ଭୁବନେଶ୍ୱର,୨୪/୦୩: ଅପରାଧ ନିୟନ୍ତ୍ରଣ ସହ ଆଇନଶୃଙ୍ଖଳା ସମ୍ଭାଳିବାରେ ନୟାନ୍ତ ହେଉଛି ଭୁବନେଶ୍ୱର ୟୁପିଡି ପୁଲିସ । ହତ୍ୟା, ଦୁଷ୍କର୍ମ, ଗୋଷ୍ଠୀ ସଂଘର୍ଷ, ଲୁଟ୍, ଛିନ୍ତାଇ, ଡକାୟତି ଭଳି ଅପରାଧ ନିୟନ୍ତ୍ରଣରେ ଛନ୍ଦି ହୋଇପଡୁଛନ୍ତି ପୁଲିସ । ତା’ଠୁ ବଳି ଯାଉଛି ଧାରଣା, ବିକ୍ଷୋଭ, ଧର୍ମଘଟ ଓ ଭିଭିଆଇପିଙ୍କ ଗସ୍ତରେ ଆଇନଶୃଙ୍ଖଳା ପରିଚାଳନା । ରାଜଧାନୀ ରାଜରାସ୍ତାରେ ଲକ୍ଷ ଲକ୍ଷ ଗାଡିମୋଟର ଟ୍ରାଫିକ୍ ନିୟନ୍ତ୍ରଣ ଓ ପର୍ବପର୍ବାଣୀର ଭିଡ଼ ପରିଚାଳନା କଥା ନ କହିବା ଭଲ । ଏସବୁ ଚାପରୁ ମୁକ୍ତ ହେବା ପାଇଁ କମିଶନରେଟ୍ ପୁଲିସ ଏନେଇ ପୁଲିସ ମହାନିର୍ଦ୍ଦେଶକ (ଡିଜିପି)ଙ୍କୁ ପ୍ରସ୍ତାବ ଦେଇଛି ।
ପ୍ରସ୍ତାବ ଅନୁସାରେ, ୨ ଭାଗ ହେବ ଭୁବନେଶ୍ୱର ୟୁପିଡି । ପୂର୍ବ-ଭୁବନେଶ୍ୱର ଓ ପଶ୍ଚିମ-ଭୁବନେଶ୍ୱରରେ ବଣ୍ଟାଯିବ । ପ୍ରତି ୟୁପିଡିରେ ୩ଟି ଲେଖାଏଁ ଜୋନ୍ ରହିବ । ପୂର୍ବ-ଭୁବନେଶ୍ୱର ୟୁପିଡିରେ ୧୩ଟି ଥାନା ଓ ପଶ୍ଚିମ-ଭୁବନେଶ୍ୱର ୟୁପିଡିରେ ୧୪ଟି ଥାନା ରହିବ । ଗୋଟିଏ ଲେଖାଏଁ ଟ୍ରାଫିକ୍ ଥାନା ରହିବ । ଭୁବନେଶ୍ୱର ୟୁପିଡିର ନୂଆ ରୂପରେଖ ପାଇଁ ଏସ୍ପି ପାହ୍ୟାର ଜଣେ ଡିସିପି, ଅତିରିକ୍ତ ଏସ୍ପି ପାହ୍ୟାର ୨ଜଣ ଅତିରିକ୍ତ ଡିସିପି, ଡିଏସ୍ପି ପାହ୍ୟାର ୪ଜଣ ଏସିପି, ୩ଜଣ ଇନ୍ସପେକ୍ଟର, ୨୫ ଜଣ ସବ୍ଇନ୍ସପେକ୍ଟର ସମେତ ୧୨୬ଟି ନୂଆ ପଦବି ଓ ୫ ପ୍ଲାଟୁନ୍ ଏପିଆର୍ ଫୋର୍ସ ଦରକାର ବୋଲି ପ୍ରସ୍ତାବ ଦିଆଯାଇଛି ।
