ଭୁବନେଶ୍ୱର ୧୬/୧୨(ଡା.ଶୁଭେନ୍ଦୁ ନାରାୟଣ ମିଶ୍ର): କେତେକ ପିଲା ଛୋଟ ବେଳୁ ଛୋଟଛୋଟ କଥାରେ ଖୁବ୍ ରାଗିଯାଆନ୍ତି । ସେମାନେ ପରିବାର ଲୋକଙ୍କ ସହ ଭଲରେ କଥାବାର୍ତ୍ତା କରନ୍ତି ନାହିଁ, ଚିଡ୍ଚିଡ଼ା ବ୍ୟବହାର କରନ୍ତି । କିଛି ନୂଆ ଜିନିଷ ପାଇବା ଲୋଭରେ ପିଲା ଏପରି ବ୍ୟବହାର କରିଥାଏ । ଏହିପରି ପିଲାଙ୍କ ରାଗିବା ପଛର କାରଣ ବ୍ୟାବହାରିକ, ମାନସିକ ତଥା ଶାରୀରିକ ମଧ୍ୟ ହୋଇପାରେ । ଅନେକ ସମୟରେ ଅଭିଭାବକ ପିଲାଙ୍କ ରାଗକୁ ଜିଦି ବୋଲି ଧରି ନେଇ ଅବହେଳା କରିଥାନ୍ତି । ଭଲ ଅଭିଭାବକ ଭାବେ ଆପଣ ଏମିତି କରିବା ଉଚିତ ନୁହେଁ । ଏହା ପିଲାର ସ୍ୱାସ୍ଥ୍ୟ ଓ ମନ ଉପରେ ନକାରାତ୍ମକ ପ୍ରଭାବ ପକାଇପାରେ । ତେଣୁ ପ୍ରଥମେ ରାଗିବା ପଛର କାରଣ ବୁଝିବାକୁ ଚେଷ୍ଟା କରନ୍ତୁ ।
ପିଲାଙ୍କ ରାଗର କାରଣ
ପିଲାମାନେ ଅଭିଭାବକଙ୍କ ଉପରେ ନିଜ ଇଚ୍ଛା ଜାହିର କରିବା ପାଇଁ ଅନେକ ପ୍ରକାର ବାହାନା ଖୋଜିଥାନ୍ତି । ସେଥିପାଇଁ କେବେ କେବେ ରାଗିବା ସହ ନ ଖାଇବାର ଧମକ ଦେଇଥାନ୍ତି । ସେମାନେ ଭାବନ୍ତି ଏପରି କରିବା ଦ୍ୱାରା ଅଭିଭାବକ ସେମାନଙ୍କ ଜିଦ୍ ମାନି ନେବେ । କେବେ କେବେ ପିଲା ରାଗିଯାଇ ଘରେ ବିଭିନ୍ନ ଜିନିଷ ଭଙ୍ଗାରୁଜା କରେ ଏବଂ ସ୍କୁଲ ଯାଏନି । ଅନେକ ସମୟରେ ଦେଖାଯାଏ ଘର ପରିବର୍ତ୍ତନ କଲେ ନୂଆ ଜାଗାକୁ ଯାଇ ପ୍ରଥମେ ନୂଆ ସାଙ୍ଗସାଥୀ କରିବା କଷ୍ଟକର ହୋଇଥାଏ । ଏହି ସ୍ଥିତିରେ ପିଲା ଉଦାସ ରହିବା ସହ ବାପା-ମା’ଙ୍କ ଉପରେ ରାଗେ । ନୂଆ ଜାଗାରେ ଖାପ ଖୁଆଇ ଚଳିବା ପରେ ପୁଣି ସ୍ୱାଭାବିକ ହୋଇଯାଏ । ଏହା ବ୍ୟତୀତ ବୟସ ବଢ଼ିବା ସହ ଅନେକ ସମୟରେ ପିଲାଙ୍କ ସ୍ୱଭାବରେ ପରିବର୍ତ୍ତନ ସାଙ୍ଗସାଥୀ, ପରିବେଶ ଓ ପାରିପାଶ୍ୱିର୍କ ପରିସ୍ଥିତି ଯୋଗୁ ହୋଇଥାଏ । ବିପରୀତ ପରିସ୍ଥିତି ଯୋଗୁ ସେମାନଙ୍କ ସ୍ୱଭାବରେ ଜିଦି ଓ ରାଗ ଆସିଥାଏ । ପୁଣି କେତେକ କ୍ଷେତ୍ରରେ ପରିବାରରେ ବରିଷ୍ଠ ସଦସ୍ୟମାନଙ୍କ ଝଗଡ଼ାଝାଟି ଦେଖି କିଛି ପିଲା ଝଗଡ଼ା ଶିଖିଥାନ୍ତି ।
ସ୍କୁଲରେ କିଛି ପିଲା ଅନ୍ୟ ପିଲାଙ୍କୁ କମେଣ୍ଟ୍ କରିବା କିମ୍ବା ହଇରାଣ କରିବା ଦ୍ୱାରା ସେମାନେ ଘରକୁ ଆସି ନିଜର ରାଗ ପ୍ରକାଶ କରିଥାନ୍ତି । ସେହିପରି ପରୀକ୍ଷା ବା ସ୍କୁଲ ଟାସ୍କ କରି ନପାରିଲେ ମଧ୍ୟ ରାଗ ପ୍ରକାଶ କରିଥାନ୍ତି। ଏହାବ୍ୟତୀତ ପିଲାଙ୍କଠାରୁ ଅଭିଭାବକଙ୍କ ଆଶା ଅଧିକ ରହିଥିଲେ ଏବଂ ତାହା ପୂରଣ ହୋଇ ନପାରିଲେ ସେମାନେ ହତାଶ ଅନୁଭବ କରନ୍ତି ଓ ରାଗନ୍ତି ।
ସ୍ନାୟୁଗତ ସମସ୍ୟା: ଅନେକ ସମୟରେ ସ୍ନାୟୁଜନିତ ଅସନ୍ତୁଳନ କାରଣରୁ ପିଲାଙ୍କ ଭିତରେ ରାଗ ଆସିଥାଏ । କିନ୍ତୁ ଅଭିଭାବକ ପିଲାଙ୍କ ଏହି ସମସ୍ୟାକୁ ବୁଝିପାରି ନଥାନ୍ତି । ପୁଣି ଏଭଳି ପିଲାଙ୍କ ରାଗର କାରଣ ଅଟିଜିମ୍, ଏସ୍ପଗର୍ ସିଣ୍ଡ୍ରୋମ୍ ଓ ଟୋରେଟ୍ ସିଣ୍ଡ୍ରୋମ୍ ଆଦି ମଧ୍ୟ ହୋଇପାରେ । ଏଭଳି ସମସ୍ୟା ଥିଲେ ପିଲାର ମୁଣ୍ଡରେ ଯନ୍ତ୍ରଣା ହେବା ସହ ମନ ଅଥୟ ହୋଇଥାଏ ।
ବଂଶାନୁକ୍ରମିକ: କେତେକ କ୍ଷେତ୍ରରେ ଅଭିଭାବକ ଯଦି ଅଧିକ କ୍ରୋଧୀ ସ୍ୱଭାବର ହୋଇଥାନ୍ତି, ସେମାନଙ୍କ ପିଲାମାନେ ମଧ୍ୟ ରାଗୀ ହୋଇପାରନ୍ତି । ସେହି ପିଲାମାନେ ପ୍ରତିଟି ଛୋଟ ଛୋଟ କଥାରେ କ୍ରୋଧ ପ୍ରକାଶ କରିଥାନ୍ତି । ବାପାମା’ ଜଣେ କେହି ରାଗୀ ହୋଇଥିଲେ ପିଲାମାନେ ସେହି ଗୁଣକୁ ବଂଶାନୁକ୍ରମିକ ଭାବେ ଗ୍ରହଣ କରିଥାଇ ପାରନ୍ତି ।
