ନୂଆଦିଲ୍ଲୀ,୦୮/୦୩ : ଯିଏ ଦୁନିଆ ଦେଖାଏ ସେ ନାରୀ । ଜନ୍ମ କରିବାକୁ ମା' ଦରକାର । ରାକ୍ଷୀ ବାନ୍ଧିବାକୁ ଭଉଣୀଟିଏ ଦରକାର । କୋଳରେ ବସି ଗପ ଶୁଣିବାକୁ ଆଈ ଦରକାର । କେବେ ସେ ମା'  ପୁଣି କେବେ ଝିଅ । ତ୍ୟାଗର ମୂରତୀ, ଧୈର୍ଯ୍ୟର ପରିଚୟ । ସବୁ କ୍ଷେତ୍ରରେ ଯୁଗ ଯୁଗରୁ ନାରୀର ଆବଶ୍ୟକତା ରହିଛି । ସେ ଅପରାଜିତା ଜଗତଜିତା ସର୍ବଦା ସମ୍ମାନିତା । ସେ ଅଟକିବା ଜାଣେ ନାହିଁ ନିଜ ହାତରେ ଲେଖେ ଭାଗ୍ୟରେଖା । ନାରୀ ଶକ୍ତିର ଅପୂର୍ବ ଅଭ୍ୟୁଦୟ । ସବୁ କ୍ଷେତ୍ରରେ ପୁରୁଷଙ୍କ ସମକକ୍ଷ ନାରୀ । ସେ ଘରଣୀ କମ୍ପ୍ୟୁଟର ଯୁଗର ରାଣୀ । ସେ ଆକାଶ ଛୁଇଁଛି ପରିବାରର ବୋଝ ଉଠାଇଛି । ସେ ଆଜିର ନାରୀ । ସାହସ, ଶକ୍ତି ଓ ବୁଦ୍ଧିମତାର ଆଧାର । ସ୍ବାଭିମାନୀ ଆଉ ସ୍ବାବଲମ୍ବୀ । ସୃଷ୍ଟି ସମ୍ଭାବନାର ଉଜ୍ଜ୍ବଳ ତାରକା । ଜୀବନ ନୌକାର ନାଉରୀ । ଆଜି ଅନ୍ତର୍ଜାତୀୟ ମହିଳା ଦିବସ । ନାରୀ ଶକ୍ତିକୁ ସମ୍ମାନ ଜଣାଇ ପ୍ରତିବର୍ଷ ମାର୍ଚ୍ଚ ୮ ତାରିଖକୁ ମହିଳା ଦିବସ ଭାବେ ପାଳନ କରାଯାଏ ।

ଅନ୍ତର୍ଜାତୀୟ ମହିଳା ଦିବସ ୨୦୨୫-  ପ୍ରତିବର୍ଷ ମାର୍ଚ୍ଚ ୮ ତାରିଖକୁ ଅନ୍ତର୍ଜାତୀୟ ମହିଳା ଦିବସ ଭାବେ ପାଳନ କରାଯାଏ । ଏକ ଶ୍ରମିକ ଆନ୍ଦୋଳନରୁ ଦିବସ ସୃଷ୍ଟି ହୋଇଥିଲା । ୧୯୦୮ ମସିହାରେ ଏହା ପ୍ରଥମେ ପାଳିତ ହୋଇଥିଲା । ନ୍ୟୁୟର୍କ ସହରରେ ୧୫ ହଜାର ମହିଳା ମାର୍ଚ୍ଚ ମାସରେ ଆନ୍ଦୋଳନର କରି ଚାକିରି କ୍ଷେତ୍ରରେ ସେମାନଙ୍କ ପାଇଁ କମ ସମୟ, ଭଲ ପାରିଶ୍ରମିକ ମିଳୁ ବୋଲି ଦାବି କରିଥିଲେ । ଏହି ଆନ୍ଦୋଳନର ବର୍ଷେ ପରେ ଅର୍ଥାତ ୧୯୦୯ରେ ଆମେରିକା ସୋସିଆଲିଷ୍ଟ ପାର୍ଟି  ପ୍ରଥମ ଜାତୀୟ ମହିଳା ଦିବସ ଭାବରେ ଘୋଷଣା କରିଥିଲା ।

ଅଧିକ ପଢନ୍ତୁ...ମହାକାଶରେ ଅନେକ ମାସ ଧରି ଫସି ରହିବା ପରେ ଫେରୁଛନ୍ତି ସୁନୀତା ୱିଲିୟମ୍ସ

ପରବର୍ତ୍ତୀ ସମୟରେ ଏହାକୁ ଅନ୍ତର୍ଜାତୀୟ ମହିଳା ଦିବସ ଭାବେ ପାଳନ କରାଗଲା । ୧୯୧୦ ମସିହାରେ ପ୍ରଥମ ଅନ୍ତର୍ଜାତୀୟ ମହିଳା ଦିବସ ପାଳନ ହୋଇଥିଲା । କ୍ଲାରା ଜେଟକିନ ନାମୀ ମହିଳା ଏହି ଦିବସ ପାଳନ କରିବାକୁ ପରାମର୍ଶ ଦେଇଥିଲେ । ପରେ ପରେ ଅଷ୍ଟ୍ରିଆ, ଡେନମାର୍କ, ଜର୍ମାନୀ ଏବଂ ସ୍ବିଜରଲାଣ୍ଡର ଅନ୍ତର୍ଜାତୀୟ ମହିଳା ଦିବସ ପାଳନ ହୋଇଥିଲା । ୧୯୭୫ରେ ଏହାକୁ ଆନୁଷ୍ଠାନିକ ଭାବେ ମାନ୍ୟତା ମିଳିଥିଲା । ମିଳିତ ଜାତିସଂଘ ଏକ ଥିମ ସହିତ ପ୍ରତିବର୍ଷ ପାଳନ କରାଯାଇଥିଲା ।  ଚଳିତ ବର୍ଷ ଅନ୍ତର୍ଜାତୀୟ ମହିଳା ଦିବସର ଥିମ୍ ରହିଛି ଅର୍ଥାତ ଆସିଲରେଟ୍ ଆକ୍ସନ (Accelerate Action) ।