ନୂଆଦିଲ୍ଲୀ,୧।୭: ମୁସଲମାନ ବହୁଳ ଦେଶ କାଜାଖସ୍ତାନରେ ନୂଆ ଆଇନ୍। ହିଜାବ ଉପରେ ଲାଗିଲା ବ୍ୟାନ୍। ରାଷ୍ଟ୍ରପତି କାସିମ୍ ଜୋମାର୍ଟ ତୋକାୟେଭ ନୂତନ ଆଇନ ଉପରେ ଲଗାଇଛନ୍ତି ମୋହର। ଇସଲାମିକ୍ ଦେଶରେ ହିଜାବ ପ୍ରଚଳନ ଥିବା ବେଳେ ସରକାରଙ୍କ ଏଭଳି ନିଷ୍ପତ୍ତି ଖୁବ୍ ଗୁରୁତ୍ବପୂର୍ଣ୍ଣ।ସୋମବାର ଏହି ଆଇନ ଉପରେ ସେ ଲଗାଇଛନ୍ତି ମୋହର । ଫଳରେ କାଜାଖସ୍ତାନର ମହିଳାମାନେ ସାର୍ବଜନୀନ ସ୍ଥାନରେ ମୁହଁ ଘୋଡ଼ାଇବେ ନାହିଁ।
କାଜାଖସ୍ତାନ ସରକାର କହିଛନ୍ତି ହିଜାବ ପିନ୍ଧିବା ଦ୍ବାରା ଫେସିଆଲ ରିକଗନେସନ୍ ଟେକ୍ନୋଲୋଜି କାମ କରେନି, ଯାହାକି ବହୁ ସ୍ଥାନରେ ଜରୁରୀ। ସୋଭିଏତ୍ ୟୁନିଅନର ଏକ ଅଂଶ ଥିବା କାଜାଖସ୍ତାନ ସରକାରଙ୍କ ଏହି ନିର୍ଦ୍ଦେଶ ବେଶ୍ ଗୁରୁତ୍ବପୂର୍ଣ୍ଣ। କାରଣ ଦେଶର ୭୦ ପ୍ରତିଶତ ଜନସଂଖ୍ୟା ଇସଲାମ ଧର୍ମ ଗ୍ରହଣ କରନ୍ତି। ସାରା ବିଶ୍ୱରେ ମୁସଲିମ ମହିଳାଙ୍କ ଏକ ବଡ଼ ବର୍ଗ ମଧ୍ୟରେ ହିଜାବ୍ ପିନ୍ଧିବା ଧାରା ଦେଖାଯାଏ। ଏପରି ସ୍ଥିତିରେ, କାଜାଖସ୍ତାନ ସରକାରଙ୍କ ନିଷ୍ପତ୍ତି ଦେଶର ଧାର୍ମିକ ସଂଗଠନଗୁଡ଼ିକ ପକ୍ଷରୁ ବିରୋଧର ସମ୍ମୁଖୀନ ହୋଇପାରେ। ତଥାପି, ଆଇନରେ କୌଣସି ଧର୍ମ କିମ୍ବା ଧାର୍ମିକ ପୋଷାକ ସିଧାସଳଖ ଉଲ୍ଲେଖ କରାଯାଇ ନାହିଁ।
ମଧ୍ୟ ଏସୀୟ ଦେଶରେ ଗତ କିଛି ସମୟ ହେବ ବୁର୍ଖା ଓ ହିଜାବ ଭଳି ପରିଧାନ ଉପରେ କଟକଣା ରହିଛି। କାଜାଖସ୍ତାନ ମଧ୍ୟ ଏଥିରେ ସାମିଲ ହୋଇଯାଇଛି। କାଜାଖସ୍ତାନର ନୂଆ ଆଇନ ଅନୁସାରେ, ଏଭଳି କପଡା ଯାହାଦ୍ବାରା ମୁହଁକୁ ଚିହ୍ନଟ କରିହେବନି। ତାକୁ ସାର୍ବଜନୀନ ସ୍ଥାନରେ ପିନ୍ଧିବାର ଅନୁମତି ଦିଆନଯାଉ। ତେବେ କିଛି ମାମଲାରେ ଏହି ଆଇନ କାର୍ଯ୍ୟକାରୀ ହୋଇନପାରେ। ଯେପରିକି ସ୍ବାସ୍ଥ୍ୟଗତ ସମସ୍ୟା, ଖରାପ ପାଣିପାଗ, ଖେଳ କିମ୍ବା ସାଂସ୍କୃତିକ କାର୍ଯ୍ୟକ୍ରମରେ ଏହି ଆଇନ ଲାଗୁ ହେବନି। କାଜାଖସ୍ତାନ ରାଷ୍ଟ୍ରପତି କହିଛନ୍ତି, ଏଭଳି ହିଜାବ ନପିନ୍ଧି ରାଷ୍ଟ୍ରୀୟ ଶୈଳୀର କପଡା ପିନ୍ଧିବା ଖୁବ୍ ଜରୁରୀ। ଆମର ଜାତୀୟ ପରିଧାନ ଆମର ପରିଚୟର ସୁନ୍ଦରାତାକୁ ଦର୍ଶାଇଥାଏ। ତେଣୁ ଏହାକୁ ପ୍ରୋତ୍ସାହନ ଦେବା ଦରକାର। ତେବେ ଏହା ପ୍ରଥମ ଥର ନୁହେଁ, ଯେବେ କଜାକିସ୍ତାନ ସରକାର ଧର୍ମୀୟ ପରିଧାନ ଉପରେ କଟକଣା ଲଗାଇଛନ୍ତି। ଏହା ପୂର୍ବରୁ ୨୦୨୩ ରେ ସରକାର ସ୍କୁଲରେ ହିଜାବ ପିନ୍ଧିବାକୁ ବ୍ୟାନ୍ କରିଥିଲେ। ଛାତ୍ରୀ ଓ ଶିକ୍ଷୟତ୍ରୀଙ୍କୁ ସ୍କୁଲକୁ ହିଜାବ ପିନ୍ଧି ଆସିବାକୁ ମନା କରାଯାଇଥିଲା। ଯାହାକୁ ନେଇ ଖୁବ୍ ବିରୋଧ ହୋଇଥିଲା। ଏଭଳି କରି କାଜାଖସ୍ତାନ ସରକାର ନିଜର ନିଷ୍ପତ୍ତିକୁ ଧର୍ମ ନିରପେକ୍ଷ ରଖିବା ଓ ଚରମପନ୍ଥୀ ପ୍ରବୃତ୍ତିରୁ ରକ୍ଷା ପାଇବା ଉପରେ ଦର୍ଶାଉଛି। କିନ୍ତୁ ଆଲୋଚକଙ୍କ ମତରେ ଏହାଦ୍ବାରା ଧାର୍ମିକ ସ୍ବତନ୍ତ୍ରତା ଉପରେ ପ୍ରଭାବ ପଡିପାରେ। ଆଗାମୀ ସମୟରେ ଏହି ଆଇନ ସାମାଜିକ ବିତର୍କ ଓ ରାଜନୈତିକ ପ୍ରତିକ୍ରିୟାର ବିଷୟ ପାଲଟିପାରେ।
