- ଘୋଷଣା ହେଲେ ବାଂଲାଦେଶରେ ନିର୍ବାଚନ ତାରିଖ
- ଆସନ୍ତା ବର୍ଷ ୨୬ ଫେବୃଆରୀରେ ଇଲେକ୍ସନ
- ବାଦ୍ ପଡିଲା ହସିନାଙ୍କ ପାର୍ଟି
- ମତାଧିକାର କରିବେ ୧୨.୮ ଲକ୍ଷ ଭୋଟର
ନୂଆଦିଲ୍ଲୀ,୧୧।୧୨: ବାଂଲାଦେଶରେ ତ୍ରୟୋଦଶ ସଂସଦୀୟ ନିର୍ବାଚନ ୧୨ ଫେବୃଆରୀ ୨୦୨୬ ରେ ଅନୁଷ୍ଠିତ ହେବ। ବାଂଲାଦେଶର ମୁଖ୍ୟ ନିର୍ବାଚନ କମିଶନର ଏଏମଏମ ନାସିର ଉଦ୍ଦିନ ଗୁରୁବାର ସନ୍ଧ୍ୟାରେ ନିର୍ବାଚନ କାର୍ଯ୍ୟସୂଚୀ ଘୋଷଣା କରିଛନ୍ତି। ମୁଖ୍ୟ ନିର୍ବାଚନ କମିଶନର କହିଛନ୍ତି ଯେ ୧୨ ଫେବୃଆରୀ ସକାଳ ୭:୩୦ ରୁ ଅପରାହ୍ନ ୪:୩୦ ପର୍ଯ୍ୟନ୍ତ ଭୋଟ ଗ୍ରହଣ କରାଯିବ। ଏଥର, ଭୋଟ ଗ୍ରହଣ ସମୟକୁ ଗୋଟିଏ ଘଣ୍ଟା ବୃଦ୍ଧି କରାଯାଇଛି କାରଣ ସେହି ଦିନ ଏକ ଜନମତ ସଂଗ୍ରହ ମଧ୍ୟ କରାଯିବ।
୧୨ ଫେବୃଆରୀରେ ଜୁଲାଇ ଚାର୍ଟର କାର୍ଯ୍ୟକାରୀ କରିବା ପାଇଁ ଏକ ଜନମତ ଅନୁଷ୍ଠିତ ହେବ। ନିର୍ବାଚନ କମିଶନଙ୍କ ଅନୁଯାୟୀ, ଏହି ଜନମତ ଜାତୀୟ ସମ୍ବିଧାନର କାର୍ଯ୍ୟାନ୍ୱୟନ ଉପରେ ହେବ। ଶେଖ ହାସିନାଙ୍କ ଦଳ, ଆୱାମୀ ଲିଗ୍, ଏହି ନିର୍ବାଚନରେ ଅଂଶଗ୍ରହଣ କରିପାରିବ ନାହିଁ କାରଣ ଏହା ପୂର୍ବରୁ ହିଁ ଦଳ ଉପରେ ବ୍ୟାନ୍ ଲଗାଯାଇ ସାରିଛି।
ମୋଟ ୧୨.୮ ଲକ୍ଷ ଭୋଟର
ନିର୍ବାଚନ କମିଶନଙ୍କ ଅନୁଯାୟୀ, ନୂତନ ସରକାରକୁ ନିର୍ବାଚିତ କରିବା ପାଇଁ ମୋଟ ୧୨.୮ ଲକ୍ଷଭୋଟର ସେମାନଙ୍କର ମତଦାନ କରିବେ। ଏଥିରେ ୬.୪୨ ଲକ୍ଷ ପୁରୁଷ ଏବଂ ୬.୨୮ ଲକ୍ଷ ମହିଳା ରହିଛନ୍ତି। ନିର୍ବାଚନୀ ଆଚାର ସଂହିତାକୁ କଡ଼ାକଡ଼ି ଭାବରେ ଲାଗୁ କରିବା ପାଇଁ ପ୍ରତ୍ୟେକ ଜିଲ୍ଲାରେ ଦୁଇଜଣ ଡେପୁଟି କମିଶନର (ଡିସି) ନିଯୁକ୍ତ କରାଯିବ। ଏହା ସହିତ, ପ୍ରାୟ ୩୦,୦୦୦ ଏନଆରବି (ବିଦେଶରେ ରହୁଥିବା ବାଂଲାଦେଶୀ ନାଗରିକ) ମଧ୍ୟ ଏହି ନିର୍ବାଚନରେ ସେମାନଙ୍କର ମତଦାନ କରିପାରିବେ।
ସଂସଦୀୟ ନିର୍ବାଚନ ପାଇଁ ମତପତ୍ର ଧଳା ରଙ୍ଗର ହେବ। ସେଭଳି ଜନମତ ସଂଗ୍ରହ ପାଇଁ ମତପତ୍ର ଗୋଲାପୀ ରଙ୍ଗର ହେବ। ନିର୍ବାଚନ କମିଶନଙ୍କ ଅନୁଯାୟୀ, ଏଥର ୫୬ ଟି ଦଳ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛନ୍ତି। ବିଶେଷଜ୍ଞମାନେ କହିଛନ୍ତି ଯେ ମୁଖ୍ୟ ପ୍ରତିଦ୍ୱନ୍ଦ୍ୱିତା BNP (ବାଂଲାଦେଶ ନ୍ୟାସନାଲିଷ୍ଟ ପାର୍ଟି), ଜମାତ-ଏ-ଇସଲାମି ଏବଂ ନବଗଠିତ NCP (ନ୍ୟାସନାଲ ସିଟିଜେନ୍ସ ପାର୍ଟି) ମଧ୍ୟରେ ହେବ।
ଉଲ୍ଲେଖନୀୟ ଯେ, ବାଂଲାଦେଶରେ ରାଜନୈତିକ ଅସ୍ଥିରତା ଦେଖାଦେଇଛି। ଲଗାତାର ହିଂସାତ୍ମକ ପ୍ରତିବାଦ ଏବଂ ଜନସାଧାରଣଙ୍କ ଚାପ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ୫ ଅଗଷ୍ଟ ୨୦୨୪ ରେ ଇସ୍ତଫା ଦେବାକୁ ବାଧ୍ୟ କରିଥିଲା। ପଦବୀ ଖାଲି ହେବା ପରେ, ଦେଶକୁ ଚଳାଇବା ପାଇଁ ନୋବେଲ ପୁରସ୍କାର ବିଜେତା ମହମ୍ମଦ ୟୁନୁସଙ୍କ ନେତୃତ୍ୱରେ ଅନ୍ତରୀଣ ସରକାରକୁ ଗଠନ କରାଯାଇଥିଲା। ଏହା ପରେ ମଧ୍ୟ, ବାଂଲାଦେଶରେ ହିଂସା ଥମୁନି।