ରାଜଧାନୀରେ ବିଧାନସଭା, ଲୋକସେବା ଭବନ, ରାଜଭବନ, ମୁଖ୍ୟମନ୍ତ୍ରୀଙ୍କ ବାସଭବନରେ ୨୪ ଘଣ୍ଟିଆ ପ୍ରହରା ଦିଆଯାଉଛି । ଶହଶହ ନେତାମନ୍ତ୍ରୀଙ୍କ ଘର ଏଠି । ସବୁଠୁ ବଡ଼ ବିମାନବନ୍ଦର, ରେଳଷ୍ଟେସନ ଓ ବସ୍ଷ୍ଟାଣ୍ଡ ସହ ସର୍ବାଧିକ ଶିକ୍ଷାନୁଷ୍ଠାନ ଓ ଘରୋଇ ହସ୍ପିଟାଲ ସହରରେ ଅଛି । ହଜାର ହଜାର ସଂଖ୍ୟାରେ ବ୍ୟବସାୟିକ ପ୍ରତିଷ୍ଠାନ ଗଢ଼ିଉଠିଛି ।
ପୂର୍ବତନ ପୁଲିସ ମହାନିର୍ଦ୍ଦେଶକ(ଡିଜିପି) ସଞ୍ଜୀବ ମାରିକ୍ କହିଛନ୍ତି, ଭୁବନେଶ୍ୱର ଜନସଂଖ୍ୟା ଏତେ ବି ବଢ଼ିନି । କିନ୍ତୁ ଏବେଠୁ ପଲିସି ଲାଗୁ ହେଲେ, ଆଗକୁ ଆଇନଶୃଙ୍ଖଳା ସହ ଅପରାଧ ନିୟନ୍ତ୍ରଣ ସହଜ ହୋଇପାରିବ । କାହିଁକି ନା, ଦିଲ୍ଲୀ ଓ ମୁମ୍ବାଇ ଭଳି ଅନ୍ୟ ସହରରେ ଅନେକ ଆଗରୁ ଏଭଳି ବ୍ୟବସ୍ଥା ରହିଛି । ଥାନାର ସୀମା ନିର୍ଦ୍ଧାରଣ ଉପରେ ବି ଧ୍ୟାନ ଦିଆଯାଉ ।
ବଢ଼ୁଛି ଜନସଂଖ୍ୟା ସହ ଅପରାଧ
କାୟା ମେଲାଇ ଚାଲିଥିବା ରାଜଧାନୀର ଜନସଂଖ୍ୟା ବଢ଼ୁଛି । ତା’ ସହ ଅପରାଧ ଗ୍ରାଫ୍ ବି ବଢ଼ିଚାଲିଛି । ୨୦୦୮ ମସିହାରେ ଜନସଂଖ୍ୟା ୧୨ ଲକ୍ଷ ୬୬ ହଜାର ଥିବା ବେଳେ ୨୦୧୫ ବେଳକୁ ରାଜଧାନୀବାସୀଙ୍କ ସଂଖ୍ୟା ୧୬ ଲକ୍ଷ ୮୯ ହଜାରରେ ପହଞ୍ଚିଥିଲା । ୨୦୨୫ରେ ଲୋକସଂଖ୍ୟା ଗ୍ରାଫ୍ ୨୭ ଲକ୍ଷ ୬୪ ହଜାର ଟପିଲାଣି । କମିଶନରେଟ୍ ପୁଲିସ ଆରମ୍ଭ ବେଳକୁ ୧୬ଟି ଥାନା ଥିବା ବେଳେ ୨୦୨୫ ବେଳକୁ ଥାନା ସଂଖ୍ୟା ୨୯ରେ ପହଞ୍ଚିଲାଣି । ୨୦୦୮ ମସିହାରେ ୪୫୬୬ଟି ଅପରାଧିକ ମାମଲା ରୁଜୁ ହୋଇଥିବା ବେଳେ ୨୦୨୫ ବେଳକୁ ଏହି ସଂଖ୍ୟା ୧୩ ହଜାର ୪୧୧ରେ ପହଞ୍ଚିଲାଣି । ୨ଟି ଟ୍ରାଫିକ୍ ଥାନା ବି ହେଲାଣି ।
