ଅମୃତସର,୨୩/୦୯: ଖଲିସ୍ତାନୀ ଆତଙ୍କବାଦୀ ଗୁରପତୱନ୍ତ ସିଂହ ପନ୍ନୁ ଦୀପାବଳିରେ ଅଯୋଧ୍ୟାକୁ ଅନ୍ଧାର କରିଦେବା ପାଇଁ ଧମକ ଦେଇଛି । ପଞ୍ଜାବକୁ ମଧ୍ୟ ଚେତାବନୀ ଦେଇ କହିଛି, ଏଥର ରାଜ୍ୟରେ ଯେଉଁମାନେ ଦୀପାବଳି ନ ମନାଇବେ, ସେମାନେ ହିଁ ରହିବେ । ଯେଉଁମାନେ ପାଳନ କରିବେ, ସେମାନଙ୍କୁ ରାଜ୍ୟ ଛାଡ଼ିବାକୁ ହେବ । ଅକ୍ଟୋବର ୧୯ ସୁଦ୍ଧା ପ୍ରବାସୀମାନେ ପଞ୍ଜାବ ଛାଡ଼ି ପଳାଇବାକୁ ସେ ଚେତାବନୀ ଦେଇଛି । ଯଦି ନ ଛାଡ଼ନ୍ତି, ତେବେ ଭୟଙ୍କର ପରିଣାମ ଭୋଗିବାକୁ ହେବ ବୋଲି ସେ କହିଛି ।
ଖଲିସ୍ତାନୀ ଆତଙ୍କବାଦୀ ସଙ୍ଗଠନ ଶିଖ୍ସ ଫର୍ ଜଷ୍ଟିସ୍ (ଏସ୍ଏଫ୍ଜେ)ର ମୁଖ୍ୟ ପନ୍ନୁ ନୂଆ ଭିଡିଓ ଜାରି କରି ଏହି ଧମକ ଦେଇଛି । ନିଜ ଭିଡିଓରେ ସେ ବଟାଲା ରେଳଷ୍ଟେସନର ଭିଡିଓ ସେୟାର କରି କହିଛି, ଷ୍ଟେସନରେ ଖଲିସ୍ତାନୀ ସ୍ଲୋଗାନ ଲେଖାଯାଇଛି । ପନ୍ନୁ ଦାବି କରିଛି ଯେ ସେ ପଞ୍ଜାବ ଡିଜିପି ଗୌରବ ଯାଦବଙ୍କୁ ହିନ୍ଦୁଙ୍କ ସାଥ୍ ନ ଦେବାକୁ ଚେତାବନୀ ଦେଇଛି । ରାଜ୍ୟର ଭଗୱନ୍ତ ମାନ୍ ସରକାରକୁ ବି ଧମକ ଦେଇଛି । ଏହା ପୂର୍ବରୁ ପନ୍ନୁ ଅଗଷ୍ଟ ୧୫ରେ ଟ୍ରେନ୍ରେ ବିସ୍ଫୋରଣ କରିବ ବୋଲି କହିଥିଲା । ଏହି ଦିନ ଦିଲ୍ଲୀ ଅଭିମୁଖେ ଯାଉଥିବା ଟ୍ରେନ୍ରେ ଯାତ୍ରା ନ କରିବାକୁ ସେ କହିଥିଲା । ଯେ କୌଣସି ମୁହୂର୍ତ୍ତରେ ଏଥିରେ ବିସ୍ଫୋରଣ ହେବା ନେଇ ଚେତାଇଥିଲା ପନ୍ନୁ ।
