ମୁମ୍ବାଇ,୨୪/୧୦: ଭାରତର ଉଦୀୟମାନ ପେସ୍ ବୋଲିଂ ଅଲ୍ରାଉଣ୍ଡର ନିତିଶ କୁମାର ରେଡ୍ଡୀଙ୍କୁ ଆଗାମୀ ବର୍ଡର-ଗାଭାସ୍କର ଟ୍ରଫି ପାଇଁ ଭାତୀୟ ଦଳରେ ସ୍ଥାନ ମିଳିବାର ଯଥେଷ୍ଟ ସମ୍ଭାବନା ରହିଛି । ନିତିଶ ସମ୍ପ୍ରତି ନ୍ୟୁଜିଲାଣ୍ଡ ବିପକ୍ଷରେ ଟେଷ୍ଟ ସିରିଜ ଖେଳୁଥିବା ଭାରତୀୟ ଦଳର ରିଜର୍ଭ ଖେଳାଳି ଭାବେ ରହିଛନ୍ତି ।
ବର୍ଡର-ଗାଭାସ୍କର ଟ୍ରଫି ପାଇଁ ଖୁବ୍ ଶୀଘ୍ର ଦଳ ଘୋଷଣା କରାଯିବ । ଦଳରେ ପେସ୍ ବୋଲିଂ ଅଲ୍ରାଉଣ୍ଡରଙ୍କୁ ସ୍ଥାନ ଦେବାକୁ ଚୟନ କମିଟି ଚିନ୍ତା କରୁଛି । ଭାରତର ଏକ ମାତ୍ର ପେସ୍ ବୋଲିଂ ଅଲ୍ରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଟେଷ୍ଟ କ୍ରିକେଟ୍ ପ୍ରତି ଆଗ୍ରହୀ ନଥିବା ପୂର୍ବରୁ ସ୍ପଷ୍ଟ ହୋଇ ସାରିଛି । ତେଣୁ ନିତିଶ ଏକମାତ୍ର ପେସ ବୋଲିଂ ଅଲରାଉଣ୍ଡର ଭାବେ ଉଭା ହୋଇଛନ୍ତି । ନିକଟରେ ସେ ବାଂଲାଦେଶ ବିପକ୍ଷରେ ଟି-ଟ୍ୱେଣ୍ଟି ସିରିଜ ଖେଳି ଚମତ୍କାର ପ୍ରଦର୍ଶନ କରିଥିଲେ ।
ଅଷ୍ଟ୍ରେଲିଆ ଗସ୍ତ ପାଇଁ ଘୋଷିତ ଭାରତ ଏ’ ଦଳରେ ନିତିଶଙ୍କୁ ସ୍ଥାନ ମିଳି ସାରିଛି । ଭାରତ ଏ’ ସେଠାରେ ୨ଟି ଅନଫିସିଆଲ ଟେଷ୍ଟ ଖେଳିବ । ଏହି ସିରିଜ ୨୧ ବର୍ଷିୟ ନିତିଶଙ୍କ ପାଇଁ ବରଦାନ ସାବ୍ୟସ୍ତ ହୋଇପାରେ । ଉକ୍ତ ସିରିଜରେ ସେ ଉନ୍ନତ ପ୍ରଦର୍ଶନ କଲେ ସିନିୟର ଦଳରେ ସ୍ଥାନ ହାସଲ କରିପାରିବେ । ନଭେମ୍ବର ୧୦ ତାରିଖରେ ଭାରତୀୟ ଦଳ ବର୍ଡର-ଗାଭାସ୍କର ଟ୍ରଫି ଖେଳିବା ପାଇଁ ଅଷ୍ଟ୍ରେଲିଆ ଯାତ୍ରା କରିବାର କାର୍ଯ୍ୟକ୍ରମ ରହିଛି ।
