ନୂଆଦିଲ୍ଲୀ,୩୦/୦୪: ପଶ୍ଚିମବଙ୍ଗ ସନ୍ଦେଶଖାଲି ମାମଲାର ତଦନ୍ତ ଭାର କଲିକତା ହାଇକୋର୍ଟ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)କୁ ଦେବା ପାଇଁ ନିର୍ଦ୍ଦେଶ ଦେଇଥିଲେ । ରାଜ୍ୟ ସରକାର ହାଇକୋର୍ଟଙ୍କ ରାୟକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ୍ କରିଛନ୍ତି । ତେବେ ସୋମବାର ଏହି ଆବେଦନରେ ଶୁଣାଣି ହୋଇଥିଲା । ଏହାପରେ ସୁପ୍ରିମକୋର୍ଟ ଉକ୍ତ ଆବେଦନର ଶୁଣାଣି ଜୁଲାଇରେ ହେବ ବୋଲି କହିଛନ୍ତି । ସୋମବାର ଶୁଣାଣି ବେଳେ ସୁପ୍ରିମକୋର୍ଟ ବିଚାରପତି ଜଷ୍ଟିସ୍ ବି ଆର୍ ଗବଇ ଓ ସନ୍ଦୀପ ମେହଟ୍ଟାଙ୍କ ଖଣ୍ଡପୀଠ ପ୍ରଶ୍ନ ଉଠାଇଥିଲେ ଯେ ରାଜ୍ୟ ସରକାର ନିଜ ଲୋକଙ୍କ ହିତକୁ ଗୁରୁତ୍ୱ ଦେବାର ଉଚିତ ଥିଲା । କିନ୍ତୁ ଏହା ବିରୋଧରେ ସରକାର କାହିଁକି ପିଟିସନ୍ ଦାଖଲ କଲେ ।
ଉଲ୍ଲେଖଯୋଗ୍ୟ, କଲିକତା ହାଇକୋର୍ଟ ଏପ୍ରିଲ ୧୦ରେ ସନ୍ଦେଶଖାଲି ମାମଲାକୁ ସିବିଆଇକୁ ହସ୍ତାନ୍ତର କରିଥିଲେ। ଏହାପରେ ମାମଲାର ପରବର୍ତ୍ତୀ ଶୁଣାଣି ମେ ୨ରେ ହେବା ନେଇ ଅଦାଲତ କହିଥିଲେ । କିନ୍ତୁ ତାହା ପୂର୍ବରୁ ମମତା ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ସୁପ୍ରିମକୋର୍ଟରେ ସୋମବାର ଶୁଣାଣି ବେଳେ ମମତା ସରକାରଙ୍କ ଓକିଲ ଅଭିଷେକ ମନୁ ସିଂଘଭି କହିଥିଲେ, ଆମକୁ ୨-୩ ସପ୍ତାହ ମହଲତ ଦିଆଯାଉ । ଏହାଦ୍ୱାରା ଆମେ ଅଧିକ ତଥ୍ୟ ଯୋଡ଼ିପାରିବୁ । ସିବିଆଇ ତରଫରୁ ସଲିସିଟର ଜେନେରାଲ ତୁଷାର ମେହଟ୍ଟା, ଏଏସ୍ଜି ଏସ୍ ଭି ରାଜୁ ଏବଂ ଐଶ୍ୱର୍ଯ୍ୟ ଭାଟି ନିଜ ଯୁକ୍ତି ରଖିଥିଲେ । ସନ୍ଦେଶଖାଲିରେ ମହିଳାଙ୍କୁ ଟିଏମ୍ସି ନେତାମାନେ ଯୌନ ନିର୍ଯାତନା ଦେବା ଏବଂ ସେମାନଙ୍କ ଜମି ହଡ଼ପ କରିବା ନେଇ ଅଭିଯୋଗ ରହିଛି ।