ନୂଆଦିଲ୍ଲୀ,୧୭/୦୫: ଆମ୍ ଆଦମୀ ପାର୍ଟିର ରାଜ୍ୟସଭା ସାଂସଦ ସ୍ବାତୀ ମାଲିୱାଲଙ୍କ ଉପରେ ହୋଇଥିବା ଆକ୍ରମଣ ଅଭିଯୋଗରେ ଏଫ୍ଆଇଆର୍ ପଞ୍ଜିକରଣ କରିବା ପରେ ଦିଲ୍ଲୀ ପୋଲିସ ବର୍ତ୍ତମାନ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଦିଲ୍ଲୀ ମହିଳା ଆୟୋଗର ପୂର୍ବ ଅଧ୍ୟକ୍ଷ ସ୍ବାତି ମାଲିଓ୍ବାଲଙ୍କ ଉପରେ ଦୁର୍ବ୍ୟବହାର ଏବଂ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ନିକଟତର ବିଭବ କୁମାରଙ୍କ ଉପରେ ଗିରଫର ଖଣ୍ଡା ଝୁଲୁଛି। ପୁଲିସ ଖୁବଶୀଘ୍ର ତାଙ୍କୁ ଗିରଫ କରିପାରେ। କେଜ୍ରିଓ୍ବାଲଙ୍କ ଘରକୁ ଯାଇ ମଧ୍ୟ ଯାଞ୍ଚ କରିଛି ପୁଲିସ। ସ୍ବାତିଙ୍କ ବୟାନ ମଧ୍ୟ ମାଜିଷ୍ଟ୍ରେଟଙ୍କ ଆଗରେ ଉପସ୍ଥାପନ କରାଯାଇଛି। ତମାମ ଘଟଣାରେ ଦୀର୍ଘ ନୀରବତା ପରେ ମାଲିଓ୍ବାଲ ଦିଲ୍ଲୀ ପୁଲିସକ ଅଢ଼େଇ ଫର୍ଦ୍ଦର ଏକ ଅଭିଯୋଗ ଦାଖଲ କରିବା ପରେ ଏହି ଆଧାରରେ ଏତଲା ପଞ୍ଜିକୃତ ହୋଇଛି।
ଏତଲା ପଞ୍ଜିକୃତ ହେବା ପରେ ଦିଲ୍ଲୀ ପୁଲିସ ଗୁରୁବାର ରାତିରେ ସ୍ବାତି ମାଲିଓ୍ବାଲଙ୍କର ଦିଳ୍ଲୀ ଏମ୍ସରେ ମେଡିକାଲ ପରୀକ୍ଷା କରାଯାଇଥିଲା। କୁହାଯାଉଛି ଯେ, ଦିଲ୍ଲୀ ଏମ୍ସର ସିଟି ସ୍କାନ ସମେତ କିଛି ଡାକ୍ତରୀ ରିପୋର୍ଟ ମଧ୍ୟ ରହିଛି। ଯାହାକି ଖୁବଶୀଘ୍ର ପୁଲିସକୁ ହସ୍ତଗତ ହେବ।
ଦିଲ୍ଲୀ ପୁଲିସ ସ୍ବାତିଙ୍କ ବୟାନକୁ ମାଜିଷ୍ଟ୍ରେଟଙ୍କ ଆଗରେ ଉପସ୍ଥାପନ କରାଯିବ। ଆଇପିସିର ଧାରା ୧୬୪ ଅନୁସାରେ ମାଜିଷ୍ଟ୍ରେଟ୍ଙ୍କ ଆଗରେ ଦିଆଯିବାକୁ ଥିବା ପିଡ଼ୀତାଙ୍କ ବୟାନ ଏକ ମଜବୁତ ଆଧାର ଅଟେ। ସ୍ବାତୀ ମାଲିଓ୍ବାଲ ମାଜିଷ୍ଟ୍ରେଟଙ୍କ ଆଗରେ କହିବେ ଯେ,'ସେଦିନ ମୁଖ୍ୟମନ୍ତ୍ରୀଙ୍କ ବାସଭବନରେ ତାଙ୍କ ସହିତ କ'ଣ ହୋଇଥିଲା। ଏହା ପୂର୍ବରୁ ମାଲିଓ୍ବାଲଙ୍କ ଘରେ ଦିଲ୍ଲୀ ପୁଲିସ ପହଞ୍ଚିଥିବା ବେଳେ, ସ୍ବାତି ଅଢ଼େଇ ଫର୍ଦ୍ଦର ଏକ ଅଭିଯୋଗ ପତ୍ର ଦାଖଲ କରିଥିଲେ।