ଇସଲାମାବାଦ,୦୯/୦୫: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ପତ୍ନୀ ବୁଶରା ବିବିଙ୍କୁ ସେହି ଜେଲ୍ରେ ରଖାଯିବ ଯେଉଁଠାରେ ଇମ୍ରାନ୍ ବନ୍ଦୀ ଅଛନ୍ତି । ବୁଶରାଙ୍କ ଆବେଦନକ୍ରମେ ଇସଲାମାବାଦ ହାଇକୋର୍ଟ ତାଙ୍କୁ ବୁଧବାର ରାୱଲପିଣ୍ଡିର ଆଦିୟାଲା ଜେଲ୍କୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି ।
ବୁଶରା ଏବେ ନିଜର ବନିଗାଲା ଘରେ ଗୃହବନ୍ଦୀ ଅଛନ୍ତି । ତାଙ୍କର ଗିରଫଦାରି ପରେ ସେହି ଘରକୁ ଅସ୍ଥାୟୀ ଜେଲ୍ରେ ପରିଣତ କରାଯାଇଥିଲା । ତେବେ ଗିରଫଦାରି ପରଠାରୁ ବୁଶରା ତାଙ୍କୁ ଆଦିୟାଲା ଜେଲ୍କୁ ଶିଫ୍ଟ କରାଯିବାକୁ ଦାବି କରିଆସୁଥିଲେ । ତାଙ୍କୁ ହତ୍ୟା କରିବାକୁ ଉଦ୍ୟମ ହେଉଥିବା ସେ ଅଭିଯୋଗ କରିଥିଲେ । ଗତ ସପ୍ତାହରେ ଇସଲାମାବାଦ ହାଇକୋର୍ଟର ବିଚାରପତି ଜଷ୍ଟିସ୍ ମିୟାଙ୍ଗୁଲ ହସନ ଔରଙ୍ଗଜେବ ତାଙ୍କ ଆବେଦନ ସଂପର୍କରେ ଶୁଣାଣି ଶେଷ କରି ରାୟ ସୁରକ୍ଷିତ ରଖିଥିଲେ । ତେବେ ବୁଶରାଙ୍କୁ କେବେ ଆଦିୟାଲା ଜେଲ୍ ପଠାଯିବ ତାହା ସ୍ପଷ୍ଟ ହୋଇପାରିନାହିଁ ।
ସୂଚନାଥାଉକି, ଇମ୍ରାନ୍ ମଧ୍ୟ ବୁଶରାଙ୍କୁ ହତ୍ୟା ଲାଗି ଉଦ୍ୟମ ହେଉଥିବା ଅନେକ ଥର ଦାବି କରିସାରିଛନ୍ତି । କିଛି ଦିନ ପୂର୍ବରୁ ସେ ସେନା ବିରୋଧରେ ବୁଶରାଙ୍କୁ ଟୟଲେଟ୍ କ୍ଲିନର ଦେଇଥିବା ଅଭିଯୋଗ ଆଣିଥିଲେ । ସୂଚନାଥାଉକି, ବୁଶରାଙ୍କୁ ଅଣ ଇସଲାମିକ୍ ବିବାହ ମାମଲାରେ ଗିରଫ କରାଯାଇଛି।
