ତେଲ ଅଭିଭ,୨୭/୦୪: ଇସ୍ରାଏଲ ଉପରେ ଗତ ଅକ୍ଟୋବର ୭ରେ ହମାସ୍‌  ଆତଙ୍କବାଦୀ ଆକ୍ରମଣ କରିବା ସହ ଇସ୍ରାଏଲ ନାଗରିକଙ୍କୁ ଅପହରଣ କରି ପଣବନ୍ଦୀ କରିଥିଲେ । ସେହି ପଣବନ୍ଦୀଙ୍କ ମଧ୍ୟରୁ ଜଣେ ମହିଳାଙ୍କୁ ହମାସ୍‌ର ଜଣେ ଆତଙ୍କବାଦୀ ବିବାହ କରିବାକୁ ଚାହୁଁଥିଲା ।ଏପରିକି ତାଙ୍କ ସହ ସମ୍ପର୍କ ରଖି ସନ୍ତାନ ଜନ୍ମ କରିବାକୁ ମଧ୍ୟ କହିଥିଲା । ହମାସ୍‌  କବଳରୁ ମୁକୁଳିଥିବା ଇସ୍ରାଏଲୀ ମହିଳା ନୋଗା  ବିସ୍‌(୧୮) ଏହି କଥା ସାମ୍‌ନାକୁ ଆଣିଛନ୍ତି । 

ଟାଇମ୍ସ  ଅଫ୍‌ ଇସ୍ରାଏଲର ରିପୋର୍ଟ ଅନୁସାରେ, ନୋଗା ୱେସ୍‌ ଗାଜାରେ ମାସାଧିକ କାଳ ହମାସ୍‌ କବଳରେ ରହିଥିଲେ । ଏହି ସମୟରେ ହମାସ୍‌ର ଜଣେ ଆତଙ୍କବାଦୀ ତାଙ୍କୁ ବିବାହ ପ୍ରସ୍ତାବ ଦେଇଥିଲା । ଅପହରଣର ୧୪ ଦିନରେ ଆତଙ୍କବାଦୀ ତାଙ୍କୁ ଏକ ମୁଦି ଦେବା ସହ କହିଥିଲା ଯେ, ସମସ୍ତଙ୍କୁ ଛାଡ଼ି ଦିଆଯିବ । କିନ୍ତୁ ନୋଗାଙ୍କୁ ସେ ବିବାହ କରିବ ଏବଂ ନୋଗା ତାଙ୍କ ସନ୍ତାନକୁ ଜନ୍ମ ଦେବେ । ଏଥିରେ  ନୋଗା ଭୟଭୀତ ହୋଇପଡ଼ିଥିଲେ । ଆତଙ୍କୀ  ତାଙ୍କୁ ବିବାହ ପ୍ରସ୍ତାବ ଉପରେ ଜବାବ ମାଗିଥିଲା ।  ଏଥିରେ ନୋଗା ହସି ହସି ମୁଣ୍ଡ ହଲାଇଥିଲେ । କାରଣ ତାଙ୍କର ଭୟ ଥିଲା ଯେ ଯଦି ଏଥିପାଇଁ ସେ ମନା କରନ୍ତି ତେବେ ଆତଙ୍କବାଦୀ ତାଙ୍କୁ ଗୁଳି  କରିଦେବେ । ପରେ ହମାସ୍‌ ଆତଙ୍କବାଦୀ ନୋଗାଙ୍କୁ ତାଙ୍କ ମା’ଙ୍କ ସହ ଭେଟ କରାଇଥିଲେ । ନୋଗାଙ୍କ  ସହ ତାଙ୍କ ମା’ଙ୍କୁ ମଧ୍ୟ ଅପହରଣ କରାଯାଇଥିଲା । ସେଠାରେ ଆତଙ୍କବାଦୀ ନୋଗାଙ୍କ ମା’ଙ୍କୁ ତାଙ୍କ ହାତ ମାଗିଥିଲା । 

ଅନ୍ୟ ଆତଙ୍କବାଦୀମାନେ ମଧ୍ୟ ନୋଗାଙ୍କୁ  କହିଥିଲେ ଯେ, ସେହି ଆତଙ୍କୀ ଜଣକ ନୋଗାଙ୍କୁ ବହୁତ ଭଲ ପାଆନ୍ତି ଏବଂ ତାଙ୍କୁ ବିବାହ କରିବାକୁ ଚାହୁଁଛନ୍ତି । ତେବେ ଗତ ନଭେମ୍ବରରେ ହମାସ୍‌ ଏବଂ ଇସ୍ରାଏଲ ମଧ୍ୟରେ ଯୁଦ୍ଧ ବିରତି ହେବାବେଳେ ନୋଗା  ଏବଂ ତାଙ୍କ ମା’ଙ୍କୁ ହମାସ୍‌ ମୁକ୍ତ କରିଦେଇଥିଲା ।