇଛି । ଅଞ୍ଚଳ ଉନ୍ନତି ପାଇଁ ୬୦୬୯ କୋଟି ଖର୍ଚ୍ଚ ହେବ । ଏନେଇ କେନ୍ଦ୍ର ସରକାର ମଧ୍ୟ ଅନୁଦାନ ଦେବେ ବୋଲି ଜଣାପଡିଛି ।
ନିକଟରେ କେନ୍ଦ୍ର ସରକାରଙ୍କ ଏକ ଟିମ୍ ଏହାର ସର୍ଭେ କରିଥିଲେ । ସବୁଠୁ ବଡ଼ କଥା ହେଲା ଏହି ନୂଆ ସହରକୁ ସୋଲାର ସିଟି କରିବାକୁ ଲକ୍ଷ୍ୟ ରଖାଯାଇଛି । ସହରରେ ପ୍ରାୟ ୬୦ ପ୍ରତିଶତ ସୌର ଶକ୍ତି ବ୍ୟବହାର କରାଯିବାକୁ ଲକ୍ଷ୍ୟ ରଖାଯାଇଛି ବୋଲି ବିଡିଏ ଉପାଧ୍ୟକ୍ଷ ଏନ୍ ଥିରୁମାଲା ନାଏକ ସୂଚନା ଦେଇଛନ୍ତି । ସହର ଭିତରେ ମାର୍କେଟ କମ୍ପେ୍ଲକ୍ସ, ଷ୍ଟାଡିୟମ, ସିନେମା ହଲ, ଖେଳ ପଡ଼ିଆ, ସ୍କୁଲ, କଲ୍ୟାଣ ମଣ୍ଡପ ନିର୍ମାଣ ହେବ । ୪୦ ପ୍ରତିଶତ ଜାଗା ଫାଙ୍କା ରଖାଯିବ । ସେହିପରି ସହରରେ ଜଳବନ୍ଦୀ ମୁକ୍ତ କରିବାକୁ ସ୍ୱତନ୍ତ୍ର ଡ୍ରେନ୍ ପ୍ଲାନ କରାଯିବାକୁ ଲକ୍ଷ୍ୟ ରଖାଯାଇଛି । ଆରମ୍ଭରୁ ହିଁ ସହର ଭିତରେ ଅଣ୍ଡରଗ୍ରାଉଣ୍ଡ କେବୁଲିଂ କରାଯିବ ।
ରାଜଧାନୀ ଉପକଣ୍ଠରେ ଥିବା ୩ଟି ରାଜସ୍ୱ ଗ୍ରାମ ମଳିପଡା, ଦାସପୁର ଓ ଗୋଠପାଟଣାରେ ପ୍ରାୟ ୮୨୧.୯୬୧ ଏକର ଜମି ଚିହ୍ନଟ କରାଯାଇଛି । ଏହି ଜମିରୁ ମଳିପଡାରେ ଓଡିଶା ରାଜ୍ୟ ଗୃହ ନିର୍ମାଣ ସଂସ୍ଥା (ଓଏସ୍ଏଚ୍ବି) ୨୮.୫୦୦ ଏକର ଜାଗା ରହିଛି । ସେହିପରି ଗୋଠପାଟଣାରେ ୧୯୪ ଏକର ଜଙ୍ଗଲ ଜମି, ଇଡ୍କୋର ୭୯ ଏକର, ସାଧାରଣ ପ୍ରଶାସନର ୭୯ ଏକର ଏବଂ ଘରୋଇ ଜମି ୧୯ ଏକର ରହିଛି । ଦାସପୁରରେ ମୋଟ୍ ୨୧୫ ଏକର ଜମି ରହିଛି । ସେଥିମଧ୍ୟରେ ୧୦୩. ୧୦୫ ଏକର ଗୋଚର ଜମି । ୨୯.୫୧୦ ଜଙ୍ଗଲ ଜମି ଏବଂ ୫ ଏକର ଘରୋଇ ଜମି ରହିଛି । ଖୁବ୍ଶୀଘ୍ର ଏନେଇ ଜମି ଅଧିଗ୍ରହଣ କରାଯିବ। ତା ପୂର୍ବରୁ ପାଚେରୀ ନିର୍ମାଣ କାର୍ଯ୍ୟ ଆରମ୍ଭ ହୋଇଛି । ମୋଟ୍ ୭.୫ କିମି ପାଚେରୀ ନିର୍ମାଣ ହେବ। ସେଥିମଧ୍ୟରୁ ପ୍ରାୟ ୧.୬ କିମି ପାଚେରୀ ନିର୍ମାଣ କାର୍ଯ୍ୟ କରିଛି ବିଡିଏ।