ନିୟନ୍ତ୍ରଣ କରିବେ କିପରି
> ଅଭିଭାବକଙ୍କୁ ପ୍ରଥମେ ପିଲାଙ୍କ ରାଗର କାରଣ ଖୋଜିବାକୁ ପଡ଼ିବ । ପରେ ତା’ ବ୍ୟବହାରକୁ ସୁହାଇବା ଭଳି ଅନୁରୂପ ବ୍ୟବହାର କରିବେ। ଯେମିତିକି ଯଦି ପିଲାଟି କୌଣସି ଜିନିଷକୁ ନେଇ ଜିଦ୍ କରୁଛି ତାକୁ ସ୍ନେହରେ ବୁଝାଇବାକୁ ଚେଷ୍ଟା କରିବେ ।
> ଯଦି ପିଲାଟି ବିନା କାରଣରେ ରାଗିଥାଏ, ତେବେ କିଛି ସମୟ ପାଇଁ ତାକୁ ଏକା ଛାଡ଼ି ଦିଅନ୍ତୁ ।
> ଯଦି ଘର ପରିବର୍ତ୍ତନ ବା ସାଙ୍ଗମାନଙ୍କଠାରୁ ଦୂରେଇବା ଯୋଗୁ ପିଲାଟି ରାଗୁଥାଏ ବା ଜିଦ୍ କରୁଥାଏ, ତେବେ ପିଲାଟିକୁ ଟିକେ ଅଧିକ ସ୍ନେହ ଦେବା ସହ ନୂଆ ସାଙ୍ଗ କରିବାରେ ସାହାଯ୍ୟ କରନ୍ତୁ ।
> ପିଲାଙ୍କୁ କେବେ ବି ମାରନ୍ତୁ ନାହିଁ । ମାରିବା ଦ୍ୱାରା ସେ ଅଧିକ ଚିଡ୍ଚିଡ଼ା ହୋଇପାରେ । ଯଦି ପିଲାକୁ କୌଣସି ରୋଗ ଥାଏ, ତେବେ ତୁରନ୍ତ ଡାକ୍ତରଙ୍କ ପରାମର୍ଶ ନେଇ ଚିକିତ୍ସା କରାନ୍ତୁ ।
> କେତେକ ମାନସିକ ରୋଗ ଯେମିତି ଅଟିଜିମ୍, ଏଡିଏସ୍ଟି, ଆଙ୍ଗ୍ଜାଇଟି ଡିଜ୍ଅର୍ଡର ଓ ଲର୍ଣ୍ଣିଂ ଡିଜ୍ଅର୍ଡର ପରି ସମସ୍ୟା କିମ୍ବା ହର୍ମୋନାଲ୍ ପରିବର୍ତ୍ତନ ପାଇଁ ପିଲାଙ୍କ ଭିତରେ ରାଗ ଆସିଥାଏ । ସେଥିରେ ବିଭିନ୍ନ ଆଗ୍ରେସିଭ୍ ଭିଡିଓ ଗେମ୍ ଦେଖିବା ଦ୍ୱାରା ସେମାନଙ୍କ ଭିତରେ କ୍ରୋଧଭାବ ବଢ଼ିଚାଲେ । ପିଲାଙ୍କଠାରୁ ମୋବାଇଲ୍ ନେଇଗଲେ ସେମାନେ ଏକାଗ୍ରତା ହରାଇ ନିଜ ରାଗ ଜାହିର କରିବାକୁ ଯାଇ ଘରର ବିଭିନ୍ନ ଜିନିଷପତ୍ର ଫିଙ୍ଗାଫୋପଡ଼ା କରିଥାନ୍ତି । ଏହି ସ୍ଥିତିରେ ପିଲାକୁ ତୁରନ୍ତ ଡାକ୍ତରଙ୍କ ପାଖକୁ ନେବା ଦରକାର ।
