ନୂଆଦିଲ୍ଲୀ: ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆସନ୍ତା ଜାନୁଆରୀ ୨୦ ତାରିଖରେ ଶପଥ ଗ୍ରହଣ କରିବାକୁ ଯାଉଛନ୍ତି। ଏଥିପାଇଁ ସେ ନିଜ କ୍ୟାବିନେଟର ଥିବା ବିଭିନ୍ନ ବିଭାଗରେ ଅଦଳ ବଦଳ ପ୍ରକ୍ରିୟା ଜାରି ରଖିଛନ୍ତି। ଏହି ପରିପ୍ରେକ୍ଷିରେ ପୂର୍ବତନ ସ୍ପେସ ଫୋର୍ସ ଅଧିକାରୀ ମାଥ୍ୟୁ ଲୋହମେଇରଙ୍କୁ ବାୟୁସେନାର ପରବର୍ତ୍ତି ଅଣ୍ଡର ସେକ୍ରେଟେରୀ ଭାବେ ନିଯୁକ୍ତ କରିଛନ୍ତି।
“ମ୍ୟାଟ ଜଣେ ପୂର୍ବତନ ବିମାନ ଚାଳକ ହେବା ସହ ସ୍ପେସ ଫୋର୍ସରେ ସ୍କ୍ୱାର୍ଡନ କମାଣ୍ଡର ଭାବେ କାମ କରିଛନ୍ତି। ସେ ଆମ ମହାନ ଦେଶ ପାଇଁ କାମ କରିଛନ୍ତି। ଶସ୍ତା ରାଜନୀତି ପାଇଁ ଆମ ଦେଶର ମହାନ ସେନାକୁ ଧ୍ୱସଂ କରିଦିଆଗଲା। କିନ୍ତୁ ଆଉ ନୁହେଁ ଏବେ ସେନା ଫୁଣି ଶକ୍ତିଶାଳୀ ହେବ” ବୋଲି ଟ୍ରମ୍ପ ସୋଶିଆଲ ମିଡିଆ ଟ୍ରୁଥ ସୋଶିଆଲରେ କହିବା ସହିତ ମାଥ୍ୟୁଙ୍କ ନିଯୁକ୍ତି ନେଇ ଘୋଷଣା କରିଛନ୍ତି।
ମାଥ୍ୟୁ ପ୍ରଥମେ ସେନାରେ ଫାଇଟର ବିମାନ ଚାଳକ ଭାବେ ଯୋଗ ଦେଇଥିଲେ। ପରେ ଏୟାର ଫୋର୍ସ ଛାଡି ସ୍ପେସ୍ ଫୋର୍ସରେ ଯୋଗଦେଇଥିଲେ। କିନ୍ତୁ ୨୦୨୧ମସିହାରେ ତାଙ୍କୁ ସ୍ପେସ୍ ଫୋର୍ସରୁ ବାହାର କରିଦିଆଯାଇଥିଲା। ଏହାପରେ ସେ ସେନାରେ ଲିଉଟିନାନ୍ଟ କୋଲୋନେଲ ଭାବେ କାର୍ଯ୍ୟ କରିଆସୁଥିଲେ। ତେବେ ନିକଟରେ ଏକ କନଜରଭେଟିଭ ପଡକାଷ୍ଟରେ ଯୋଗଦେଇ ଆମେରିକୀୟ ସେନାକୁ ସମାଲୋଚନା କରିଥିଲେ।
ମାଥ୍ୟୁ ନିକଟରେ ଆମେରିକୀୟ ଲୋକପ୍ରିୟ ଟିଭି ଶୋ ‘ଦ ଷ୍ଟିଭ ଗ୍ରୁଭର ଶୋ’ରେ ଭାଗ ନେଇଥିଲେ। ଏହି ଶୋ ରେ ଆମେରିକୀୟ ସେନାକୁ ସମୋଲୋଚିତ କରି ସେ ଲେଖିଥିବା ବହିକୁ ପ୍ରୋତ୍ସାହିତ କରିଥିଲେ।
