କଟକ,୨୭/୦୪: ଫୁଟବଲ୍ ଖେଳାଳିଙ୍କୁ ହଷ୍ଟେଲ୍ରେ ରଖି ପ୍ରଶିକ୍ଷଣ ଦେବାର ବ୍ୟବସ୍ଥା ବନ୍ଦ କରିଦେଲା ସାଇ (ଭାରତୀୟ କ୍ରୀଡ଼ା ପ୍ରାଧୀକରଣ) । ଆବାସିକ ବ୍ୟବସ୍ଥା ନୁହେଁ ଏଣିକି ଡେ’ ସ୍କଲାର୍ ଭାବେ ଫୁଟବଲ୍ ଖେଳାଳିମାନେ ସାଇର ପ୍ରଶିକ୍ଷଣ ଗ୍ରହଣ କରିବେ । ସାଇ କର୍ତ୍ତୃପକ୍ଷଙ୍କ ଏ ନିଷ୍ପତ୍ତିକୁ ନେଇ ଅସନ୍ତୋଷ ପ୍ରକାଶ ପାଇଛି । ଏଭଳି ନିଷ୍ପତ୍ତି ଯୋଗୁଁ ଖେଳାଳିଙ୍କ ଶୃଙ୍ଖଳା ରହିବ ନାହିଁ । ଏହାସହିତ ହାତରୁ ଖାଇ ଖେଳିବାକୁ ବାଧ୍ୟ ହେଲେ ଖେଳାଳି । ଗୁରୁତ୍ୱପୂର୍ଣ୍ଣ କଥା ହେଲା, ଏଭଳି ବ୍ୟବସ୍ଥା ଫଳରେ କେବଳ କଟକ ସହରର ଖେଳାଳିମାନେ ଅଧିକ ଉପକୃତ ହେବେ । ଅନ୍ୟ ଜିଲ୍ଲାର ଖେଳାଳିମାନେ ଫୁଟବଲ୍ ପ୍ରଶିକ୍ଷଣ ଗ୍ରହଣ କରିବାକୁ ଚାହୁଁଥିଲେ ସେମାନେ କଟକରେ ଭଡ଼ା ଘର ସହିତ ଖାଦ୍ୟପେୟ ଓ ଅନ୍ୟାନ୍ୟ ଖର୍ଚ୍ଚ ବହନ କରିବାକୁ ବାଧ୍ୟ ହେବେ । ତେଣୁ ଅନ୍ୟ ଜିଲ୍ଲାରୁ ଖେଳାଳିମାନେ ସାଇ ହଷ୍ଟେଲ୍ ଅନ୍ତେବାସୀ ହେବାକୁ ଚାହିଁବେନାହିଁ ।
୧୯୮୭ ମସିହା ମାର୍ଚ୍ଚ ୨୬ତାରିଖରୁ କଟକରେ ପ୍ରତିଷ୍ଠା ହୋଇଛି ସାଇ ଟ୍ରେନିଂ ସେଣ୍ଟର । ଆଥ୍ଲେଟିକ୍ସ, ବାସ୍କେଟବଲ୍, ଫୁଟବଲ, ଭଲିବଲ ଭଳି ବିଭିନ୍ନ ଖେଳକୁଦ ଏଥିରେ ସାମିଲ ରହିଛି । ଦୀର୍ଘ ବର୍ଷ ଧରି କଟକ ସାଇ ଟ୍ରେନିଂ ସେଣ୍ଟରକୁ ଉଠାଇ ନେବାକୁ ମସୁଧା ଚାଲିଆସିଛି । କଟକରେ ହଷ୍ଟେଲ୍ ଭିତ୍ତିଭୂମି ନଥିବା ଦର୍ଶାଇ କିଛି ବର୍ଷ ପୂର୍ବରୁ ହଷ୍ଟେଲ୍ ଉଠାଇ ନେବାକୁ ସବୁ ଯୋଜନା କରାଯାଇଥିଲା । କିନ୍ତୁ ଓଡ଼ିଶା ଅଲିମ୍ପିକ୍ସ ଆସୋସିଏସନ୍ ସହଯୋଗରେ ବାରବାଟୀ ଷ୍ଟାଡିୟମ୍ ପରିସରରେ ସାଇକୁ ହଷ୍ଟେଲ୍ ଚଳାଇବା ପାଇଁ ସୁବିଧା ପ୍ରଦାନ କରାଗଲା । ଯାହାଫଳରେ ସେବେଠାରୁ ବାରବାଟୀ ଷ୍ଟାଡିୟମ୍ ଭିତରେ ସାଇ ଟ୍ରେନିଂ ସେଣ୍ଟର ପରିଚାଳିତ ହେଉଛି । ଫୁଟବଲ୍ ସାଇ ହଷ୍ଟେଲର ଏକ ପ୍ରମୁଖ ବିଭାଗ । ଏଠାରୁ ପୂର୍ବରୁ ବହୁ ଜାତୀୟ ଓ ଅନ୍ତର୍ଜାତୀୟ ସ୍ତରର ଖେଳାଳି ବାହାରିଛନ୍ତି ।
