କୋଲକାତା: ପ୍ରଥମ ପର୍ଯ୍ୟାୟ ଲୋକସଭା ନିର୍ବାଚନ ଦିନ କୁଚବିହାର ଯିବାକୁ ପଞ୍ଚିମବଙ୍ଗ ରାଜ୍ୟପାଳ ସିଭି ଆନନ୍ଦ ବୋଷଙ୍କୁ ମନା କରିଛନ୍ତି ନିର୍ବାଚନ ଆୟୋଗ । ଏପ୍ରିଲ ୧୮ ଓ ୧୯ ତାରିଖ ଦିନ କୁଚବିହାର ଯାତ୍ରା ନକରିବାକୁ ରାଜ୍ୟପାଳଙ୍କୁ ଇସି ପରାମର୍ଶ ଦେଇଛନ୍ତି। ଆସନ୍ତା ଏପ୍ରିଲ ୧୯ ତାରିଖରେ ପଥମ ପର୍ଯ୍ୟାୟ ଭୋଟିଂ ହେବ । ଏହି ସମୟରେ ଯଦି ସେ କୁଚବିହାର ଯାତ୍ରା କରନ୍ତି ତେବେ ଏହା ନିୟମ ଅନୁଯାୟୀ ଆଦର୍ଶ ଆଚରଣ ବିଧି ଉଲ୍ଲଙ୍ଘନ ହେବ । ତାଙ୍କର ଗସ୍ତ ଯୋଗୁ ନିର୍ବାଚନ ପ୍ରକ୍ରିୟାରେ ବାଧା ସୃଷ୍ଟି ହୋଇପାରେ । ତେଣୁ ଏହି ଦିନ ଏଠାକୁ ଯାତ୍ରା କରନ୍ତୁ ନାହିଁ ବୋଲି ପଶ୍ଚିମବଙ୍ଗ ରାଜ୍ୟପାଳଙ୍କୁ ନିର୍ବାଚନ ଆୟୋଗ କହିଛନ୍ତି ।

ଶାସକ ତୃଣମୂଳ କଂଗ୍ରେସ(ଟିଏମସି) ରାଜ୍ୟପାଳ ନିର୍ବାଚନ ପ୍ରକ୍ରିୟାରେ ହସ୍ତକ୍ଷେପ କରୁଥିବା ନେଇ ଅଭିଯୋଗ କରିବାର କିଛି ସପ୍ତାହ ପରେ ନିର୍ବାଚନ ଆୟୋଗ ତାଙ୍କୁ ଏହି ପରାମର୍ଶ ଦେଇଛନ୍ତି । ମିଳିଥିବା ସୂଚନାଅନୁସାରେ, ଆସନ୍ତା ଏପ୍ରିଲ ୧୮ ଓ ୧୯ରେ ପଶ୍ଚିମବଙ୍ଗ ରାଜ୍ୟପାଳ ସିଭି ଆନନ୍ଦ ବୋଷ କୁଚବିହାର ଗସ୍ତ କରିବାର କାର୍ଯ୍ୟକ୍ରମ ଥିଲା । ଗତ ନିର୍ବାଚନ ବେଳେ ହୋଇଥିବା ହିଂସାକୁ ଦୃଷ୍ଟିରେ ରଖି ରାଜ୍ୟପାଳ କୁଚବିବହାରରେ ଡେରା ପକାଇବା ପାଇଁ ନିଷ୍ପତ୍ତି ନେଇଥିଲେ । ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ଗୁରୁବାର ଦିନ ସକାଳୁ ସେ କୋଲକାତାରୁ କୁଚବିହାର ଅଭିମୁଖେ ଯାତ୍ରା କରିଥାନ୍ତେ ।

 ଭୋଟିଂ ସରିବା ପରେ ସନ୍ଧ୍ୟାରେ ସେ ଫେରିବା କାର୍ଯ୍ୟକ୍ରମ ଥିଲା । ତେବେ ଏହି କାର୍ଯ୍ୟକ୍ରମକୁ ଏବେ ବାତିଲ କରିବା ପାଇଁ ନିର୍ବାଚନ କମିଶନ ତାଙ୍କୁ ପରାମର୍ଶ ଦେଇଛନ୍ତି। ନିର୍ବାଚନ ଆଦର୍ଶ ଆଚରଣ ବିଧି ନିୟମ ଅନୁଯାୟୀ ରାଜ୍ୟପାଳଙ୍କ ପାଇଁ କୌଣସି ବି ସ୍ଥାନୀୟ କାର୍ଯ୍ୟକ୍ରମ ଅୟୋଜିତ ହୋଇପାରିବ ନାହିଁ । ନିୟମ ଅନୁଯାୟୀ, ସାଇଲେଣ୍ଟ ପିରିୟଡ୍‌ ଆରମ୍ଭ ହେବା ପରେ କୌଣସି ବି ଭିଭିଆଇପି, ନେତା ତଥା ରାଜନୈତିକ କର୍ମୀ ଯେଉଁମାନେ ନିର୍ବାଚନମଣ୍ଡଳିରେ ଭୋଟର ନୁହନ୍ତୁ ସେମାନେ ଉକ୍ତ ସ୍ଥାନକୁ ଆଉ ଯାଇପାରିବେ ନାହିଁ। ୧୮ ଓ ୧୯ ତାରିଖରେ ପୂରା ଜିଲ୍ଲା ପ୍ରଶାସନ ଓ ପୋଲିସ ନିର୍ବାଚନରେ ବ୍ୟସ୍ତ ଥିବେ। ଏଭଳି ସ୍ଥିତିରେ ଅତିରିକ୍ତ ସୁରକ୍ଷା ଯୋଗାଇବା ଅସମ୍ଭବ ହୋଇପାରେ ବୋଲି ନିର୍ବାଚନ ଆୟୋଗ କହିଛନ୍ତି।