ନୂଆଦିଲ୍ଲୀ: ଆମ ଆଦମୀ ପାର୍ଟିର ବିଧାୟକ ମଞ୍ଜିନ୍ଦର ସିଂହ ଲାଲପୁରାଙ୍କୁ କୋର୍ଟ ଚାରି ବର୍ଷ ଜେଲ ଦଣ୍ଡାଦେଶ ଶୁଣାଇଛନ୍ତି । ବୁଧବାର (ସେପ୍ଟେମ୍ବର ୧୦) ଦିନ କୋର୍ଟ ଖାଦୁର ସାହିବର ବିଧାୟକଙ୍କୁ ୧୨ ବର୍ଷ ପୁରୁଣା ମାମଲାରେ ଦୋଷୀ ସାବ୍ୟସ୍ତ କରିଥିଲେ । କୋର୍ଟଙ୍କ ରାୟ ପରେ ବିଧାୟକଙ୍କୁ ଗିରଫ କରାଯାଇଥିଲା। ଶୁକ୍ରବାର (ସେପ୍ଟେମ୍ବର ୧୨) ଦିନ କୋର୍ଟ ତାଙ୍କ ରାୟ ଦେଇଥିଲେ। ଲାଲପୁରାଙ୍କ ସହିତ ଆହୁରି ୧୦ ଜଣଙ୍କୁ ଦୋଷୀ ସାବ୍ୟସ୍ତ କରାଯାଇଛି । ୨୦୧୩ ମାର୍ଚ୍ଚ ୩ ତାରିଖରେ ପୀଡିତାଙ୍କୁ ତରନତାରନର ଗୋଇନ୍ଦୱାଲ ସାହିବରେ ଏକ ବିବାହ ଉତ୍ସବରେ କିଛି ପୁଲିସ କର୍ମଚାରୀ, ମଞ୍ଜିନ୍ଦର ସିଂହ ଲାଲପୁରା ଏବଂ ଅନ୍ୟ ଅଭିଯୁକ୍ତମାନେ ଦୁର୍ବ କରିଥିଲେ ।
ଆଇପିସିର ଧାରା ୩୫୪, ୩୨୩, ୫୦୬,୧୪୮,୧୪୯ ଏବଂ ଏସସି-ଏସଟି ଆଇନ ଅନୁଯାୟୀ ମଞ୍ଜିନ୍ଦର ସିଂହ, ୮ ପୁଲିସ କର୍ମଚାରୀ ଏବଂ ଅନ୍ୟ ତିନି ଜଣଙ୍କ ବିରୁଦ୍ଧରେ ମାମଲା ରୁଜୁ କରାଯାଇଥିଲା । ଯଦି କୌଣସି ବିଧାୟକଙ୍କୁ ଦୁଇ ବର୍ଷରୁ ଅଧିକ ଜେଲଦଣ୍ଡ ହୁଏ, ତେବେ ତାଙ୍କର ବିଧାନସଭାର ସଦସ୍ୟତା ରଦ୍ଦ ହେବାର ନିୟମ ରହିଛି । ଯେତେବେଳେ ଏହି ଘଟଣା ସାମ୍ନାକୁ ଆସିଲା, ସେତେବେଳେ ମଞ୍ଜିନ୍ଦର ସିଂହ ଲାଲପୁରା ଜଣେ ଟ୍ୟାକ୍ସି ଡ୍ରାଇଭର ଥିଲେ । ୨୦୨୨ ମସିହାରେ ଆପ ଲାଲପୁରାଙ୍କୁ ତରନତାରନର ଖାଦୁର ସାହିବ ଆନରୁ ଟିକେଟ ଦେଇଥିଲା ଏବଂ ସେ କଂଗ୍ରେସକୁ ୫୫ ହଜାର ୭୫୬ ଭୋଟ ବ୍ୟବଧାନରେ ପରାସ୍ତ କରିଥିଲେ ।
ସେପଟେ ଏହି ମାମଲା ସୁପ୍ରିମକୋର୍ଟରେ ପହଞ୍ଚିଥିଲା। ସୁପ୍ରିମକୋର୍ଟ ଏହି ମାମଲାରେ ସ୍ୱତଃ ତଦନ୍ତ କରି ପୀଡିତା ଏବଂ ଗ୍ରାମର ସରପଞ୍ଚଙ୍କୁ ସୁରକ୍ଷା ଯୋଗାଇ ଦେବାକୁ ନିର୍ଦ୍ଦେଶ ଦେଇଥିଲେ । ୧୯ ମାର୍ଚ୍ଚ ୨୦୧୩ରେ ପଞ୍ଜାବ ଏବଂ ହରିୟାଣା ହାଇକୋର୍ଟ ଏହି ମାମଲାରେ ଜଡିତ ୭ ଜଣ ପୁଲିସ କର୍ମଚାରୀଙ୍କୁ ତୁରନ୍ତ ବଦଳି କରିବାକୁ ନିର୍ଦ୍ଦେଶ ଦେଇଥିଲେ ।