ଦୀର୍ଘ ଚାରି ଦଶନ୍ଧି ଧରି ରାଜ୍ୟ ଫୁଟବଲ୍ ଜଗତକୁ ପ୍ରତିଭା ଯୋଗାଉଥିବା ଏହି ଟ୍ରେନିଂ ସେଣ୍ଟର ପ୍ରତିଷ୍ଠା ହେବା ଦିନରୁ ଅନ୍ତେବାସୀଙ୍କ ଲାଗି ଆବାସିକ (ରେସିଡେନ୍ସିଆଲ୍) ବ୍ୟବସ୍ଥା ରହିଥିଲା । ୩୦ଜଣ ମହିଳା ଓ ପୁରୁଷ ଖେଳାଳି ହଷ୍ଟେଲରେ ରହି ଖେଳିବାର ସୁଯୋଗ ପାଉଥିଲେ। କିନ୍ତୁ ଏବେ ଏ ବ୍ୟବସ୍ଥାକୁ ବନ୍ଦ କରିଦିଆଯାଇଛି । ଆବାସିକ ବ୍ୟବସ୍ଥାକୁ ଉଠାଇ ଦିଆଯାଇଛି । ଏବେ ୨୪ଜଣ ଖେଳାଳି ନନ୍ରେସିଡେନ୍ସିଆଲ୍ ବ୍ୟବସ୍ଥାରେ ସାଇ ହଷ୍ଟେଲରୁ ପ୍ରଶିକ୍ଷଣ ଗ୍ରହଣ କରିବେ । ଏଥିଯୋଗୁଁ ଅନେକ ସମସ୍ୟା ସୃଷ୍ଟି ହେବାର ଆଶଙ୍କା ରହିଛି। ପ୍ରଥମତଃ ଖେଳାଳିମାନେ ହଷ୍ଟେଲରେ ନରହିଲେ ଶୃଙ୍ଖଳିତ ହେବା କଷ୍ଟ ହେବ । ସେହିପରି କେବଳ କଟକ ସହର ବା କଟକ ଜିଲ୍ଲାର ଫୁଟବଲ୍ ଖେଳାଳି ମାନେ ଏହାଦ୍ୱାରା ଅଧିକ ଲାଭ ପାଇବେ । ଅନ୍ୟ ଜିଲ୍ଲାର ଖେଳାଳିମାନେ କଟକରେ ରହି ଖର୍ଚ୍ଚାନ୍ତ ହୋଇ ଅଭ୍ୟାସ କରିବାକୁ ଇଛୁକ ହେବେନାହିଁ ।
ଏ ସମ୍ପର୍କରେ ପୂର୍ବତନ ଜାତୀୟ ଫୁଟବଲ୍ ଖେଳାଳି ନିପେନ୍ଦ୍ର ଦାସଙ୍କୁ ପଚାରିବାରୁ ସେ କହିଛନ୍ତି, ସାଇ କର୍ତ୍ତୃପକ୍ଷଙ୍କ ଏଭଳି ନିଷ୍ପତ୍ତି ଆଦୌ ରୁଚିକର ନୁହେଁ । ଖେଳାଳିମାନଙ୍କୁ ହଷ୍ଟେଲରେ ରହି ଅଭ୍ୟାସ କରିବାକୁ ସୁଯୋଗ ଦେଲେ ଅଧିକ ଲାଭ ମିଳିବ । କିନ୍ତୁ ରେସିଡେନ୍ସିଆଲ୍ ବ୍ୟବସ୍ଥା ଉଠାଇଦେବାକୁ ଏଭଳି ନିଷ୍ପତ୍ତି କାହିଁକି ନିଆଗଲା ତାକୁ ନେଇ ପ୍ରଶ୍ନ ଉଠିଛି । ଅନ୍ୟପକ୍ଷରେ ଏ ସମ୍ପର୍କରେ ସାଇ କେନ୍ଦ୍ରର ଭାରପ୍ରାପ୍ତ ଅଧିକାରୀ ତ୍ରୈଲକ୍ୟନାଥ ସାହୁ କହିଛନ୍ତି, ଏଭଳି ନିଷ୍ପତ୍ତି ଗତବର୍ଷ ଠାରୁ ନିଆଯାଇଥିଲା । ଯେହେତୁ ହଷ୍ଟେଲରେ ଅନ୍ତେବାସୀ ରହିଯାଇଥିଲେ ତେଣୁ ଶେଷ ରେସିଡେନ୍ସିଆଲ୍ ବ୍ୟାଚ୍ ଭାବେ ସେମାନଙ୍କୁ ଗ୍ରହଣ କରାଯାଇଥିଲା । ଏଥର ଯେଉଁ ଫୁଟବଲ୍ ଖେଳାଳି ସାଇରେ ରହିବେ ସେମାନେ ରେସିଡେନ୍ସିଆଲ୍ ବ୍ୟବସ୍ଥାରେ ନୁହେଁ ବରଂ ନନ୍ରେସିଡେନ୍ସିଆଲ୍ ଅନ୍ତେବାସୀ ଭାବେ ପ୍ରଶିକ୍ଷଣ ଗ୍ରହଣ କରିବେ ।
