ପାଟନା,୧୩/୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ବିହାର ଗସ୍ତ କରି ରାଜ୍ୟବାସୀଙ୍କୁ ୧୨ ହଜାର କୋଟି ଟଙ୍କାର ପ୍ରକଳ୍ପ ଭେଟି ଦେଇଛନ୍ତି । ଏହା ସହିତ ଏକ ଜନସଭାକୁ ସମ୍ବୋଧନ କରିଛନ୍ତି । ଏହି ସମୟରେ ଏକ ରୋଚକ ଘଟଣା ଦେଖିବାକୁ ମିଳିଛି । ବିହାର ମୁଖ୍ୟମନ୍ତ୍ରୀ ନୀତିଶ କୁମାର ମଞ୍ଚରେ ପ୍ରଧାନମନ୍ତ୍ରୀଙ୍କ ପାଦ ଛୁଇଁଥିବା ଦେଖିବାକୁ ମିଳିଛି । ଏହି ସମୟରେ ପ୍ରଧାନମନ୍ତ୍ରୀ ତାଙ୍କ ହାତକୁ ଧରି ନେଇଥିବା ଦେଖିବାକୁ ମିଳିଛି । ଯାହାର ଭିଡିଓ ସାମ୍ନାକୁ ଆସିଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିହାର ଦରଭଙ୍ଗାରେ ଆୟୋଜିତ କାର୍ଯ୍ୟକ୍ରମରେ ପହଞ୍ତିବା ପରେ ମୁଖ୍ୟମନ୍ତ୍ରୀ ନୀତିଶ କୁମାର ତାଙ୍କ ପାଦ ଛୁଇଁ ଆଭିବାଦନ ଜଣାଇଥିଲେ । ଏହି ସମୟରେ ମଞ୍ଚରେ ବିଜେପି ଓ ଜେଡିୟୁର ଏକାଧିକ ନେତା ଉପସ୍ଥିତ ଥିଲେ । ଏହି ସମୟର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଏହା ପୂର୍ବରୁ ମଧ୍ୟ ନୀତିଶ କୁମାର ମଞ୍ଚରେ ମୋଦିଙ୍କ ପାଦ ଛୁଇଁ ପ୍ରଣାମ କରି ସାରିଛନ୍ତି । ଦିଲ୍ଲୀରେ ଏନଡିଏର ସଂସଦୀୟ ବୈଠକେ ନୀତିଶ କୁମାର ମୋଦିଙ୍କ ପାଦ ଛୁଇଁବାକୁ ଚେଷ୍ଟା କରିଥିଲେ ମାତ୍ର ସେ ତାଙ୍କ ହାତକୁ ଧରି ନେଇଥିଲେ ।
ବିହାରବାସୀଙ୍କ ପାଇଁ ଏକାଧିକ ପ୍ରକଳ୍ପର ଶିଳାନ୍ୟାସ କରିବା ସହିତ ଜନସଭାକୁ ସମ୍ବୋଧନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ରାଜ୍ୟବାସୀଙ୍କ ପାଇଁ ଏମ୍ସର ଶିଳାନ୍ୟାସ କରିବା ସହିତ ୧୨ ହଜାର କୋଟି ଟଙ୍କାର ପ୍ରକଳ୍ପ ଭେଟି ଦେଇଛନ୍ତି ପ୍ରଧାନମନ୍ତ୍ରୀ । ଆମ ସରକାର ଦେଶରେ ଉନ୍ନତ ସ୍ବାସ୍ଥସେବା ପାଇଁ କାର୍ଯ୍ୟ କରୁଛି। ଆଗମୀ ୫ବର୍ଷ ମଧ୍ୟରେ ୭୫ ହଜାର ନୂଆ ମେଡିକାଲ ପଢିବା ନେଇ ସିଟ ବାହାରିବ । ହିନ୍ଦୀ ଓ ଅନ୍ୟ ଭାଷାରେ ମେଡିକାଲ ପାଠ ପଢିବା ନେଇ ବିକଳ୍ପ ଦିଆଯିବ। ବନ୍ୟା ପାଇଁ କୋସି ଓ ମିଥିଳାର ଲୋକ ଯେଉଁ ସମସ୍ୟା ଭୋଗୁଥିଲେ ତାର ସମାଧାନ ହେବ । ଏ ନେଇ ଖୁବଶୀଘ୍ର ବଜେଟ ଆସିବ ବୋଲି ଜନସଭାକୁ ସମ୍ବୋଧନ କରି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
