ପ୍ୟାରିସ୍,୦୨/୦୬: ଫେଞ୍ଚ ଓପନ ଗ୍ରାଣ୍ଡସ୍ଲାମ୍ର ଅଷ୍ଟମ ଦିବସରେ ବିପର୍ଯ୍ୟୟ ଘଟିଥିଲେ ମଧ୍ୟ ପ୍ରମୁଖ ଖେଳାଳିମାନଙ୍କ ବିଜୟ ଜାରି ରହିଛି । ମହିଳା ବର୍ଗରେ ଡିଫେଣ୍ଡିଂ ଚାମ୍ପିଅନ୍ ଇଗା ସ୍ୱିଟେକ, ବିଶ୍ୱର ଏକ ନମ୍ବର ଖେଳାଳି ଅର୍ନ୍ୟା ସାବାଲେଙ୍କା, ଅଷ୍ଟମ ସିଡ୍ କ୍ୱିନୱେନ ଝେଙ୍ଗ ଏବଂ ପୁରୁଷ ବର୍ଗରେ ଦ୍ୱିତୀୟ ସିଡ୍ କାର୍ଲୋସ ଅଲ୍କାରାଜ, ଆମେରିକାର ଟମି ପଲ୍ କ୍ୱାର୍ଟର ଫାଇନାଲ୍ରେ ପ୍ରବେଶ କରିଛନ୍ତି । ଚତୁର୍ଥ ସିଡ୍ ଇଟାଲୀର ଯସ୍ମିନ ପାଓଲିନି ପ୍ରି-କ୍ୱାର୍ଟରରେ ହାରି ବିଦାୟ ନେଇଛନ୍ତି ।
ମହିଳା ସିଙ୍ଗଲ୍ସ: ପ୍ରି-କ୍ୱାର୍ଟରରେ ଡିଫେଣ୍ଡିଂ ଚାମ୍ପିଅନ୍ ପୋଲାଣ୍ଡର ସ୍ୱିଟେକ ୧-୬, ୬-୩, ୭-୫ ସେଟ୍ରେ ୧୨ତମ ସିଡ୍ କାଜାଖସ୍ତାନର ଏଲେନା ରିବାକିନାଙ୍କୁ ପରାସ୍ତ କରିଥିଲେ । ଏହି ମ୍ୟାଚ୍ ଜିତିବା ପାଇଁ ତାଙ୍କୁ ୨ଘଣ୍ଟା ୩୨ମିନିଟ୍ ଲାଗିଥିଲା । ଟପ୍ ସିଡ୍ ବେଲାରୁଷର ସାବାଲେଙ୍କା ସିଧାସଳଖ ୭-୫, ୬-୩ରେ ଆମେରିକାର ଆମାଣ୍ଡା ଆନିସିମୋଭାଙ୍କୁ ପରାସ୍ତ କରିଥିଲେ । ସେ ଦେଢ଼ ଘଣ୍ଟା ମଧ୍ୟରେ ବିଜୟ ହାସଲ କରିଥିଲେ । ଅନ୍ୟ ମ୍ୟାଚ୍ରେ ଚୀନର ଝେଙ୍ଗ ଅଢ଼େଇ ଘଣ୍ଟାର ସଂଘର୍ଷ ପରେ ଲ୍ୟୁଡମିଲା ସାମସୋନୋଭାଙ୍କୁ ୭-୬ (୭-୫), ୧-୬, ୬-୩ରେ ହରାଇଥିଲେ । ୟୁକ୍ରେନର ସ୍ୱିତୋଲିନା ବିପର୍ଯ୍ୟୟ ଘଟାଇଥିଲେ । ସେ ୪-୬, ୭-୬ (୮-୬), ୬-୧ରେ ଚତୁର୍ଥ ସିଡ୍ ପାଓଲିନିକୁ ପରାଜିତ କରିଥିଲେ ।
ପୁରୁଷ ସିଙ୍ଗଲ୍ସ: ପ୍ରି-କ୍ୱାର୍ଟର ମୁକାବିଲାରେ ସ୍ପେନ ତାରକା ଅଲ୍କାରାଜ ୭-୬ (୧୦-୮), ୬-୩, ୪-୬, ୬-୪ ସେଟ୍ର ଆମେରିକାର ବେନ୍ ସେଲଟନ୍ଙ୍କୁ ହରାଇଥିଲେ । ମ୍ୟାଚ୍ ଜିତିବା ପାଇଁ ତାଙ୍କୁ ୩ଘଣ୍ଟା ୨୨ମିନିଟ ଲାଗି ଯାଇଥିଲା । ଅନ୍ୟ ମ୍ୟାଚ୍ରେ ଆମେରିକାର ପଲ ୬-୩, ୬-୩, ୬-୩ ସେଟ୍ରେ ଅଷ୍ଟ୍ରେଲିଆର ଆଲେକ୍ସି ପପିରିନଙ୍କୁ ପରାସ୍ତ କରିଥିଲେ । ୧୫ତମ ସିଡ୍ ଟିଆଫଏ ୬-୩, ୬-୪, ୭-୬ (୭-୪)ରେ ଜର୍ମାନୀର ଡାନିଏଲ୍ ଅଲ୍ଟମାୟରଙ୍କୁ ହରାଇ କ୍ୱାର୍ଟରରେ ପ୍ରବେଶ କରିଥିଲେ ।
ପୂର୍ବରୁ ଅନୁଷ୍ଠିତ ତୃତୀୟ ରାଉଣ୍ଡ୍ ମ୍ୟାଚ୍ରେ ଷଷ୍ଠ ସିଡ୍ ସର୍ବିୟାର ନୋଭାକ ଜୋକୋଭିକ ୨ଘଣ୍ଟା ୧୦ମିନିଟ୍ର ଲଢ଼େଇରେ ଅଷ୍ଟ୍ରିୟାର ଫିଲିପ ମିସୋଲିକ୍ଙ୍କୁ ୬-୩, ୬-୪, ୬-୨ ସେଟ୍ରେ ହରାଇ ପ୍ରି-କ୍ୱାର୍ଟରରେ ପ୍ରବେଶ କରିଥିଲେ । ବୋପାନ୍ନା, ଭାମ୍ବ୍ରିଙ୍କ ବିଦାୟ ପୁରୁଷ ଡବଲ୍ସରେ ଭାରତର ରୋହନ ବୋପାନ୍ନା ଓ ୟୁକି ଭାମ୍ବ୍ରିଙ୍କ ଅଭିଯାନ ଶେଷ ହୋଇଛି । ପ୍ରି-କ୍ୱାର୍ଟରରେ ବୋପାନ୍ନା ଓ ଆଡାମ ପାଭଲାସେକ ଯୋଡ଼ି ୨-୬, ୬-୭ (୫-୭)ରେ ଦ୍ୱିତୀୟ ସିଡ୍ ହ୍ୟାରୀ ହେଲିଓଭାରା-ହେନରୀ ପ୍ୟାଟେନ ଯୋଡ଼ିଙ୍କଠୁ ଏବଂ ଭାମ୍ବ୍ରି ଓ ରୋବର୍ଟ ଗଲୋୱେ ଯୋଡ଼ି ୪-୬, ୪-୬ରେ ନବମ ସିଡ୍ କ୍ରିଷ୍ଟିଆନ ହ୍ୟାରିସନ- ଇଭାନ କିଙ୍ଗ୍ଙ୍କଠୁ ହାରି ଯାଇଥିଲେ ।