ବର୍ଷକରେ ୩୮୦୦ ଭିଆଇପି ବ୍ୟବସ୍ଥା
ଏତେ ମାତ୍ରାରେ ଅପରାଧ ନିୟନ୍ତ୍ରଣରେ ପୁଲିସ ନୟାନ୍ତ ହେଉଛି । ତା’ସହ ପୁଲିସ ପାଇଁ ଅତିରିକ୍ତ ବୋଝ ପାଲଟିଛି ଧାରଣା, ବିକ୍ଷୋଭ, ହରତାଲ, ଧର୍ମଘଟ ଓ ପର୍ବପର୍ବାଣୀ । ଭିଆଇପିଙ୍କ ଗସ୍ତ ଓ ରାଜନୈତିକ କାର୍ଯ୍ୟକ୍ରମ ପରିଚଳନା ମଧ୍ୟ ପୁଲିସର ମୁଣ୍ଡ ବିନ୍ଧାଉଛି । ଗତବର୍ଷ ଏସବୁ ଝିନ୍ଝଟ୍ ପାଇଁ ପୁଲିସକୁ ୫୧୭୯ ଥର ଅତିରିକ୍ତ ପରିଚାଳନା ଦାୟିତ୍ୱ ସମ୍ଭାଳିବାକୁ ପଡ଼ିଥିଲା । ଯେଉଁଥିରୁ ମୋଟ ୩୭୯୯ଥର ଭିଆଇପିଙ୍କ ପାଇଁ ପରିଚାଳନା ବ୍ୟବସ୍ଥା କରାଯାଇଥିଲା । ବାକି ଧାରଣା, ବିକ୍ଷୋଭ, ଧର୍ମଘଟ ଓ ପର୍ବପର୍ବାଣୀ ପରିଚାଳନା ପାଇଁ ୧୩୭୭ ଥର ଆଇନଶୃଙ୍ଖଳା ବ୍ୟବସ୍ଥା ଜଗିବାକୁ ପଡିଥିଲା ।
୧୪୫୪ଜଣଙ୍କୁ ମିଳୁଛି ପୁଲିସ୍ ସୁରକ୍ଷା
୨୦୦୮ ମସିହାରେ ମାତ୍ର ୫୦୨ଜଣଙ୍କୁ ପୁଲିସ ସୁରକ୍ଷା ଯୋଗାଯାଉଥିଲା । ୨୦୨୪ରେ ପୁଲିସଠାରୁ ସୁରକ୍ଷା ପାଉଥିବା ବ୍ୟକ୍ତିବିଶେଷଙ୍କ ସଂଖ୍ୟା ୧୪୫୪ ଛୁଇଁଲାଣି । କମିଶନରେଟ୍ ପୁଲିସ ଆରମ୍ଭ ବେଳେ ୩୬୮ଜଣ ରାଜନେତା ଓ ଭିଭିଆଇପିଙ୍କୁ ଜେଡ୍ ପ୍ଲସ ସୁରକ୍ଷା ଦିଆଯାଇଥିଲା । ୨୦୨୪ରେ ୫୨୭ଜଣଙ୍କୁ ଜେଡ୍ ପ୍ଲସ୍ ସୁରକ୍ଷା ଦିଆଯାଇଛି । ସେତେବେଳେ ୧୭ଜଣ ଜେଡ୍ ସୁରକ୍ଷା ପାଉଥିବା ବେଳେ ଏହି ସଂଖ୍ୟା ୧୪୬ରେ ପହଞ୍ଚିଲାଣି ।
