ପ୍ୟାରିସ୍, ୦୧/୦୬: ଚଳିତ ଫ୍ରେଞ୍ଚ ଓପନ ଗ୍ରାଣ୍ଡସ୍ଲାମ୍ର ସପ୍ତମ ଦିବସ ରୋମାଞ୍ଚପୂର୍ଣ୍ଣ ରହିଛି । ଟପ୍ ସିଡ୍ ଜାନିକ ସିନର, ପୂର୍ବତନ ରନର୍ସ ଅପ୍ ଆଲେକଜାଣ୍ଡର ଭେରେଭ, ଜେସିକା ପେଗୁଲା, ମୀରା ଆନ୍ଦ୍ରିଭା ପ୍ରମୁଖ ବିଜୟ ଜାରି ରଖି ପ୍ରି-କ୍ୱାର୍ଟରରେ ପ୍ରବେଶ କରିଛନ୍ତି । ସିଡେଡ୍ ଖେଳାଳିଙ୍କ ମଧ୍ୟରେ କେବଳ ଦଶମ ସିଡ୍ ପାଓଲା ବଡ଼ୋଶା ପରାଜିତ ହୋଇ ବିଦାୟ ନେଇଛନ୍ତି ।
ମହିଳା ସିଙ୍ଗଲ୍ସ ତୃତୀୟ ରାଉଣ୍ଡ୍ରେ ତୃତୀୟ ସିଡ୍ ପେଗୁଲା ୩-୬, ୬-୪, ୬-୨ ସେଟ୍ରେ ମର୍କେଟା ଭଣ୍ଡ୍ରୋସୋଭାଙ୍କୁ ପରାସ୍ତ କରିଥିଲେ । ଏହି ମ୍ୟାଚ୍ ଜିତିବା ପାଇଁ ପେଗୁଲାଙ୍କୁ ୧ଘଣ୍ଟା ୫୨ମିନିଟ୍ ଲାଗିଥିଲା । ଷଷ୍ଠ ସିଡ୍ ମୀରା ଆନ୍ଦ୍ରିଭା ମାତ୍ର ୭୮ମିନିଟ୍ ମଧ୍ୟରେ ୩୨ତମ ସିଡ୍ ୟୁଲିୟା ପୁଟିନସେଭାଙ୍କୁ ୬-୩, ୬-୧ ସେଟ୍ରେ ହରାଇଥିଲେ । ୧୭ତମ ସିଡ୍ ଡାରିଆ କାସାଟକିନା ୬-୧, ୭-୫ ସେଟ୍ରେ ଦଶମ ସିଡ୍ ପାଓଲା ବଡ଼ୋଶାଙ୍କୁ ପରାସ୍ତ କରିଥିବାବେଳେ ଫ୍ରାନ୍ସର ଲୋଇସ ବୋଇସନ ଯୋଗ୍ୟତା ପର୍ଯ୍ୟାୟରୁ ବିଜୟ ଜାରି ରଖି ପ୍ରଥମ ଥର ପାଇଁ ମୁଖ୍ୟ ଡ୍ର’ରେ ପ୍ରବେଶ କରିବା ସହ ଚତୁର୍ଥ ରାଉଣ୍ଡରେ ପ୍ରବେଶ କରିଥିଲେ । ସେ ଅନ୍ୟତମ ଫ୍ରାନ୍ସ ଖେଳାଳି ଏଲସା ଜାକମୋଟଙ୍କୁ ୬-୩, ୦-୬, ୭-୫ ସେଟ୍ରେ ହରାଇଥିଲେ । ୨୦ତମ ସିଡ୍ ଏକତାରିନା ଆଲେକଜାଣ୍ଡ୍ରୋଭା ୬-୨, ୬-୨ ସେଟ୍ରେ ଭେରୋନିକା କୁଦର୍ମେତୋଭାଙ୍କୁ ପରାସ୍ତ କରିଥିବାବେଳେ ହେଲି ବାପଟାଇଜ ୭-୬(୭-୪), ୬-୧ ସେଟ୍ରେ ଜେସିକା ବୌଜାସ ମାନେରୋଙ୍କୁ ହରାଇ ଚତୁର୍ଥ ରାଉଣ୍ଡ୍ରେ ସ୍ଥାନ ପକ୍କା କରିଥିଲେ ।
ପୁରୁଷ ସିଙ୍ଗଲ୍ସ ତୃତୀୟ ରାଉଣ୍ଡରେ ତାରକା ଖେଳାଳିଙ୍କ ଆଧିପତ୍ୟ ଜାରି ରହିଛି । ଟପ ସିଡ୍ ଜାନିକ ସିନରଙ୍କୁ ଜିତିବା ପାଇଁ ମାତ୍ର ଦେଢ଼ ଘଣ୍ଟା ଲାଗିଥିଲା । ସେ ଜିରି ଲେହେକାଙ୍କୁ ୬-୦, ୬-୧, ୬-୨ ସେଟ୍ରେ ପରାସ୍ତ କରିଥିଲେ । ସେହିପରି ତୃତୀୟ ସିଡ୍ ଆଲେକଜାଣ୍ଡର ଭେରେଭ ୬-୨, ୭-୬(୭-୪), ୬-୧ ସେଟ୍ରେ ଫାବିଆନ କୋବିଲଙ୍କୁ ହରାଇଥିଲେ । ତାଙ୍କୁ ଏହି ମ୍ୟାଚ୍ ଜିତିବା ପାଇଁ ଅଢ଼େଇ ଘଣ୍ଟା ଲାଗିଥିଲା । ପଞ୍ଚମ ସିଡ୍ ଜ୍ୟାକ୍ ଡ୍ରାପର ୧ଘଣ୍ଟା ୪୬ ମିନିଟ୍ ମଧ୍ୟରେ ବ୍ରାଜିଲ୍ର ଯୁବ ତାରକା ଜୋଆଓ ଫୋନେସ୍କାଙ୍କୁ ୬-୨, ୬-୪, ୬-୨ ସେଟ୍ରେ ହରାଇଥିଲେ ।
ଅନ୍ୟ ତୃତୀୟ ରାଉଣ୍ଡ ମୁକାବିଲାରେ ଆଲେକଜାଣ୍ଡର ବବଲିକ୍ ୭-୫, ୬-୧, ୬-୨ ସେଟ୍ରେ ହେନରିକ ରୋଚାଙ୍କୁ ପରାସ୍ତ କରିଥିବାବେଳେ ଟାଲନ ଗ୍ରିକ୍ସପୋର ଏକ ସଂଘର୍ଷପୂର୍ଣ୍ଣ ମୁକାବିଲାରେ ଆମେରିକାର ଇଥାନ କ୍ୱିନଙ୍କୁ ୪-୬, ୬-୧, ୬-୭(୨- ୭), ୬-୧, ୬-୪ ସେଟ୍ରେ ହରାଇଥିେ
